Hnam humhalh turin thluak fim

Hun engnge maw chen chu Chakma issue in kan ram a luah tawh a, a karah thil dang rawn inzep thin mahse Hnam thil a nih vang nge maw ni mipui thinlungah a cham hle in a hriat a ni. Tunhnaiah Chakma duhlo pawl indin tumte an awm a, mi challang tak tak te pawhin sawihona puitling tak te pawh an huaihawt tawh bawk a ni.

Hetih lai hian Central lam chuan Citizenship Amendment Bill 2016 chu House ah chhawp chhuah tumin a kalpui meka mi tam takin tha an tih loh thu an sawi tawh a, kan ramah pawh tualto party te chuan National Party te an ngawih rei avangin puhmawh nan an hmang tawh a nih kha. Citizenship Amendment Bill 2016 pawh hian a tum chu Hindu, Sikh, Buddhist, Jain, Parsis leh Kristian te chu India rama an awm rei tawh dan bihthliahin ramdang mi pawh nise khua leh tui nihna pek a ni a. Secular ram kan nih anga ngaihtuah chuan thil awm tak a nih rualin hnam tlem chimral tham lek tan erawh chuan- ram thenawm leh eng sakhua nge an vawn tih thlir chuan helh tham tak a ni thei ang.

Tunhma atangin tawhin Chakma chungchang hi kan buaipui tawh thin a, a ri hluaia a reh leh mai thin. Kum 3/4 kalta khan higher and technical hnuaia zir zawm zelna tur qouta ah indigenous pawm an nih loh vanga Category 2 a dah an nih chu Court sang zawkah an khing tawh a, stay order chhuah a ni nghe nghe a. Hemi hnu hian hmalakna mumal a la awm lem lo va, kumin khan Chakma zirlaite chu H&TE entrance inziaktlingin Sawrkar chawma technical zirna bawhzui thei dinhmunah an ding hmana, Mizo Zirlai Pawl te chuan duh lovin kan buai deuh rap hman a nih kha.

Thil mak angreng tak chu Chakma te hi enga tan nge Mizoram hian a duh? tih zawhna hi a ni a, Central sawrkar tan pawh nuih a za thei hial awm e. ‘Intlukpui ni turin electoral roll ah khung hnua chanvo lama thikthu chhe leh viau si’ ti te pawhin ngaihdan a awm thei khawp ang.

Tun tum a thil thleng te hian Mizo te hi a vaw harh deuhin a lang khawp mai, ‘kan tlai tawh’ tih tawngkam tam mahse thui zawk kalpui tum an awmin a lang hrih a ni. Tum dangah chuan tam takin an theihnghilh zui leh mai tawhin a langa, mahse tun tum hi chu thluak seng peih te an inlan chho zela, mahni phak tawk zelah he ‘issue’ hi sawi chhunzawm zel a ni a, theihtawp chhuaha a tawp thlenga hmalak tumte an awm nite pawhin a lang e. Legislature, bureaucracy, NGO leh adangte pawhin inlungrual taka hma an laka hun ta khawp mai. Mizote tawnhriat atanga lang chu ‘Mizoram humhalh thu hlaah hian tharum hi sawngsawhlawt mawh hle a, thluak hman a fuh zawk’ tih hi thu dinglai chu niin a lang a. Chutih rualin chutiang taka hmala tur te chu tute nge ni ang? tih hi mipui rilrua riak mek ti ila a sual thui lo viau ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?