Hmeichhiate tan tih tur a la tam hle: CM Hawla

Aizawl: Chief Minister Lal Thanhawla chuan, “India rama hmeichhia te dinhmun leh an chan ngaihtuahin hmeichhia te chawikanna kawngah thawh tur leh tih tur a la tam hle a ni,” a ti.

National Council of Churches in India (NCCI) in ni 5 chhung awh mipa leh hmeichhia te intluktlanna chungchang leh a kaihhnawiha Certificate Course on Gender Studies, Synod Conference Centre-ah an buatsaih kharna hun, Zirtawpni a neih a hmanpuina ah he thu hi sawiin Chief Minister chuan, “Ram chhung hmun tam taka vawiin ni thlengin hmeichhia te chu an pian tirh atanga hna an thawh hnu thleng pawha bungrua ang mai an ni tia ngaihdan awm hi a vanduaithlak tak zet a ni,” a ti a.

Mizorama Kristianna a thlen hma chuan Mizo hmeichhiate dinhmun pawh a that loh thu sawiin, “Kristian kan nih hnu chuan hei hi nasa takin a inthlak a, vawiinah chuan Mizo society ah hmeichhia te an nih avanga enhranna a awm tawh lo niin ka hria a, mahse chuti chungin an dinhmun siamthatna kawnga tih tur a la awm niin ka hria a ni,” a ti bawk. CM chuan hmeichhia te dinhmun chawikanna atan ‘The Mizoram Marriage, Divorce and Inheritance Rules’ pawh siam a ni tih a sawi bawk.

Certificate Course a tel te hi Mizoram bakah hmarchhak state hrang hrang leh Orissa leh West Bengal Kohhran hrang hrang rawngbawltu leh member te an ni a. CM hian Certificate Course hlawhtling taka zo Kohhran rawngbawltu leh member 20 vel hnenah Certificate a hlan a bawk a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?