National AIDS Control Organisation (NACO)-in 2018 dinhmun tur a thlirlawknaah chuan India ramah HIV/AIDS vei tamna ber Mizoram a nih bakah a sang filawr hle mai a, mi 100-ah mi 2.04 zel he natna hi vei ang a ni. An thlirlawkna hi a kum dangah pawh a dik deuh zel thin a ni. Tualchhung daktawr pakhatin zirchianna a neihah chuan kohhran leh thalai hruai tu tam zawk te chuan AIDS veite an la thinhrik hle tih a lang bawk a ni.

 

Tun hma kha chuan Manipur hi HIV tamna hmun nia ngaih thin a ni a, tunah erawh chuan Mizoramin a khum dan hi a namailo ta hle a, a letin a khum mek a ni a, a lungchhiat thlak khawp mai. Tun hnaia a vei thar an pung nasa hi enfiah a tul khawp mai a, a hluarna hmuna sawi thin Nagaland leh Manipur-ah te pawhin tlakhniam an pan mek a ni a, state ang pawhin chona anga lak tham tak meuh a ni.

HIV/AIDS veite hi enkawl an hautak hle a, a beihlet nana tha sen, chhungkua a tihbuai leh thil dangte hi sumah chantir ila a tam khawp ang. A thlawna enkawlna lokal thinte tihtawp a tam tawh avangin enkawlna tha zawk a awm theih nan theihtawp chhuah bakah ngaihtuahna thar sen a tul tih a hriat theih a ni.

Tualchhung mi thiamin zirchianna a neih hi a Kohhran huang chhung ni mah se kan sakhuana avang hian thui tak chu Mizo khawtlang ngaihdan hailangtu atan a rintlak a rinawm a ni. Kohhran hruaitu tam zawkin HIV/AIDS veite bulah thut ringawt pawh an hreh a ni a, no leh inthiarna inhman tawmte an duh lo bawk a ni. HIV a inkaichhawn a nih theih dan hi kan inhrilh tam ta malh malh hle a, inkaichhawn theih a nih loh dan lam pawh theh darh a ni nasa tawh a ni. Chutiang a nih laia koh hran leh khawtlanga thutlukna pawimawh siam pha chin turte’n hetiang ngaihdan an la nei tlat mai hi zirchian tham a ni a, he natna hi a nihna tak inzirtir a la ngai nasa hle in a lang a.

Zirchiannaah hian HIV veite chu an phu vang renga vei emaw Pathian hremna tawk ta nia ngaihdan a la lian hle tih a lang thei a, hei pawh hi ngaihdan diklo leh hriat loh luat vanga ngaihdan mawlmang tak lo piang a ni. Mimirah he hrik hi a darh mek a, HIV vei zingah nun thlahdah vang nilo midang fimkhur loh vanga vei hi an tam tih hriat a tha ang a, nu leh pate fimkhur tawk loh avanga veite, an kawppuite rinawmloh avanga tuarte ‘victim’ kan tih ang hi an tam a ni. Nawhchizuarte hi a theh darhtu zing ami nia sawi thin an ni a, anni dawrtute hi kawppui nei an ni tlangpuia heng mite hian an kawppui pawisawi lote an kaichhawng veleh tih hriat a tha anga. HIV hi mipat hmeichhiat hman atangin a darh chak ber teh meuh mai a, hemi rual hian ‘sex’ atanga kai te hi mikhawlo an ni kher bik loa, vanduaina tawk tam tak an awm tho tihte hian kan ngaihdan thlak thei se a va tha dawn em.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.