Global Youth Day hman a ni

Aizawl: Khawvel puma Adventist thalaite chuan nimin khan midangte tana luanchhuahna ni Global Youth Day an hmang a, he hunah hian thalai maktaduai 10 chuang che chhuaka ngaih a ni. Global Youth Day-ah hian Biak In chhunga sermon ngaithla loin, mahni ngei che chhuaka, kan nun hmanga sermon ni turin thalaite an che chhuak a, thupui atan ‘Be the Sermon’ tih a ni.
Mizorama adventist thalaite pawhin Mizoram hmum hrang hrangah he hun hi an hmang a, Lunglei Adventist Youth Federation te chuan Bethel Centre tlawhin program an hmanpuia buhfai bag eng emawzat an pe a. Chawhnu lamah Bazar Biak Inah Joint Fellowship an hmang. Thenzawl AYF te chuan khualzinte hnenah ei tur leh in tur an sem a. AYF Kolasib Branch chuan Hospital tlawhin blood donation camp an buatsaih a, AYF KLS Branch chuan Refferal Hospital tlawhin, khualzinte tan in tur leh ei tur an sem a. Hetiang hian Mizoram chhunga AYF Branch 14-te chuan an awmna hmun theuhah mi dang tan an che chhuak a ni.
Aizawlah chuan AYF Aizawl East leh West te chuan a huhovin program an hmang a. Zingkarah Hmangaihte Run, Sunshine Children’s Home, Muanna In, Jeriko Khualbuk De-addiction Centre, Samaritan Riangvai Run, Gan Sabra, leh Old Age Home te tlawh a, tanpuina an pe a. Hei bakah hian tanpuingai thlanchhuah te tanpui niin Dinthar kawnah free check up neih a ni.
Global Youth Day hi kum 2013 atang khan Youth Department, General Conference of Seventh-day Adventist, Michigan, USA kaihruaina hnuaiah khawvel pumah hman tan a ni a. Mizoram a Adventist thalaite pawhin kum tin thalaite luan chhuahna hunah an hmang thin a ni.
&&&&&&&&

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?