Formalin hmanga sawngbawl sangha thuchiang awm har

Bazara sangha zawrhlai te chu chemical hlauhawm tak formalina sawngbawl nia sawi a nih avangin tunlai hian sangha hralh a har hle a. Health Department lam chuan sangha hi test turin an buaipui mek a, forensic department lam pawhin sangha chu tlem a zawng endik tawhin fomalin an hmuh loh thu an sawi rualin mipui fimkhur hle turin an chah bawk a ni.

Thla chanve aia rei liam ta khan Manipur leh Nagaland chuan sangha formalin-a sawngbawl hmuh chhuah a nih avangin state pawn atanga lakluh a khap bur tawh a. Nimin thleng khan Odisha ah he bawlhlo hi sanghaah hman a ni tih finfiah a ni tawh a, Assam leh Goa lamah pawh finfiah a ni tawh bawk a ni. State eng emaw zah an din avangin Tamil Nadu pawhin sangha ei tura zawrh enfiah beihpui a kalpui mek a ni. Hemi atanga lang chiang ta chu he bawlhlo a sawngbawl sangha hi Hmarchhak state-ah chauh ni lo khawmualpui lamah pawh buaipui a hlawh tawh hle tihna a ni a, Mizoram dinhmun pawh hi uluk taka enfiah thuai thuai a pawimawh hle mai.

Hmarchhak sangha tam tak hi Andhra Pradesh leh Odisha atanga lo lut nia sawi a ni a, kan state thenawm sangha lama kan intodelh loh pui te pawhin heng hmun atang hian an lalut nasa tih a hriat theih a. Heng state te hian kar hnih/thum liam taah hma an la thei tawh a, kan state thenawmte hetiang dinhmuna an din tawh hnu pawha sangha lakluh a him leh him loh chungchanga thuchiang la awm thei lo hi chu thil nihphung tur niin a lang thei lo a ni. Keini lam hi kan muang deuh em ni a tih rum rum theih awm e. Hmalakna mumal sawrkar lam atang hian a awm mai lo bawk nen puanzar tur a awm lo a ni mahna.

Food safety lamah hian Mizote hi kan la hnufual phian a, kan inthuamna en hi chuan thil thianghlim leh hrisel tak tak eia in bawk kan nih duh hmel lai hian kawngkama sa zawrh, bawlhhlawh leng velin a bawm ngaihtha taka ei thei kan ni leh lawi a. Eitur infun khawi rama siam nge tih pawh hriat loh, a ziak pawh eng tawng nge hriat loh thlengin fate thlengin kan pe zel mai chu a nih hi.

A eng pawh chu nise bazaar-a ei tur zawrh a bikin hmun dang atanga lakluhte hi Sawrkarin tehfung a neihsaah hian an tling em? tih hi enfiah fo ni thin sela. Sangha chauh ni lo sa dang te pawh a khat tawkin endik fo ni sela, tlachawp rorel lo deuh hian kalpui nise a duhawm hle mai.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?