I kawng zawh lai kha…!!

– Lalchhandama Colney

Ni tin hnaah – Party mi leh sate kan hah hle mai, thahnemngai takin i ti zel ang; mahse, danin a phal loh ang chite kha chu tuman hre dawn lo mah se, a va tha lo ve, thil malsawm lo tak a ni zawk ngei ang. Patling leh patling, ringtu inti ve ve, fair takin i ti zel zawk ang.

Ni tin chanchinbu hrang hrangahte a khât tawkin, dawrkaite dawr hrehawm thinzia te, an thil zawrh to leh that tawk loh thin thute kan hmu thin ang, a ni viau a ni. Hetih lai hian VISHAL leh Bazar India-te an rawn inhawng ve ta hlawl mai a, MIMA chuan a dodal nasa cher cher ngei mai. Mahse, dodal a sawt lo, awmzia a awm lo, mipui lam support-tu an nei lo, a pawi hle mai, an inenlet a ngai.

Kan contractor neih vehote hna kan thawk a, kan hah ve hle thin mai; mahse, hlep hnem tum lutuk kha, keimahni leh kan ram tan nakinah a la pawi thei zawk dawn a ni.

Tunlaiah bank kal tlanga thil tih a tam tawh avangin an lun thei hle a, hetih lai hian then khat chuan an customer-te an tilunghnur fo thin, a dik lo hle, in enlet a ngai.

Khawtlang Leh kohhranah – Sawi leh sawi hnu kan vawk in, ar inte kan siam hnaivai thei lutuk a, mi dangte tan a rimchhe thei em em a ni. Kan tuichhe paihna leh septic tank tih velte pawh hi kan vil ngun a ngai hle mai. Intibengvar deuh thenkhat chuan an bawlhhlawh/hnawmhnawkte an dah khawm a, an hal chiam mai thin, kangmei tihchhuah palh a hlauhawm bakah thenawm khawvengah air pollution nasa takin a siam thin a ni.

Kohhran angahte pawh mahni kohhran sawisel reng mai, vuina tur hmu thei riau, inkhawm tha peih chuang mang si lo, kan ni em aw? Hruaitute tlin lohna lai leh that lohna lai hmu thei riau, mahni inhre ve mang si lote pawh hi a awm theih a nia. Rawngbawltute zingah pawh challan duh vang emaw kawr atana hmang mai mai thin kan ni em aw?

Khawtlang leh kohhran anga kan chen honaah mi dangte harsatna siamtu, kan hriat miah loh karin kan ni thei reng a ni.

Inchhung Khurah – Nupa inngaih mang lo, inhau fo kan nih chuan kan faten hrehawm an tiin, nakinah phei chuan an la ching ve mai dawn a ni. Zu in mi ka nih phei chuan kan tu leh fate hawi lam tur chu, an lo fel hlauh a nih chuan, vannei,tih zawng a ni mai.

Nu leh paten, “Mei zu suh u, tiranga lam chi pawh ei suh u, a tha lo,” tiin kan zirtir ve a; mahse, keimahni zawkin kan bawhchhe reng si thin a, naupang tan chuan awih a har duh ngawt ang. “Inkhawm rawh u,” kan ti a, keimahni kan inkhawm tha leh peih mang si lo.

Hriselna lam kawngte hi a tulin a pawimawh hle a, kan hrilh ve thin loh chuan an hre lo ngei ang le. Mi entawntlak leh chhuanawm tak takte chanchin sawi ve fo te hi, mi chanchin tha mang lo sawi sawi ai chuan a tha zawk ngei ang.

Nu leh pate hian kan fate aiin kan mobile phone-te hi kan kawmngeih lutuk ang tih te pawh hi a hlauhawm. “Sunhlu kungah thei dang a rah ngai lo,” an tih kha, kan tu leh fate hian min rawn zui ve zel dawn a ni.

Thiante Nen – Thian neih, thian kawmte hi a nuam a, “Nuhoten engnge kan sawi zin ber thin?” tiin han inzawt ta ila, kan sawi thenkhatte chu mi chanchin nalh lo tak tak, chu pawh chu rinthu, finfiahna awm lo, kan sawi ser ser thinin ka ring.

Nulahoten kan sawi zin ber tura ka rin chu, “Sum a ngah tak tak a ni, bike/car chhuak thar hi chu a hawl ve thei deuh zel,” tih vel a nih ka ring. WhatsApp-a kan thusawi duhzawngte chu, a then chu mi hriat ve mang chi lohte. Kan nuihpui tam berte pawh hi a then chu zahmawh rawngkai a nih ka ring. Tichuan, nakinah Pathian thu kan sawi leh ang a, ka chuti khati miah lo kan ti leh ang a. Kan thian kawm thinte hi an pawimawh hle a, mi chak takte pawh hi an thian kawmte an fuh loh chuan kawng dik lo an zawh phah ve thei tho a ni.“Aw khawiah nge i Awm,Khaw nge i kal zel dawn,Aw, i kawng zawh lai khaChhut Nawn Leh Rawh..,” tih hla ang deuh khan, kan ni tin hnaah te, khawtlang leh kohhrana rawng kan bawlnaah te, inchhung khurah te, kan kawng zawh mek laite ngun takin han bih chiang ta ila, kawng dik lo kan lo zawh reng lo maw, i in ngaihtuah chiang ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?