Feature : Zir san leh jail chhuah hma

India rama a ti hmasatu ni turin Maharashtra sawrkar chuan tanina tang mekte an chhuah hma hret theihna turin ‘zirna’ an tawktarh.

He prison education system thar tur hi tanina lehkha zir tha leh duhte tan a ni a. Hetah kalphung thar hnuaiah hian miin tanin atangin pawl 10 a pass chuan ni 5 in an tan hun pawhtawi sak a ni dawn a. Hetiang chiah hian degree course (BA, B.Sc, B.Com leh a dangte) an pass chuan ni 15-in a tan hun tihtawi a ni dawn a ni. Degree course hi First ah an pass chuan ni 20-in an tan hun tihtawi a ni dawn bawk.

Chutiang zelin Post-graduate course (MA, M.Sc, M.Com leh a dangte) an pass chuan ni 20, a class sang bera an pass chuan ni 25. M.Phil emaw Ph.D an chhunzawma an hlawhtlin phei chuan ni 20 dang belh leh a ni dawn a ni.

He kalphung thar hi Maharashtra state Home department chuan an pawm tawh a. Maharashtra chhunga tanin 54 ah leh high security central jail 9-ah hman a ni dawn a, Prisons department-in an kalpui dawn a ni.

Tan in hotute chuan he kalphung thar tur hi jail system tihchangtlunna tur ringawt a nih loh thu leh tanina tang mekte rilru puthmang tih dikna leh tih changkanna tur a nih thu leh hei hian anmahni chauh ni lo, an chhungkuaah pawh nghawng tha tak a neih dawn thu an sawi a ni.

India ram hmun hrang hrangah zirna ina lehkha zir theihna hi chu kalpui a ni deuh fur a. Mizoramah pawh IGNOU in an kalpui mek a; nimahsela, Mizoram prisons hotute chuan lehkha zir duh an awm hleithei lo niin Zalen an hrilh. State hrang hrangte tih ve atan pawh a sulsutu Maharashtra sawrkar kalphung thar hi thil tha tak niin a lang a. Tan chhung tihtawi nana zirna tawktarh hian lehkha zir duh pawh a hma ai chuan a tihpun ngei a rinawm.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?