Feature: No plastic – A thlakna lam sawi tam

Kan chhehvel polythene leh plastic-in a tihbawhlawh kan sawi tam ta hle mai, kan khawpui depa luang Chite lui pawh chhan ngai khawpin kan dah ta hial a. Ram a ti chereu a, kan vei! nungchaten an tuar kan ti, kan tawrhpui! Mahse polythene/plastic thlakna lam erawh a veitu vek te hian an la sawi tam lo nge ni? Forum hi kan lo la pe tlem cheu zawk?

Aizawl Municipal Corporation-in a buatsaih ni 2 awh ‘No Plastic Exhibition’, Assembly Annex-ah plastic tel miah lo ni tin mamawh bungraw chi tam tak phochhuah a ni a. Hetiang siam thin entreprenuer 20 chuangten an siam chhuahte chik taka han thlek chuan hma kan lo va sawn thui tawh si em, chutah an la tel kim lo mah mah. A thenin ruai thleng, no, changel atanga siam fian an phochhuah laiin paper bag, hun mawi, tar mawi leh inchhung cheina chi hrang hrang a tlar tiar tuar a. “Plastic chi hrang hrang thlakna tur ni tin mamawh hi Zofate hian kan lo va siam hnem tawh em tih lam hi kan sawi tlem zawk mai a ni” tiin ka ngaihdan ka sawhsawn ta mauh mai.

“Kum 3 kalta khan bul kan tan ve rawih a, paper bag kan siam ber a, order hi kan pe seng lo. Aizawl dawr hrang hrang, thuamhnaw dawr, restaurant, clothsline, online shopping te hman tur leh bazar nana hman thin bag te kan siam ber a,” tiin Eco Save ho chuan an sawi.

An stall banga paper bag an tar tlar Mizorama brand hriat hlawh tak tak Top Chef, Vakira, Red Pepper, Go shopping te chu mit sir mai pawhin an lang thei a, a dang pawh an tam mai. Rin phak bakin he entrepreneur hian hma a lo nasa tawh hle mai. Hriatpuitu ka lo ni har lutuk hi a zahthlak rum rum thei alawm le!

A piah lawkah chuan Bee Crafty leh Peace Home ten bu an lo khuar a, an hming an pu zo ngei e. An kut themthiamzia a lang a, mawi tak takin bag, knapsack, pangpar khawina leh eng ilo han thiahna mai tur chi te an ngah ngiang mai; nula tlangval te thilpek inhlanna chi tih hriat nghal larh te chuan mit a la hlawm hle mai.

Stall pakhatah chuan changela siam thleng, khuhhriang bakah fian te chenin an lo hung ruih mai a, Mizoram Organic Industry nghaktu nu chuan an hmalaknate TV-ah a lo ‘play’ dum dum bawk a. “Raw material atan changel kan lei a, thleng siam nana a kan hman bang a them chu fian siam nan a hmam leh theih a, hei hian thleng man a tihhniam phah a. Chumi hnua a nawi la bangho chu rawt dipin lei tha atan a hman theih tih kan hria a, chumi atan chuan hma kan la leh mek bawk a, engmah paih a awm thei lo,” tiin a sawi bawrh bawrh a. A hmelah a tuichilhna chu thup zawhrual a ni lo va, ‘Tawih thei chu tawih theiah’ tih a tuichilh hle. MOI te hian Bilkhawthlirah khawl an dah nual tawh a, inbun belh zel an tum bawk a ni. Stall thenkhatah Self Help Group hmuh tur an awm nual a, kawng thui tak zawh tawhtute an ni a, an kal zelna turah duhsaktu an ngah khawp mai.

Kum 10 chuang lai chu Serchhip lam hian changel atangin in chhung cheina, hun mawi, file holder leh sekrek atana tangkai buaipuitu an lo nei tawh a, Papyrus te hi inhmelhriattir ngai niin an lang lo. Thawnthu erawh an lo nei. “Kut lawnga siam kan nih avang hian kan siam chak thei lo va, khawl kan nei lo va, nei ila kan production a pung ang a, hna nei lote tan pawh hna kan siam belhsak thei ang,” tiin an lo sawi bawk. ‘Thluak thiam thil’ nei chawikan tumtu sawrkar nen hian an la inhne fuh chiah lo a nih hmel a. NEDP lam pawhin an thawm an hre tawh a nih pawhin lo hriat nawnsak leh se la tiin thahnem ka’n ngaihpui teh ang.

‘Plastic hi kan chhiatpui mek a ni tih kan sawi rual hian a thlakna tur hi kan hnampui thahnemngaiten an siam chur chur tawh a, intih hmuh zel ang u, tichuan ram rawng kan bawl a ni mai,’ tih hi kan thunawn tur chu a ni dawn lo’m ni tiin Sunday chibai vek u le.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?