Guwahati-a NGO zinte’n Aizawl lo thleng leh tawh

Aizawl: May ni 28,2017 zana Downtown University-a Mizo zirlai pahnih C.Lalhmangaihsanga leh R Lalmalsawma te thihna chungchang chhuichiang tura zin NGO Coordination Committee aiawh te chuan Assam Chief Minister leh mi pawimawhte an kawm hnuin nimin khan Aizawl an lo let leh.

NGO Coordination Committee hruaitu mi 6 te chu June ni 6,2017 (Nilaini) khan Guwahati ah kalin Lunglei tlangval 2 te tualthihna chungchangah Assam Chief Minister Sarbananda Sonowal, Inquiry Commission Chairman Ajay Tiwari leh Railway SP te an hmu a. Heng mi pawimawh an hmuhte hnenah hian Mizo tlangval pahnihte thihna a hmuna an enfiah chungchang leh an rin dante sawiin, mi pawimawh an hmuhte hian tha takin an lo dawngsawng hlawm a ni.

Joint NGO hruaitute hian Zirtawp zan dar 7.30 khan Assam Chief Minister Sarbananda Sonowal chu a chennaah an hmu ve leh a, Joint NGO hruaitute hian Assam Chief Minister hnenah hian, Downtown University zirlai Mizo tlangval pahnihte thihna chu chak tak leh dik taka chhuichhuah thuai a nih theih nana hma laksak tura ngenna Representation an thehlut nghal a. Assam Chief Minister chuan thudik hailan a nih theih nan theihtawp chhuah an tum thu a lo hrilh a ni.

Joint NGO hruaitute hian Zirtawpni khan tualthihna chungchang chhuichiang tura din Inquiry Commission Chairman Ajay Tiwari, IAS, Assam sawrkara Principal Secretary chu a office ah Mizo tlangval pahnihte thihna chungchang chhui hna a chak thei anga kalpuia thudik hailang ngei turin an ngen a. Ajay Tiwari hian Downtown University zirlai Mizo pahnihte thihna chungchang a hriat leh sawi duh nei apiang ten a hnena an sawi theih nan chanchinbu kaltlangin public notice siam nghal a tum thu a lo hrilh a ni. Zirtawpni vek khan Joint NGO hruaitute hian he case chhui tura ruat Railways SP chu an hmu bawk a, SP hian nimin June 10, 2017 khan thihna thlenna hmunah kal leh a tum thu leh information awm thei ang ang lakkhawm nghal a tum thu a sawi a ni.

Mizo tlangval pahnihte tualthih chungchanga Guwahati a kal Joint NGO hruaitute hi Central YMA atangin Lalbiakzuala, President leh General Secretary Lalhmachhuana; MZP atang in President Lalsangzuala Ngente, MSU atangin President RB Lalmalsawma leh Treasurer T.Nengkhansut, NESO atangin Finance Secretary Ricky Lalbiakmawia te an ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?