Goal hniha hum zo lo Aizawl FC

Aizawl FC ngam lo Martins Inkhelh a zawh meuh chuan mual chhungah Aizawl FC player pakua chiah an bang tawh a, goal hniha hma an hruai hman team hian tawn hriat an ngah tawk loh an tuar a, East Bengal striker tawn hrat ngah ranti Martins chuan he inkhelah hian goal thum an thun a, mual neitu team lam hi 2-3 in an tlawm.

Emmanuel Chigozie chuan a chipui Martins a tih tluk hnuah Aizawl FC an talbuai tan a, he Nigerian defender hi red card pek niin penalty a chawi a, he penalty hi Martin chuan an inkar tih zim nan hmangin mikhual team lamin inkhel an thunun zui a, a awmna tura hria Nigerian striker hian minute 86 leh 89-ah te thun belhin hat-trick a siam a, tun hnaia khual muala talbuai Kolkata team chu kawng dik a zawhpui. He inkhelah hian first half-ah chungnung zawk han tih tur an awm loh rualin mual neitu lam chuan ball an chang hnem zawk a, a pumpuiah erawh si phur rei zawk East Bengal an chungnung a, ball pawh an inpe kual hnem zawk.

Jahar Das chuan Mumbai an draw tuma khel pali la chhuakin Soram Poirei, Brandon VL Remdika leh Lalbiakhlua bakah lakluh thar Joel Sunday ten bul an tan a, ZoThanmawia, Albert leh Lalmuankima te chu an fit tawk loh avangin khelh tir an ni lo. Mikhual lam hian bul tan tha zawkin a tir lamah Soram Porei tum hnih an chhin a, a tir lamah hian chance an nei nual ve ve. Aizawl FC lamin minute 20 naah an hun tha neih an hmang tangkai a, Brandon Vanlalremdika chuan Japanese midfielder Yuta Kinowaki leh Alfred Jaryan te thawhrah sengin an hmahruaina goal a thun a, hei hi Barreto chuan lo khawih fuh mah se, a dang zo lo. darkar chanve vel an khelh tling tihin Luis Barreto hian Lalbiakhlua pet tha tak chu a dan sak a, East Bengal si hnih phur tur lakah an him hram a, Aizawl lam hian hun chanve hmalamah hi chuan inkhel an thunun a, mahse, goal dang lut lovin chawllawk an hmang.

Inkhelh thawh hnihnaah inkhela a tang lawk lo a, Mama lakchhuah a nih dawnin mipui lamin mawi takin an thlak a, Bikash Jairu a rawn lut. Aizawl FC lamin hun rei lo te hnuah an hmahruaina an belhchhah a, Chullova ball pek tha zet chu Yuta Kinowata chuan goal-ah a chantir a, Japanese midfielder ball pet tha zet hi Barreto tan man hman a ni lo.

Minute 67 na a rawn inherchhuak a, Nigerian defender Emmanuel Chigozie chuan a chipui Ranti Martins a tihtluk avangin penalty a chawi a, ani hian a penalty pet hi chhui lutin Poirei a ni lo lamah a dive. East Bengal hian tam zawk an nihna an hmang tangkai chho a, hun tawp hma minute 5 vel la awmah Martins hian Mama thlaktu Jairu ball pek tha zet mai chu chiang zetin a tauh lut a, 2-2 in an inhneh tawk. Minute hnih hnu lekah East Bengal lam hian an chakna goal an thun a, Martins bawkin a thun a, Mohammed Rafique-a ball pek tha zet mai chu goal ruak deuh thaw-ah a thun. Minute 90 vel a ni tawh a, Chullova chuan Martins-a tlu chu pawmsawn tumin hma a la a, hei vang hian buaina te nau a chhuak a, a bul tumtu Chullova chu he match-a a vawi hnih nan yellow card pek niin hnawhchhuah a ni a, hei hi mipui lamin ngaithiam lovin mual chhungah bottle ruak te an vawm lut hial. Ranti Martins hian tun season-ah goal 11 a thun tlin g ta chiah a, hmahruaitu Mohun Bagan chu point hnihin an thlau a, anni hian vawiin-ah Mumbai FC chu Kolkata-ah an mikhual ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?