Fire Hydrant 144 bo tawh

Aizawl: Kangmei a chhuah palha kangthelhtu lirtheiin a thlen phak lohna hmuna pipe vuah maia kangthelhna atana hman tur, Public Health Engineering Department-in an vuah Fire Hydrant chu report thar berah 144 ruk bo a ni tawh.

PHE hotute chuan Zalen zawhna chhangin fire hydrant bote hi Aizawl chhung veng hrang hrangah a ni a. PHE section hrang hranga fire hydrant bo zat hi Bawngkawnah 6, Zemabawkah 8, Durtlangah 2, Ramhlun North-ah 13, Chaltlangah 7, Laipuitlangah 28, Booster-ah 5, Luangmualah 12, Chhinga Vengah 3, Mcdonald Hill-ah 5, Babutlangah 2, 7th Day Tlangah 5 te a ni a. Heng bakah hian Maubawkah 1, Mission Vengah 5, Tuikhuahtlang I-ah 3, Tuikhuahtlang II-ah 16, Dawrpui Vengtharah 4, Khatlaah 1, Bethlehemah 13 leh Armed Vengah 5 te a ni.

Fire Hydrant hi chi hnih a lian leh a tê a awm a. A lian hi motor lianin kangmei a chhuah palha tui a chawina tura ruahman niin hmun lailiah a awm a, a bo ve lo tih PHE hotute chuan an sawi a. Bo ho chu a tê chi vek a nih thu an sawi bawk.

Fire hydrant bo hi pipe vuah luhna tur bâwk a ni a. Hei hi dar atanga siam niin rukrute hian hralh lehah an ru ni bera an hriat thu PHE hotute chuan an sawi. A bo duh em avangin tunah hian an vuah sa thenkhat pawh an thlawn leh niin Zalen an hrilh bawk. PHE hotute chuan a tê chi chu kangthelhna lirtheiin a thlen phak lohnaa tangkai taka hman tura ruahman a nih laiin ruk a ni zel chu pawi an tih thu an sawi a. A bo loh nan nghet taka an welding-tir pawhin a bo tho tih sawiin Local Council leh YMA bakah an vuahna bula chengte pawh venpui turin an ngen thin a, a bo reng tho niin an sawi.

Fire hydrant hi pakhat Rs. 3,495 man a ni a, bo zawng zawng hi Rs. 503,280 man a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?