Harsatna thlentu NLUP: MNF

Aizawl: MNF Party chuan NLUP chu plan fund atanga sem anih avangin mipuite chhawktu aiin harsatna thlentu niin an sawi.

Nimin khan Aizawl Press Club-ah thuthar lakhawmtute kawmin MNF National Core Committee member H.Rammawi chuan, “Kum 2009-2018 inkar chhungin Congress chuan plan fund-a Mizoram sum tur nuai 168,507.71 chu NLUP sum atan an dah avangin matching share tur kan nei lo va, cheng vaibelchhe tam tak kan hmang thei lo a, mipuiin kawng hrang hrangin kan tuar ta a ni,” a ti.

H.Rammawi chuan NLUP atan plan sum dah a nih avangin kawngpui a chhia a, zirtirtu indaih lohna a nasa a, Police ah hnaruak a tam a, sawrkar department hrang hrang ten harsatna an tawk niin a sawi a. CAG report pawhin NLUP chu a hlawhchham a ti nia sawiin, “NLUP atana sum hman zawng zawngte hi matching share-ah hman ni se chuan Zoramin kan thatpui zawk ngei ang,” a ti bawk.

MNF-in sem policy ve tho SEDP kalpui an tum dan zawhna chhangin H.Rammawi chuan, “Plan fund hi a hlawma hmang lovin sum lakchhuah nan kan hmang a, chumi sum kan lakchhuah hmang chuan SEDP hi kan sem dawn a ni,” a ti a. Congress hotu ten NLUP chu a that avangin state dangte pawhin kalpui ve an duh nia sawi chu, “A tha lo aniang, state dang kalpui tum an awm ve lo,” tiin MNF hruaitute chuan Press mite zawhna an chhang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?