Hming Club lakah 3rd MAP an lian lua.

3rd MAP-in harsatna tawk lovin Zothan Autoworks Pro Volleyball League-ah an duhthusamin bul an tan lo a nih pawhin, bul tha takin an tan a, Zomuanpuia leh Lalruatfela Sailo chuan team tanpuiin Zirtawpni zan khan 25-18, 25-16, 25-19 in Hmingi Club, Maubawk an hneh.
R Dengthuama Indoor Stadium, Mualpuiah ropui takin The Third Sentinel team-in khelmual an lut a, band party leh hman lai Mizo pasaltha inthuama incheiten player-te tawiawmin boruak an siam nghal hle a, an inkhelh chhungin player-te fuih phurin kuangpui nen thawm ring tak an chhuah tluan. 3rd MAP coach S Lalremruata Rema chuan mipuiten team an thlawpna lawmawm a tihzia sawiin player-te chakna petu pawimawh tak an ni, a ti.

Rin kai zawk an nih angin Police team-in inringtawk takin an khel a, captain Zomuana leh spiker tha Ruatfelaten nuam ti takin an khel a, point an thawk chhuak hnem hle. Anni bakah hian Lalduhsanga leh Joel Zodinsanga’n Police tan an thawh hlawk a, setter Ramtharnghaka a tangkai hle bawk.

Maubawk mipuiin Hmingi team-in tawiawm tha hle mah se, hun pawimawhah tawn hriat an tlakchham tuarin set hmasa ber tawp dawnah rinrawl C. Lalthuammawia, Lallianmawia leh Lalhriatpuia’n vaw sual zawnin vawi ruk an tihsual hnuah 24-18 in The Third Sentinel-in hma an hruai zui a, Police tan Ruatfela’n vaw ve thungin lehlamin an la thei lo va, set an la.

Police-in thunun zui zelin set hnihnaah captain Zomuana’n chiang tak takin a hlap tla a, Hming Club talbuaiin tihsual an ngah leh zual a, a tawp thlengin point 16 bak an hmu ve hman lo. Set hnih an hloh zawn hnuah Maubawk team-in bei letin captain Thuama’n vawi thum a hlap tlak hnuah beiseiawm takin 7-3 in hma an hruai . Mahse, kutthlak dik leh natah MAP an chungnunga a, thiamna kawng hrang hrangah an tha zawk tih lantirin hun harsaah Zomuana leh Ruatfela’n team an tanpui a, a tawp lamah 21-15 in hma an hruai let thei. Maubawk club-in bei let viau mah se point 19-ah an tawp a, set thum an inkhelh chhunga point an hmuh tam ber ni mah se chak tur khawpin Police an nawr let zo lo.
MAP coach Rema chuan Mizoram volleyball inelna sang bera bul an tan dan lawmawm a tih thu a sawi a, chutih rualin an tan awlsam tak angin lang mah se inkhel harsa tak a ni a, a player-ten an theihna tha ber lantir turin hmasawn an mamawh a, title an chuhna kawngah zangkhai zawka chet zung zung an mamawh a, fitness tha zawk an neih a tul dawn niin a sawi.

Ninga zana set hloh lova chak tawh Hunthar ang bawkin MAP-in set thum la tlang nghalin point thum an hmu a, kar leh thawhleh zanah Hunthar nen an intum dawn a, team pahnih tan champion hmasa ber nih an tumna kawngah inkhel pawimawh tak a ni dawn a, Hmingi Club-in kar leh ninga zanah Anastasia hmachhawnin Round hnihna an khel ve thung ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?