Feature : Natnain vawk suat nasa

Mizote sa duh ber chu vawksa hi a ni awm e. Pathianni tuk saah pawh chhungkaw tam ber chuan vawksa ngei hmeh an duh a, Inrinni tuk bazarah pawh vawksa zawrhna chu a lun ber zel. Mahse, tun hnaia vawk natna hri chi khat PRRS (Porcine Reproductive Respiratory Syndrome) leng vangin vawksa hralh a kal lo hle a, Arsa, Sangha leh Bawngsa zuarten an hlawkpui thung.

AH&Vety department ten Zalen an hrilh danin kumin chhung ringawt hian vawk na hri Porcine Reproductive Respiratory Syndrome vang hian vawk 1348 an thi tawh a. Tunah hian hrileng hi a ziaawm deuh tawh nia sawiin vawk na erawh hmun eng emaw zatah a la awm niin an sawi a. Tunlaia vawk natna hi PRRS bakah classical swine fever te nia sawiin tun dinhmunah vawk damlo 2613 an awm mek niin an sawi bawk. AH&Vety Joint Director Dr. Hmarkunga chuan vawk natna chu Aizawl, Serchhip, Champhai leh Siaha district-ah te a nasa zual nia sawiin hetih lai hian Mamit, Kolasib leh Lunglei district ah chuan vawk damlo report a awm lo niin a sawi. AH&Vety Minister C.Ngunlianchunga chuan March 26, 2018 khan Assembly House-ah PRRS vangin kum 2013 atang khan vawk 8505 an thi tawh niin a sawi bawk.

Aizawl veng pakhata vawksa sat thin chuan tunlaia vawk hrileng a awm atangin hralh a har hle tih Zalen a hrilh a. “Ni dangah chuan Inrinniah hian vawk 2/3 te hi kan sat zo thak thak thin a, chumai ni lovin a chang phei chuan hauh lawk an awmin an inchuh deuh hial a; mahse, tunah erawh chuan vawk pakhat tihral pawh a har a, chawlh rih hial kan tum a ni,” a ti. Vawksa sat thinte chuan ni dang zawng aiin tunlai hian vawk man pawh a tlawm tih an sawi a; mahse, hralh a kal loh em avangin an lei ngam lo tih an sawi bawk.

Vawksa rep zuar thin nu pakhat chuan vawk sarep chu hralh zeuh zeuh mah se ni dang an tluk lo hle niin Zalen a hrilh a. Ar zuar nu pakhat chuan ni dang zawng aiin an hralh tha tih a sawi a. Bawngsa zuar pawhin an hralh zo hma nia sawiin ni danga nileng an thutpui thin chu tunlai chuan chawhma ah te an hralh zo thin niin an sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?