HA NEI LO SEH HI A NA A NIA, FIMKHUR HLEEE RAWH!

Kan lo sawi lawk tawh angin tunlai hian zu avanga harsatna nei, damlo an tam chho leh ta hle mai a, Krismas effect te pawh ani thei awm e. Patling nutling zu in ching dawk lak hi “Nghei rawh” in tih ngawt theih ani lova, tlin lo chung chung pawha khulh lui hram hram hi an thahnem phian mai. Zu kan thlah zalen vang han tih ngawt theih ani chuang lova, a chhan pawh an khap lai khan zu vanga harsatna nei hi tam tak an awm tho a, mahse khap laia brand nei thei lo leh a remchang chang in ngawt lovin tunah chuan brand nei bika zu in te pawh an awm ta a. Eng research mah chu la ti hranpa lo mah ila (midang pawh hian an la ti lem lo emawni) zu khap lai khan zu in rau rau an thin a sawng (Cirrhosis) hma deuh em aw a tih theih. Tunah thung chuan an inzat (quantity) tam luat vanga insawiselna nei an ni mah ang em tih te pawh ngaihtuahna ah chuan a awm deuh bawk. Engpawh nise, kan sawi tum chu zu in lo thei lote tana in dan mumal deuh zawk ani mah a, tangkaipui in lo awm takin tih vang leh, zu in nasat vanga damlohna te a lo tlem phah beiseiin tun issue-ah chuan he ha nei lo kawmngeih thiam ngai tak chungchang hi kan theh ang e.

Zu in dan tawk hi thiam a har hle a, chuti chung chuan mithiamte rawtna siam dan tlanglawn ah chuan hetiang hi ni thei se an ti: Mipa chuan kar khat chhungin peg 21 aia tam lo, ni khatah peg 4 aia tam lo ni thei se an ti a. Peg 1 hi an tehna tlangpui ah chuan 60 ml ani. Hmeichhia ah chuan kar khat chhungin peg 14 aia tam lo, ni khatah peg 3 aia tam lo an ti bawk a. Chuan mipa leh hmeichhia ah kar khat chhungin darkar 48 chhung tal taksa insiam that theih nan in loh (dry) ni se an ti bawk. Hmeichhe naupai lai tan chuan in loh hrim hrim a him ber an ti bawk. Hmeichhia hi an metabolism a muan zawk vangin zu hi mipa aiin an haw hma zawk a ni.

Zu in vanga insawiselna emaw damlo kan lo en tam ber hi a chhan lian tak pathum a awm a, chungte chu: Zing zu an in thin leh, Chaw an ei mumal lo leh, taksa a che tlem, an insawizawi ngai lo hi a ni. Zu hi kan taksa a lo dawngsawng tu ber chu thin (Liver) a ni a, hemi avang hian thin tha lo, function buai hi a thlen tam ber chu ani ta reng a ni. Zing kara zu an in ngat phei chuan kawruakin ani tlangpui a, chaw in a pawlhdal loh kha direct takin thin in a lo dawngsawng tihna ania. Zing zu an in ngat tawh chuan chhun lamah an chhunzawm deuh ngei ngei a, thin in a process zawh loh an in tihna a ni a, daih rei ngaihna a awm ngang lo a ni.

A dawt leh ah chuan zu in nasa te hian chaw an ei mumal lo khawp mai. Kaw ruakin an in tam ber a, an taksa mamawh chaw tha an lakluh tlem vangin zu lo neutralize tu a tlem a, thin kha overtime in hna a thawh a ngai a, taksain ei in ha a hmuh tlem vangin vitamin tlakchham a thlen a, kut hmawr ke hmawr mu chuah chuah te hi an nei thuai a, an balance a buai a, chutiang chu kan lo ziah tawh Peripheral Neuropathy, nerve buai vang kha a ni. Chaw ei pangngai anga inngai tam zawk pawh hi an ei in hunbi a buai vang leh chaw chakna an neih nep vangin Malnutrition an nei deuh fo bawk a ni.

Zu in nasa chu taksa insawizawi an thatchhia a, an che tlem a, taksa mamawh physical exercise a tlem vangin harsatna dang a lo awm belh fo bawk. Thisen kal vel a muang a, zu hian thisen zam a tih zau vangin taksa pawnlawi ah thisen a tling khawm a, thisen (BP) sang Hypertension an nei duh hle. Chu bakah chuan zu an in nasat khan an taksa ah cellular dehydration a siam a, “sam a ro duh” an tih fo nachhan te hi a ni a. An zung tlem a, kal a khawih hma thei bawk a ni. Chaw kawng leh pumpui cancer tam tak hi zu in nasat vanga awm a ni fo bawk.
Awle, a chunga kan tarlan atang hian ZU in mi kan nih a, nghei emaw sim harsa kan ti a nih chuan kan taksa tal a him rei theih nan hengte hi zawm i tum phawt teh ang u:

1. Pum ruak/kaw ruakin zu in reng reng loh tur. Chaw ei huaina style hi a hlui tawh a, bansan tur. Zu in chuan hmawmsawm engemaw tal ei hmasak ngei ngei tur a ni. Chuan, chaw thlah loh reng reng bawk tur. Kan ei chak lo viau anih pawhin chhungte ruala ei tum hram hram a tha; mahni a chaw ei chuan ei tui loh a awl lehzual. Chaw ei pawhin hunbi mumal taka ei tum hram hram a him ber a ni. Pum ven nan zan mut dawnah emaw zing thawh veleh kaw ruah laiin Pantop/Omez ang chi te hi ei ila, pum a veng deuh. Chaw ei chakna i nei nep anih phei chuan Multivitamin te pawh ei tel ngei ngei ang che.

2. Zing karah in loh tur….by order. Zing zu i in chuan a dawt leh a chawh ngei ngei a, i nam nileng leh nge nge thin anih kha. Hei hi chu chin loh reng reng tur ani tawp mai. Tlai lam mitthla ran chung khan insang phek la, i thei hrim hrim. Tlai nitlak “four thirsty” hi motto ah nei la i ti fuh ang.

3. Taksa sawizawi hram hram rawh. Office te pawh ke in kal zeuh zeuh la, kar khatah ni 3 tal ke in i kal theih chuan i ziaawm ngei ngei ang. In lamah i awm pawhin mahni inchhungah step a awm te anih chuan step kal kal mai rawh. TV en chunga sofa i belh reng chuan sofa zunzam in a phuar nghet tial tial che anga, i dul a kiar tial tial anga, i mawng a sawng tial tial bawk ang.|

4. Tui in tam rawh. Zan lama zu i in tam phei chuan liter 2 dawn te hi mut hmain in la, i zung teuh anga, i lung leh kal kha i venghim thei deuh dawn a ni. Chutih laiin muttui nan zu in suh. Zu hi muttui na ani reng reng lo….i mut rei pawhin i mut quality a chhe tho tho anga, a tukah i fresh chuang hek lovang. BP check fo la, chi (salt) insum viau bawk rawh. Thei ei tam a tha hle bawk.

Zu ngawl i vei leh vei loh hi chu nangmah aiin i chhungte’n an hre dawn a. Nangmah i lo inhriat ve theih nan leh, zu ngawlvei i ni tih i lo inpawm theih nan mahni in testna a awm a, tunah chuan kan ziak seng tawh lo anga, Internet nei chuan he website pahnih hi in lo hmang tangkai dawn nia. Issue leh ah heng self test te hi rawn tarlan kan tum dawn nia. Cheers to healthy drinking!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?