Feature : MPSC exam fee a to em?

Mizoram Public Service Commission chuan state dangte aia exam fee a tihto avangin exam tum mi tam takin harsatna an tawk nia thudawn a ni.

Exam fee to chhan Zalen zawhna chhangin MPSC Secretary Lalzirmawia Chhangte chuan, “State dang ai chuan a to hlek mai thei a. Mizoram hi state pachhia kan nih avangin Finance Department lamin fee hi tisang deuh turin min beisei a, chuvanga tisang deuh chu kan ni,” tiin a sawi. Tunhnaia UDC hnaruak awmah a ruala exam-tir lova a hrang hranga exam a nih chhan zawhna chhangin, “Keini pawhin a ruala exam-tir mai hi a thain exam turte tan pawh senso a tlem dawn tih kan hria a. Mahse, hnaruak hi Department hian a mal tetein a rawn kaltir pheuh pheuh a, hnaruak awm tur zat leh a hun tur hi hriat a ni thin lo a. Sawrkar lam hian hnaruak awm tur zat hi min hriattir thei se chuan a hlawmin kan ti ang a, exam turte tan fee a insensona a tlem dawn bakah kan tan pawha hahdam zawk dawn a ni,” a ti bawk.

MPSC hian exam fee atan hian Scheduled Tribe leh Scheduled Caste-ah Rs.250+ Rs. 20 (form man) a vaiin Rs. 270 leh General tan Rs. 300 a la mek a. Tun hnaia department 4-SAD, Excise, Social Wefare & Agriculture a UDC 7 lakna turah a hrang vekin Advertisement tihchhuah a ni a, Department tina exam ti tur chuan Rs. 270/- zel chawi a ngai a, exam kim turin Rs. 1080/- chawi a ngai a, hei hi exam-te tan phurrit a tlin avangin leh a bikin thingtlang lam atanga Aizawl-a exam turte tan kal velna senso a san bawk avangin sawiselna a tam hle a ni. MPSC hian Mizoram Civil Service (MCS), Mizoram Finance & Account Service (MFAS) leh Mizoram Information Service (MIS) hna la tur hian tun hnaiah Combine Service Exam a buatsaih a, hei hi exam-te tan a awlsam bakah MPSC pawhin a hrang hranga exam a buaipui a ngaih loh avangin a awlsam zawk bawk a ni.

Zirlai pakhat chuan hna hrang hrang exam dawn chuan fee hi a to hma hle mai a, chumai bakah thingtlang lam mi tan chuan Aizawl zin man, study materials lakkhawm senso leh mamawh dang neuh neuh han chhut hian vawi khat exam senso hi a sang thei lutuk a. Sawrkar hian kan hmakhaw ngai hian tihhniam dan zawng thei se ka duh hle a ni tiin Zalen a hrilh.

Hriattheih chinah hmarchhak state danga Public Service Commission hnuaia exam fee (application fee) chu a hnuaia mi ang hi a ni-
1. Assam – Rs. 150 SC/ST, general – 300.
2. Arunachal – Rs.120 ST/SC, general 180.
3. Manipur Rs. 150 (ST/SC), general Rs. 300
4. Tripura – Gr.A Rs.150 ST/SC/BPL, general – Rs.200
5. Meghalaya – General – Gr. A – Rs.460, Fee chanve ST/SC
6. UPSC – free for ST,SC,Women etc.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?