GST Commissioner hmu dawn

Aizawl: Naktuk hian Mizoram Merchant Association (MIMA) chuan Goods & Services Tax (GST) Commissioner, Government of India, Aizawl Mizoram chu an office Upper Khatla ah hmuh an tum a. Central GST Act, 2017 hnuaia registration Mizote tana him tura kalpui a nih theih nan ngenna siam an tum.

MIMA President PC Laldinthara chuan Central GST Act hnuaia pawn lam mi registration ti tur an awm chuan ILP nei lo chu lo approve lo turin an ngen dawn niin a sawi a. Mizote chu British sawrkarin kan ral mai loh nan ILP siamin min humhalh tlat tih sawiin Mizoram-a sumdawng tur ten ILP kum hnih dam an nei tur a ni tih Mizoram GST Act, 2017 a awm chu Central GST Act, 2017 ah awm lo mahse pawn lam mi registration ti tur te chu ILP an neih loh chuan lo approve bik lo turin kan ngen dawn a ni.
Hemi chungchang hi Zalen chuan zirchianna a lo nei tawh a. Mizoram GST Act, 2017 in a phut dan chuan hnam dang sumdawng duh an awm chuan kum 2 dam Inner Line Permit (ILP) an nei ngei ngei tur a ni tih a ni a, hei hi Central GST Act, 2017 hnuaia in register tur te tan erawh ngai lo thung. Hetih lai hian GST registration ti tur te dilna hi internet kaltlanga tih a ni a, portal ah a hlawma lutin Mizoram sorkar leh Central sorkar in registration a tihsak tur te hi khawlin a lo sem mai thin a ni.

Central lam tih tur leh State sorkar tihtur chu khawl hmanga thliar hrana pek chhuah a nih avangin ILP nena registration tih ngai hnam dang sumdawng in dilna a thehluh kha Central lam buaipui turah a kal palh a nih chuan ILP tel lovin awlsam takin GST registration a ti thei dawn a ni.

Hemi bakah hian GST a registration dilna reng reng hi ni 3 chhunga tihfel sak an nih loh chuan khawlin amahin automatic in registration a lo ti dawn bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?