HIV/AIDS do lehzual a ngai

HIV/AIDS do lehzual a ngai Kum engemaw zat kalta atang khan khawvel pumah December ni 1 chu kum tin HIV/AIDS dona ni ‘World AIDS Day’-ah hman thin a ni a, thupui hrang hrang neiin hman a niin hei hi HIV/AIDS darhzau zel tur laka mipuite himna tur atana tih a ni. Hetia hmalak mek a ni chung hian hmasawn lam ai chuan a zual/pung telh telh em ni tih mai tur a ni a. Mizoramah ngei pawh HIV/AIDS hi a pung tual tual mai bawk si a, Mizoram State Aids Control Society (MSACS) chhinchhiahna hnuhnung ber March 2017 thleng khan Mizoram ah HIV positive 14632 an awm tawh a, chuvangin tih tak zeta hmalak a ngai ta.

AIDS vei an hmuhchhuah hmasak ber chu kum 1981 ah khan a ni a, India ramah kum 1986 ah an hmuchhuak leh a, Mizoramah chuan kum 1990 ah hmuhchhuah a niin kum 30 em pawh he natna in Mizoram a la chenchilh hma hauhvin mi 1200 chuang he natna thihpui kan awm hman der tawh a. Hengte hi chhinchhiah chin chauh an ni a, chhinchhiah lova thi nen phei chuan a tam dan tur hi ngaihtuah ngam pawh a ni awm love. Mizoram ah chuan HIV/AIDS kaidarhna tam ber chu mipat hmeichhiatna hman dikloh vang a ni a, mahse tunhnai maiah damdawi hmansual vangin a darh nasa hle tih hmuhchhuah leh a ni a. Kan hma hun zel ngaihtuah chunga tih tak zeta hma kan lak loh chuan Mizoram hi kan tu leh fate tan chenna tlak lovah kan siam mai tih a hlauhawm a ni.

Mithiamte sawi dan chuan Mizorama HIV/AIDS vei tam ber te hi kum 25-44 inkar an ni a, hemi awmzia chu thalai, hnathawk thei zingah a hluar hle tihna a ni a. Hetiang zela kan ram a kal chuan kan economy thlengin a nghawng dawn tihna a ni a. Tun dinhmunah phei chuan hmarchhak biala HIV/AIDS vei hluarna ber dawttu state kan ni lehzel a, hetianga kan awm chuan state dang atanga lo zin tumte tan pawh tlawh kan chakawm dawn lova. Chumai ni lovin state danga hnathawk tur pawhin min duhloh hun a awm thei a, state danga zirna in thleng pawhin harsatna kan tawk mai ang tih a hlauhawm a ni.

Tunah chuan HIV chungchang hi kan state tan ‘Burning Issue’ a ni tak meuh meuh tawh a. HIV kai hluarna ber sex hmansual leh drug hi puanhnuai thil a nih avangin hriat leh ven a har a. Sawrkar tan do hneh mai chi a ni lova, kohhran leh khawtlangin tih tak zeta kan buaipui a hun tawh a. A hlauhawmzia hi naupang zawkte ah kan puan tam lehzual a ngai ta niin a lang.

Mizoramah chuan MSACS leh an hnuaia NGO ten theihtawp chhuahin hma an la a, mahse an hmalakna leh an thlenchin kan hria a. Chuvangin an hmalakna chauha kan innghah chuan he natna vei hi an pung zel dawn tih a chian em avangin kohhran leh NGO ten theihtawpa hma lakpui a ngai ta. Mizoram ah chuan kohhran hi thiltithei ber a ni ti ila kan sawisual tam pui awm love, chuvangin kohhran hruaitu ten pulpit thlenga kan tlangaupui a ngai tawh a, tlawmngai pawl hrang hrang YMA bakah sport association te pawhin tan kan lak zual a ngai ta hle.

Tun anga kan kal zel anih chuan Mizoram hi HIV hluarna state a ni ang a, nakin lawkah chuan he natna avang hian kan thi puk puk ang a, kan ram ingnghahna ber thalai ten hna an thawh theih dawn bawk si loh avangin chenna tlak lovah kan siam ang a, hnamdang ten Mizoram hi an luah mai ang tih a hlauhawm a ni. Chuvangin sawrkar, kohhran, tlawmngai pawl leh mi tinin HIV do kawngah tan i la thar lehzual ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?