Feature : Zirlaite leh zuk & hmuam

Mizoram sawrkar chuan zuk leh hmuama thalaite an fihlim zawkna atan NEDP hnuaiah Project Himna-MADAT (Mizoram Against Drugs, Alcolhol and Tobacco) tih hming chawiin hma a la mek a. He hmalakna hi Aizawl district-ah kalpui a niin district dangah pawh a tul anga kalpui chhoh zel tum a ni a, Aizawl district-a he project kalpui hna hi Aizawl DC kaihhruainain neih chhoh mek zel a ni.

Project Himna-MADAT hnuaiah hian Middle school 50 thlan chhuah bik neiin zirchiangtu tur Research and Documentation Sub Committee siam leh a ni a, committee hian school hrang hrangte hi uluk taka zirchiangin an hmalakna hi an zo tawh a. Zirchianna atanga a lan danin zirlaiten ruihhlo zinga an tih langsar ber chu ‘Vaihlo’ a ni tih an hmuchhuak. Mi thiamte chhut danin India mipuiin thla khata zuk leh hmuama an senral chu Rs. 12.21 vela chawhrual a nih laiin Mizoram mipuiin thla khata zuk leh hmuama sum senral chawhrual chu Rs. 103.62 a ni a, India ram state zingah a sang filawr hle.

Zirchianna atanga a lan danin ruihhlo zinga zirlaite tih tam ber chu vaihhlo niin mei zu tawh hi 20.4% an awm a, zu in tawh 7.1% awmin ganja zu, heroin hmang leh damdawi ei engemaw zat an awm tawh bawk. Zirchianna atanga a lan danin naupang ruihhlo khawih/ti zinga 85.8% te chu an chhungte ruihhlo eng emaw ber tite an ni tih hmuhchhuah a ni a, 53% chuan ruihtheih thil ti thiante an nei bawk. Ruihhlo ti thin zingah hian private school aiin sawrkar school te an tam zawk tih hmuhchhuah anih bakah chhungkaw pangngai aiin chhungkaw kehchhia (broken family)-ah an tam a, hei mai bakah chhungkaw khawsak harsa zingah ruihhlo ti an tam zawk tih hmuh chhuah a ni. Zirchiangtute chuan zuk leh hmuam laka naupangte an him zawknan nu leh pa, zirtirtu, khawtlang leh kohhran tanrual a ngai tih an sawi a. Ruihhlo that lohzia chu kohhran hruaitute pawhin tun aiin puangzar tam se, a bik naupang lamah uar zawka a thatlohna zirtir nise an ti a. Naupangte an fihlim theihnan nu leh pa leh zirtirtute chu filhlim se tha an tih thu an sawi bawk.

Project HIMNA-MADAT hi June 21, 2017 khan Chief Minister Lal Thanhawla chuan a hawng a. Coordination and Implementation Committee chu February 27, 2018 khan din a lo ni tawh a, Aizawl DC chu chairman niin Research and Documentation Sub-Committee hi April 19, 2017 khan din niin IASE Principal Dr. Lalnuntluangi chu chairman a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?