Feature : PMRSSM hamthatna dawng tura thlanchhuahte zingah ‘deprived household’ ni lo tam

ZALEN zirchian danin Ministry of Health & Family Welfare hnuaia scheme thar chhungkaw harsa (deprived household)-ten damdawia an inenkawlna senso an bill theihna tur, Pradhan Mantri Rashtriya Swasthya Suraksha Mission (PMRSSM) hnuaia hamthatna dawng thei tur thlan chhuah zingah chhungkaw harsa (deprived household) ni lo an tam.

Thudawn danin PMRSSM hi RSBY scheme kal mek thlaktu tur a ni a. PMRSSM hamthatna dawng thei tur hi sawrkar laipui siam, Socio-economic and Caste Census (SECC) a chhungkaw harsa tehna (deprived household) atanga tel chhungkuate an ni a. RSBY hnuaia in-register leh thla late an tel thei bawk. SECC hi kum 2011 chhiarpui laia survey neih tawh niin hemi list-a awmte hi central lam atangin sawrkarin PMRSSM dawng thei turah a rawn dah a ni.

SECC list a awm mek te hi tunlai hian veng hrang hrangah ration card thehlut tura tih an ni a. Hemi list-a telte zingah hian chhungkaw harsa ‘deprived household’-a chhiar theih loh tur, sorkar hnathawk leh harsa lem loa lang tam tak an awm a. He scheme buaipuitute zinga mi pakhat chuan ‘deprived household’ ni lo tam tak central sorkar lamin an rawn dah zingah hian an awm tih sawiin chhiarpui laia khawsak harsa han tih dawn pawhin harsa ngai reng reng lo, nupaa sorkar hna tha tak thawk te pawh an awm niin a sawi. “Kan venga thlanchhuahte chu ‘deprived household’ an ni lo vek emaw tih mai tur a ni,” tiin mi pakhat chuan ZALEN a hrilh bawk.

Thudawn danin PMRSSM dawng tur list hi state chhunga lo siam danglam a har tawh a, Ministry of Health & Family Welfare chuan kum 2011 census laia SECC list chu rintlakah ngaiin PMRSSM hamthatna dawng tur hian a rawn dah ta a ni.

PMRSSM hnuaiah hian chhungkaw pakhatin kum khatah Rs. 5,00,000 thleng damdawi ina an inenkawlna senso an neih chuan an bill thei dawn a. He scheme hi August 15, 2018 sorkar laipui chuan tlangzarh a tum a, tunah hian inbuatsaihna a kal mek a ni. Thudawn danin veng tina hamthatna dawng thei tur thlan chhuahte hi Health Worker emaw, ASHA emaw chuan chhungkaw member bihchianna (verification) leh belhchianna an nei dawn a, tunah hian neih tep a ni tawh a, ruahmanna a kal mek a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?