I la zuar zel dawn em?I la zuar zel dawn em? – Z.T.Vawra Hmar District Consultant, District Tobacco Control Cell, Siaha

A thenawm hnena zu in tur petu chu a chung a pik e,” tih kan Bible-in min zirtir hian ka ngaihtuahna a tikal thui hle a. Hmanlai hun kan Bible ziah a nih hun lai atang tawh khan nasa takin zu hian mihringte min lo tibuai reng tawhin, tunlaia buaipui thar thut a ni lem lo tih a chiang hle. Chutiang bawkin kan taksa tana tha lo Vaihlo kan ni tin nunah kan seng lut mek zel a, tun tum chu, “A mihringpuite hnena Vaihlo petu chung chu a pik e,” tih thupuia hmangin sawi zui i’n tum teh ang.

A hmasain vaihlo chu engnge a nih, mi thiam tam tak leh khawvel pum huap pawhin a that lohzia an puanzar luai luai, World Health Organisation meuh pawhin Drugs (substance of abuse) hman sual theiha a puan hial a ni. Khawvel mihringah, a bik takin ram hnufualah nasa takin Vaihlo chuan bu a khuar zel a, Kristian zaah za ram intite hian kan chhiatpui mek zel a ni. Vaihloah hian Chemical hlauhawm tak tak 7000 vel a awm a, chung zinga 80 ai tam mah chu Carcinogen (Cancer siamtu) a ni, hemi ringawt pawh hi vaihlo zawrh loh ngamna tham chu a tling a ni. Mizoram hi tun dinhmunah India ramah vaihlo hmang nasa ber state kan ni mek a, a bik takin cancer natna hrang hrangah pawh kan sang falin, kan nunna suattu lian ber a lo ni ta a ni.

Kan Bible-in Kristiante awm dan tur leh nun dan tur hrang hrang min zirtirah mahni kan inhmangaih anga vengte hmangaih tur te, nun tak nei a, ama lam hawi a, a Kros pu turin min duh a ni. Ka thenawm ka mihringpui hnenah a thihna tur lei tur ka kawl reng a, kan sum bawm ka lo chhung khat a nih chuan, chu chu ka mihringpuite hmangaih dan tur dik a ni em? He leiah ro tam tak khawl mah ila, nakinah Van kawtchhuahah, “I thil zawrh sual nia i ngaih phal loh, khawvel i awm chhunga i sum bawm tikhattu khan nasa takin i mihringpuite nunna a chhahsak asin,” tia min chhuah chhalh ni a thlen chuan, “An duh miau a,” tiin i chhang mai dawn em ni? I fapa, i hmangaih tak maiin damdawi a lo addict hlauh mai a, “A duh miau si a, a thih thak thlengin ka pe ta mai,” i ti dawn a mi? A teuh lo mai ti raw!!!

Kan Bible-ah, “Vaihlo tih a awm reng reng hleinem,” tiin tan i la khawh zel ang maw, a nih leh No. 4, heroin te ruihtheih thil dang a tam mai, a inziak chuang hauh lo. Mahse, engtin nge min zirtir, kan taksaa Pathian chawimawi turin min duh a ni. Tuibur leh sahdah kan sawngbawl dante mawlh hi, “Krista rilru tawmpuitu ka ni,” inti tan chuan a va tenawm em! Luikawr dungah, hmun thianghlim takah pawh ni lo, a bul hnaia chengte tan pawh boruak rimchhe tak chhuahin, tui thianghlim pawh hmang phal lovin, luikawr tui remchang kan hmang ta mai a ni a. Chutah a tih-al nan vut hnawmhne tak tak, chingal a siamin an han pawlh leh a nia, mahni mihringpuite hmuamtir atan chuan a va tha lo em! Kan huat rawn luai luai zu lah chu sahdahah nuai pawlh a nih hnu chuan Thlarau Thianghlim nen kan hmuam tel leh thei ta mai nge ni, kan nun hi a va dazat tehlul em! Thihna tur siam chhuak rengtu chuan Pathian hnena malsawmna an dawn a rinawm loh mai ni loin, he leiah hlawhtling angin lang thin mah se, mite thihna siam chhuaktu leh tidarhtu chu Setana lawmna siamtu mai an nih a rinawm.

Vaihlo hmanga sumdawnna hian mi dang tan thil tangkaina nei miah loah sum tam tak sen ralna a thlen a, natna tihbaiawm cancer a thlen a, chu natna enkawl nan chuan sum tam tak sen a ngai leh a, a tawpah thihna leh retheihna thlentu mai a ni. Kan Pathian thuin mi dangte tana malsawmna ni tura min zirtir lai a mi dangte thihna tur siam chhuaktu leh zuartu kan nih chhung chuan Pathian miah kan inchhiar ngam dawn em ni? Pathian rinchhan chunga kan thil zawrh tha lote kan bânsan ngam hi a hun ta hle mai. I vaihlo zuk leh hmuam zawrh kha mi dangte thihna leh retheihna thlentu mai a ni tih hre reng chung khan I la zuar zel dawn em ni?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?