Hringnun hi – 13 – Mahmuaka Chhakchhuak

Thihna a thleng mawlh mawlh a, midang thihna avang hian kan buai leh thut thin a, kan beisei leh rin loh ang deuhin thihna kut vawt tak chuan tu emaw a rawn man leh thut thin a. A chang phei chuan kan chhung hnai tak te hi a rawn man thut a, kan hmangaih tak tak te hian mual min liamsan thut thin a nih hi.

 

Thihna hi he Leilunga kan awm chhung atana Khuanu duan lawk a nih tlat avangin mihring chungah a rawn thleng a, a thente hi chu damlohna avangin a thleng a, a thente chu damloh pawh nilo chetsual palh avang te a ni a, chutiang kher lo pawhin mihring chungah a rawn thleng thut thin a ni. Mi zawng zawng a huap tlat avangin tumah thliar bik a nei lo a, kal kan bik nei loin Lal chhungkua leh chhiahhlawh chhungkua thlengin min hrutrual vek a nih hi. A thente chuan sum leh pai neih vangin in chelh deuh thei turah te kan ngai a, nimahsela Khuanu remruatna chu engmahin a dang thei chuang lo.

 

Kan chhungkuaah a rawn thleng ve a, kan hmangaih tak te chungah thihna a rawn thleng a, inbuatsaih lawkna leh thiamsa awm chuang hauh loin kan hmachhawn mawlh mawlh a, thenawm khawvengte leh thenrual thate zarah mualpho lutuk loin kan awm thei ve leh mai a, a thente chuan khuareiin min hnem chho te kan ti bawk thin a ni. Chutiang chu nimahsela Keimahni mimal chunga thleng tur erawh chuan kan suangtuah ngai meuh lo a nih hi. Kei ngei pawh hian ka chunga thihna rawn thleng tur hian kan suangtuah ngai lo a, hrisel tha ka inti a, damlo thei ah pawh ka in ngai lo hial a, nimahsela chu ka ngaihdan mawl tak chu Chunglam remruat hun a lo thlen chuan palzut a ni dawn tho tho si a.

 

Chung lam remruat hun lah chu kan hriat siloh avangin nang leh kei hian engtiknge Thihna luiral chu kan pan ve ang le? Vawiin a tih ngawt theih loh a naktuk a tih ngawt theih hek loh. Nimin lawka kan vui liam tak te pawh khan an hre lawk bik hauh lo ang. Nimahsela thihna chuan a man tlat tho si avangin keimahni ngei pawh hi min rawn man ve hun ala thleng ngei dawn a ni. Tun atang hian engtin nge kan inbuatsaih tak ang le? Pathianthu lam sawi erawh kan tum ber a ni lo a, ringtu nun lam pawh sawi vak kan tum chuang lo a, ka sawi tum ber zawk chu mimal nun bik hi a ni.

 

Pathian chu engkima engkim a nih avangin kan ngaih pawimawh hmasak ber tur a ni a, a kutah engkim kan hlan tur a ni. Mihring ruahmanna zawng zawng hi Pathian tello chuang engmah lo mai a nih avangin nitin tawngtaina neiin kan vawiinni kan hlan tur a ni a, kan thiltih zawng zawng te pawh a kutah kan hlan vek tur a ni. Chumi bakah chuan Chhandamna chang thei turin a thu pawh kan ngaihven bawk tur a ni. Pathianthu hi finna bul a nih avangin nitin nuna kan mamawh leh kan thiltihna kawng hrang hranga kan mamawh a awm avangin Pathianthu pawh a theih anga tam kan chhiar fo tur a ni. Heng bakah hian kan hriselna pawh a theih ang angin kan vawng thain kan uluk tur a ni.

 

Hei bakah hian kan thiltihna emaw kan hnaah emaw te hian rim takin kan thawk anga, chutianga kan thawh mek lai chuan kan nunna erawh awlsam tea boral mai thei a ni tih hrerenga kan inbuatsaih bawk a ngai a. Kan thiltih chu eng pawh nisela hriatpuitu pakhat tal awm thei sela, mi dang hriat rem loha a ruk thil tak tak pawh nisela kan mi rinngam pakhat talin min hriatpui sela. Thil tha lo lam chu vawn reng pawh a tul ber chuang lo a, midang tana harsatna emaw chhiatna lam thlen thei thil phei chu vawn loh hram a tha. Chutiang niloa kan ngaih pawimawh zawng thil chi hrang hrang te erawh chu vawn theih hram hram a tha a, kum a vei meuh chuan a hlu tawh thin a, file siam a, vawng hram a tha. Keimah bika ka la inchhir loh chu kum 17 ka nih atanga vawiin thleng hian Dairy Book hi ka la maintain hram hram a, dam lohna leh eng emaw harsatna riau bik tih lohah chuan nitin ka la ziak zel bawk a, tun hnuah hian ka hun kal tawh chhui lehna atan ka hmang thin a, thil tangkai ber te zinga mi a ni.

 

Nang leh kei hian khawvel hi kan tum leh duh loh hunah hian kan la chhuahsan thut theih avangin inpeih renga kan awm a ngai. I Cell phone pattern/ password emaw i ATM Card password te pawh kha i rinngam mi pakhat talin hre ve ngei sela. I Email password te thleng khan tumahin an hriatpui siloh che chuan lehkha ziakmi leh Email-a thil dahtha chi i nih phei chuan tumahin i sulhnu an rawn hre dawn lo tihna a ni a, Khawvel i chhuahsan rual rualin i chanchin sawi a tawp nghal maithei. Thildang sawi tur pawh ala awm anga, heti hian duhtawk rih phawt ta ila.

 

Mihring hian thuruk hran teh vak kan nei chuang lo, nang leh keia thuruk vawn ve khiau te pawh hi thil ropui danglam vak a ni chuang hauh lo ang. Chuvang chuan kan mi rin ngam, kan nupui emaw thiantha te hnenah chuan inpawh taka sawi hi thil tha tak a ni. Chutiangte chu kan lo boral hnuah pawh kan chanchin la chhunzawm theihna tur chu a ni anga, kan aiawh tur anla rawn ni dawn a ni. Nang leh keia Hringnun hi kum 200 thleng daih tura Khuanu duan a nih tlat loh avangin he leiah hian kan cheng reng dawn lo a, kan sulhnu erawh a awm reng theihna atan vawiin atang hian kan inbuatsaih a ngai a. Hringnunah hian phuahchawp leh dawt thu hmanga insawichhiatna a tam mai bakah thenkhatte lah hian mitthi tawh pawh an la khing ur ur duh zel bawk si a.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?