Feature : World Cup fever

The greatest show on earth’ tia an vuah mai World Cup football chu khelh mek a niin a hmawr bawk a ni dawn hnai ta a. Mizote hi football ngaisang leh tuichilh hnam kan nih angin hmun hrang hranga titinaah pawh football chuan hmun laili ber a chang hrih.

Zalen palaiin a kawm kualnaah Aizawl khawpuia TV dawr hrang hrangte chuan world cup kaihhnawihah hian an thilzawrh chu hundang aiin an hralh tha zawk tih an sawi a, TV leitu zingah hian Aizawl khawpui chhunga mi chu a tam zawk an ni tih an sawi bawk. TV zuartu hrang hrangten tum dang aia an hralh that thu an sawi lai hian TV zuar pakhat erawh chuan an hralh that lem loh thu a sawi a, “Khawchhak lam atanga TV lo lut zuartute hian hmun hrang hrang fangin an thilzawrh hi installment-in an pe zung zung zel a, hei vang hian inhralh a harsat phah niin ka hria a ni,” a ti.

Sport bungraw zuar dawr hrang hrangte pawhin ni dang ai chuan football, boot leh jersey an hralh ziaawm deuh niin an sawi a. Jersey zingah Brazil jersey chu an hralh tam ber a ni tih sawiin France leh England pawh an hralh ve nual niin Zalen an hrilh a. Jersey zingah hian Neymar (Brazil) jersey chu hralh kal ber niin an sawi bawk.

World cup football hi zanrei lama khelh anih thin avangin a tuipui te chuan zan rei tak tak an nghah a ngaih thin avangin zing thawh a harsa a, hei vang hian tum dang ai chuan zingkar a reh rei niin mi thenkhat chuan an sawi. Aizawl khawpui kawngsira thingpui zuar thin pakhat chuan, “Tunlai chu ni dang aiin dawrtu kan nei tlem zawk a, kan customer tam tak hi zan lama inkhel en thin an nih vangin zingah hian an tho thei meuh lo niin ka hria,” tiin Zalen a hrilh bawk.

Tunhma lam world cup aiin ngaihhlut a hlawh tawh lo deuh nia sawi chungchangah football tuipuitu pa pakhat chuan, “Tun hma Mexico 1986 te, Italy 1990 leh a dangte hunlai kha chuan Aizawl-ah pawh TV nei an la tlem a. A nei chhun inah khan kan punkhawm a ngai thin a, tan lam inang lo tak tak te kan nih avangin enho kha a nuam a. Mahse, tunah chuan chhungkaw tin deuhthawin TV kan nei ta a, mahni inlumah kan en ta deuh vek mai a, hei hian boruak a tidai ta deuh niin ka hria a, mahse football erawh hi chu Mizote game ngaihhlut hlawh ber chu a la ni zel niin ka hria,” a ti.

Kumin world cup-ah hian football thiam ram zingah Mizo mipuite tan zinga mi Germany, Argentina leh Spain te chuan beisei an phak lo deuh a, Zirtawpni zan atang khan quarter final khelh tan a ni a, a hma zawng aiin entu mipui an tam a, zan lamah pawh thawm a tha tan hle.

 

 

 

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?