Fiangpui-ah PCI Inkhawmpui

Aizawl; Kum khat dana neih thin, Presbyterian Church of India inkhawmpui lian ber, Biennial General Assembly Vawi 43-na chu Nilaini zan atang khan Fiangpui Presbyterian Church, Halflong (Biateram Synod)-a neih mek a ni a, zanin hian a tiak dawn a, Mizoram Synod atang pawhin palai thahnem tak an kal.

Mizoram Synod aiawha palai tura ruatte hi Nilaini zan khan Fiangpui panin Aizawl an chhuahsan a. Mizoram Synod atanga palai turte hi Ministers/Pastors – 309, Pro. Pastors – 47, Kohhran Upa/Kohhran Hmeichhia & KTP aiawhte – 221 te bakah Mizoram Synod Choir – 26 te an ni a, an vaiin mi 603 vel an ni.

Mizoram Synod atang bakah hian a enkawl, Barak Area leh Manipur Administrative Area atangin palai eng emaw zat an kal a. Bus 20 leh motor tê 17 velin an kal a ni.

PCI General Assembly hi kum khat dana neih thin a ni a. Kumina an thupui tur chu “Nunna Eng” (Light of Life) tih a ni a. Rev. Lalramliana Pachuau (Mizoram Synod) chu Moderator Elect a ni a, Moderator tanglai mek, Rev. Laldawngliana (Manipur Synod) hnen atangin Moderator mawhphurhna a la ang.

Mizoram Synod atangin Rev. Dr. C. Lalhlira (ATC Principal) leh Rev. H. Remthanga (Ex Moderator, PCI) te thuchah sawi tura ruat an ni a, Rev. Dr. K. Lallawmzuala (ATC & Leader, Central KTP) chu Bible Study zirtirtu atan ruat a ni bawk.

Moderator thar, Rev. Lalramliana Pachuau hian vawiin zing dar 7:00 inkhawmah Lalpa Zanriah Sakmen a theh ang. Mizoram Synod Choir chu inkhawm tum 4-a zai tura ruat an ni.

PCI Biennial General Assembly hi Mizoram Synod-in tum hnih thleng tawhin kum 2004-ah Dawrpui Kohhran (Aizawl)-ah leh kum 2012-ah Champhai Vengsang Kohhranah te nghah a lo ni tawh a ni.

Puipate:
Moderator : Rev. Lalramliana Pachuau, Mizoram Synod
Secretary (Sr.) : Rev. B.B. Lamin, KJP Synod Mihngi
Secretary (Jr.) : Rev. H.L. Marsing, Ri Bhoi Synod
Treasurer : Rev. H.N. Wallang, KJP Synod Mihngi
Statistician : Rev. Lalsangloma, Biateram Synod
Administrative Secretary te : 1) Rev. V.L. Luaia Hranleh, Mizoram Synod, 2) Rev. G.S. Lyttan, KJP Synod Sepngi, 3) Rev. Rolianthanga Lalsim, Biateram Synod

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?