Feature : Ramhlunin thlanmual ruahmanna thar

Ramhlun North YMA chuan January 1, 2017 atang khan thlanmual laih dan thar ruahmanin thlan laih lawk chu an kalpui tan.

Ramhlun North YMA President H. Lalruatliana chuan Zalen palai zawhna chhangin, “January 1 atang khan thlanmual thar kan siam a, a hmun kan lai zawl a, a mual kham zawngin thlan sawm vel feet 3 feet rukin kan lai lawk,” tiin a sawi a. Thlan laih lawkte hi brick-in an rem sa vek tih sawiin, a tuka mitthi chhungten an siam leh ngai tawh lovin peih sa vek a nih thu a sawi bawk.

H. Lalruatliana chuan hnatlangin hun awl remchangah te thlan hi an lai lawk mai tih sawiin heng thlan laih sate hi mitthi an lo awm pawha a hmuna kalte tana a him theih nan thir khawng tha chia khuh vek a nih thu a sawi a. Thlan siam a ngaih tawh dawn loh avangin mitthi chhungte atang hian Rs 4500 an dawng thin tih sawiin, “Senso pangngaiah chuan Rs 5000 atanga 6000 vel sen daih a ngaih thin avangin vengchhung mipuite chuan to an ti lo a, tha an ti hle a ni,” tiin a sawi bawk.

Ramhlun North thlanmual thar hi Zemabawk North field thlangah awmin nikuma Ramhlun North YMA te ruahmanna a he kalphung thar hi siam niin January atanga hman tan turin an lo ruahman lawk nia thu dawn a ni a. Ramhlun North YMA President H.Lalruatliana chuan YMA committee-a tel ve tho Architect 2 leh Engineer 1 ten an plan deuh ber tih sawiin, “Thlanmual enkawltu tur sub-committee kan ruat bawk a, kan tang khawp mai,” tiin Zalen a hrilh a. “Thlan ruahman dan thar awm thin chu tha ka tih rual rualin thlan chei lamah hian kan intlansiak lutuk ang tih a hlauhawm a; mi harsa zawk te tan harsatna kan siam ang tih a hlauhawm,” tiin a sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?