Feature : OPD Online Registration

Phai lam damdawi in lianah chuan damloten doctor an hmuh hun tur leh an hmuh turte ruat lawk sa vek a ni thin a, hetianga ruahmanna fel tak a awm avang hian Vellore a ni emaw, damdawi in lian dangah chuan hun khawhral lovin damloten an doctor-te a hun takah an hmu thin a. Hun leh tha bakah sum tam tak kal ral tur a ven theih avangin damlo leh anmahni buaipuitute tan a awlsam phah hle.
Mizoramah erawh chuan hetiang hi la kalpui ve theih a ni lo a; mahse, a bultanna atan hun rei tak taka intlara OPD card lak thin a reh theih nan Kolasib damdawiinah chuan kar kalta atang khan OPD online registration chu kalpui tan a ni. He ruahmanna thar chungchanga Zalen palai zawhna chhangin District Medical Superintendent Dr. James RE Mawia chuan tuna an hmalakna chu hun rei tak tak OPD Card la tura intlar thin tihreh tumna a ni ber tih a sawi. An ruahmanna thar sawifiahin, “Damloten rei tak tak card la tura an intlar thin tihbo (Queless) na atan ruahman a ni a, inziahluh chhung hi a rei ber a, tuna kan kalphung tharah hi chuan damlo chu vawi khat a in register tawh chuan number a nei ang a, chu a number hmang chuan a hnu zelah pawh awlsam takin thiltih theih a ni tawh dawn a ni,” a ti.
District Medical Superintendent chuan hetia online registration an kalpui avang hian dan pangngaia OPD card pekchhuah chu an titawp nghal chuang lo tih a sawi a. “Online hmanga registration tihna hi a hma lama tihlawk (advance) a theih chuang loh a, lo tilawk duhte tan pawh zan dar 12 a pelh atang chauhin tih theih a ni dawn a. Online-a registration ti thei lote tan pawh dan pangngaiin OPD kan hawng reng dawn tho a ni,” a ti a. Tuna ruahmanna thar an siam chu mipuiten an la hriatthiam tawk loh avang leh staff indaih lohna avangin harsatna an tawh phah deuh nia sawiin hun lo la kal zel turah erawh mipui ten an chhawr tangkai a rin thu Zalen a hrilh a bawk.
Kolasib District Hospital-ah hian March 2019 atang khan ‘OPD Online Registration’ hi kalpui tan a ni a, hei hi Mizoram-ah chuan a hmasa ber a nih bakah hemi atan hian fund hran a awm chuang lova, thawktuten thahnem ngaihna thila an tih a ni.
Online registration hi Mizoram damdawiin zinga damloten an pan nasat ber Aizawl civil Hospital chuan an la kalpui thei hrih lo a, an kalpui theih loh chhan hi doctor-te transfer & posting-a an kal reng vang leh doctor duhthlan tur, a hun leh hmun te a la awm loh vang niin an sawi.
Phai lam damdawi in liana Online registration an kalpui hi tha hlea a hriat thu phai lama inentir thin damlo pakhat chuan a sawi a. “Inentir tura kan kal hun tur te bakah kan Doctor hman remchan hun turte kan hre lawk vek a. Kal kal hun tur azir khan thlawhna ticket leh tuldangte kan lo tilawk sa vek a, hei hian hun kan khawhral tur tam tak kan hum bakah tul lova pawisa kan sen tur kan hum phah bawk a. Mizoramah pawh hian kalpui theih ni ve se chuan damlo mai bakah a enkawltu ten nasa takin kan chhawr tangkai ngeiin ka ring,” tiin Zalen palai a hrilh bawk.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?