HIV/AIDS leh a tak ram

HIV/AIDS leh a tak ram Ram chhunga mihring tam dan atanga tehin  Mizoram chu HIV/AIDS hrik pai tamna ber state a ni mek a, Nagaland leh Meghalaya chu 2-na leh 3-na ve ve an ni bawk a ni.

Hmarchhak state hi a chhe lam tehfungah hian kan sang duh ang reng fu a,cancer, vaihlo tih-ah te pawh a hluarna hmun nia sawi kan ni fo thin a, tuna HIV/AIDS a tamna hmun state 3 te phei hi chu Kristian tamna hmun a ni lehnghala. Kan sakhaw vawn hian a chhe lamah hian min veng lem lo niin a lang  a, a vuantute kan chiangkuang lo hle ti ila a sual tam lo khawp ang.

HIV kan hriat tirh khan a darh chakna ber chu drug hmang leh nawhchizuar te zingah a ni thin a, drug inchiuna atanga inkaichhawn hi a darh chakna ber hun  rei tak a ni hman a ni. Mipui mimirah tai darh lovin heng mi-ahte hian hun rei tak chhung chu a awm a ni. Hun engngemaw chen atang khan mimir ah a darh ta a, chutianga a darh theihna chhan chu mipat hmeichhiat hman dikloh vang a ni deuh zela, kawppui te laka rinawmlo te’n nawhchizuarte hnen atangin an kai a. Kawppui nei lemlo mahse a ruka sex hmang thin te pawhin kai ve zelin tunah chuan ‘general population’-ah bu a khuar nghet ta hle a, za a pakhat zelin HIV/AIDS kan vei phah ta hial a ni. Tuna a darh chak berna pawh district 2 ah drug vang a ni a, hei pawh hi helai hmun heroin a hluar vang a ni a, distict dang 6-ah chuan a ruka mipat hmeichhiatna hman chingte chu a thehdarh tu ber an ni a, Mizoram pum khaikhawm pawhin HIV/AIDS thehdarhtute chu sex a inthlahdah te an ni.

Mithiamte chuan nupa/ kawppui nghet nei piah lama sex hman loh hi tha an ti ber a, chutih rualin insum thei thlawt lo te chu condom hmang turin an fuih thin a ni. Hetah tak hian inzirtirna kawngah harsatna kan neiin a hriat thin a, kohhran leh pawl anga condom hman inzirtir hi thil inmil thei lo niah kan ngai a, a dikna thui tak a awm. Chutih rualin mithiamte zirnaah chuan a ruka sex hman chingte vanga darh a ni lawi bawk si a, dinhmun awk ai takah keimahni vek kan inhnuklut chu a ni ber e. Hunpui kan hmachhawn turah pawh hian thalai zawk insum tum lo tan chuan him tum tal a fuh zawk khawp ang.

Tunlaiin heroin a inchiu a hluar leh ta hle mai a, nitin in thuneitute lam pawhin an man chu a ni ta reng mai. Mahse hemi phenah hian man loh tam zawk a awm tih hriat a tha khawp mai. Heroin hluar zel hian a rei hnuah HIV/AIDS darh zel tur ven kawngah a chhe zawngin nghawng a nei thui dawn tih a lang ruak tawh a. Rilru zau tak pua a tak ram hi kan hmachhawn tlan a pawimawh ta khawp mai.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?