Feature : Mipuiin kawng enkawl

Mizorama a hmasa ber tur, PWD kawng ni thin YMA ten an enkawl tur kawngpui kilometer 12.2-a sei chu ni 6.2.2018 (Thawhlehni) tlai khan Agriculture Minister KS Thanga chuan Samtlang leh Lungleng YMA hnenah a hlan.

PWD Aizawl Road South Division enkawl thin kawng km 12.2-a thuiah hian Samtlang YMA te hian km 6.800 a thui, Serlui hnar atanga Khankawn inkar an enkawl ang a. Lungleng YMA te hian km 5.400 a thui, Khankawn atanga Lal in thleng an enkawl ve thung dawn a ni. Kawng enkawl hun chhung hi January atanga December thla thleng a ni ang. Kawng enkawl hna hian Alkatra luan (black top) tih loh chu a huam vek dawn a, kawng enkawl manah hian km 1-ah Rs. 40,000/- dawngin, kum khat chhungin Samtlang Branch YMA-in Rs. nuai 2,72,000/-; Lungleng Branch YMA-in Rs. 2,16,000/- an dawng dawn a, kum khat chhunga PWD-in a senso tur zawng zawng hi Rs. 4,88,000/- a ni.

Mizorama a vawi khatna atana Samtlang leh Lungleng Branch YMA te hnena kawng hlanna (Community Base Road Maintenance Contract) inkhawm neihah hian PWD Aizawl Road South Division E.E. David Sapzova chuan tuna an hmalakna chu World Bank duh dan anga tih a nih thu leh enchhinna a nih thu sawiin a hlawhtlin chuan hmun dangah pawh tih chhunzawm zel tum a ni tih a sawi. PWD chuan kawng enkawltu YMA te hnathawh chu thla thum danah enfiahin an hnathawh that leh that loh azirin pawisa an hlan thin dawn niin a sawi.

Samtlang YMA chuan kawngpui enkawl turin an inpeih tih Zalen an hrilh a. “A tha thei ang bera tih kan tum a ni,” tiin an hnathawh ber tur chu kawng ba samfai, khuar awmte hnawh leh thawmthat te a ni dawn niin an sawi. Samtlang bikah hian YMA member 500 chuang awmin section paliah an inthen a, hengte hi a inchhawkin a tul dan ang zelin hna an thawk thin dawn niin Zalen an hrilh bawk.

PWD hotu pakhat chuan kawngpui humhalh chungchangah mipuiten neitu rilru tak tak pu se a duh tih Zalen a hrilh a. “Sum tam tak senga kan kawng siamte hi mi thenkhatten dim lo takin an hmang thin a. Kawng laia iron rod lo chhu te, thing ek leh insu te an awm thin a, hei hian nasa takin kawng a tichhe hma a. YMA ten kawng an enkawl chuan hei hi a ziaawm theih kan beisei tlat a ni,” a ti bawk. Samtlang to Lungleng kawng hi Model road, Mizoram PWD-in a vawi khat nana NGO (YMA) nena an thawhdunna tur a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?