HAMLET drama audio YouTube atanga dah chhuak turin ngen, Redemption Theatricals in Lallianmawia Pachuau a nek chhuak em ni?

Kum 30 chuang liamtaa drama kha chhuan thar zingah pawh ngainat a la hlawh thei a. Thangthar thiamna leh khawl changkang tak erawh chuan a mawina a phawk chhuak pha zo lo hulhual thung. Hei hi ngaimawhin — Hamlet — drama changtu ‘Redemption Theatricals’ chuan YouTube-a upload-tu hnenah ‘ti bo tih’ turin an ngen.

zalen hamlet

Redemption Theatricals — chan ‘Hamlet’ drama hi YouTube lamah pho chhuah a ni a. An drama hi hriat theih chinah a sound lama inang lo ve ve pahnih pho chhuah a ni a. He YouTube audio pahnihte phei chu a ‘speed’ a inang lo ve ve bawk a. A rang zawk leh muang hret zawk upload a awm niin an sawi a. He’ng YouTube-a awm audio pahnihte hi a nih dan phung tur a phak lo luat avangin Redemption Theatricals chuan khawngaihna ngenin, lak thlak sak turin an ti a ni.

“YouTube-ah kan drama chan kha a awm a, pahnih. Mahse, a sound lamah a pangngai nen khan a inthlau em em a. Thangthar lehzel te’n Mizo mawina, a thlukte thlenga midang kaihhruai kawngah a dik lo zawnga a inher theih avangin, YouTube-a upload kha min lak thlak sak turin kan ngen a ni,” tiin Ignite Studio-a Redemtion Theatricals kawmna hun an neih tumin an sawi chhuak.

Hamlet-a Lalber leh Hamleta pa thlarau lemchangtu C. Rosanga chuan, “A pangngai dik tak zawk chu kawl kan la nei a. A tha zawk leh mawi, fiah fel leh dik zawk chu keini pawhin pho chhuah kan tum a ni,” tiin an sawi bawk.

Mafaa Hauhnar pawhin, “Youtube-a a audio speed sanga an dah hi chu ngaithla lo zawk rawh u, an aw ngaihnobeina leh a drama ngainawmna 10% pawhin a chawi chhuak phak lo,” tiin hemi chungchang hi a sawi chhuak ve bawk a. Ani pawh hi Redemption Theatricals kawmna hun buatsaihah a tel nghe nghe.

Hamlet drama kha kum 1984-a tihchhuah a ni. Khatih hunlai khan Zo rimawi chu ‘Di’ ngaih lunglenna khawvela a chen vanglai a ni a. Kha’ng hunlaia zaimite chuan an audio cassette album te chu ‘market’ lamah an hralh tha viau thin niin an sawi a.
Lallianmawia Pachuau vanglai nanga Hamlet drama cassette-in ‘market’ lama a khum chungchang mipui lam atanga zawhna chhangin Redemption Theatricals chuan, “A hralh sum lam kha kan lo ngaihtuah lo reng reng a. Engzat nge kan hralh a, kan hralhna zat zawng zawng atangin engzat nge sum kan hmuhchhuah tih pawh kan sawi thei lo. Anni chu rimawi lam an ni a, keini chu drama kan nih avangin, khaikhin dan thiam a harsa hle,” tiin pehhel deuhin an chhang tete a! Zaithiam zingah tu ber nge cassette hralh kawnga an khum tih zawhna chu, “Kan sawi thei mai lo. Mahse, kan vannei a, khatih lai kha chuan kan drama khan ngaihhlut a hlawh zawk tih chu kan chiang,” tiin zaithiam hming an sawi chhuak duh lo.

Hetihlai hian, drama an chan lai te leh recording an tihna atana studio an intawmpui zaithiam hming pakhat an lam chhuak a. Chu chu Lallianmawia Pachuau a ni. He zaithiam hming chauh hi Zo rimawi khawvela zaithiam tam tak zinga a hming an lam chhuah awmchhun a nih avangin, cassette hralh kawnga market-ah chiang taka a rorelna atanga nek chhuaka, cassette hralh tam lama an khum hming an sawi chhuah duh lo tak chu — Lallianmawia Pachuau hi a ni thei mai ang em? — tih chu zawhna a ni ta.

May ni 25, 2017 zan khan Ignite Studio chhungah ‘Hamlet’ thlarau chu kaihthawh leh a ni a. ‘Hamlet’ drama changtu — Redemption Theatricals — te leh Mizoram University-a Mizo Department zirlai te, Gov’t Johnson College zirlaite bakah mi dang thahnem tak, thu leh hla lama mi thiam thalai rual te bakah chanchinbua Thalai Huang changtute nen hun hlimawm, chhinchhiahtlak leh tawnhriat duhawm neiin inkawm hona an nei a ni.

‘Redemption Theatricals’ kawmna hi ZONET Cable TV-a Zoram Kalsiam programme enkawltute buatsaih a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?