Inen let leh Insiam that a ngai

Mizoram sorkarin a hnuaia department hrang hrangte hnathawh tur a bituk dan (Allocation of Business rules 2014) chuan Mizoram PWD hnathawh tur pasarih tarlan a ni a, chung zingah chuan Kawngpui siam leh lei (bridge) dawh leh chung enkawlte chu a chuang a. Mizoram PWD in an hmathlir (vision) an tarlan hrang hrang zingah pawh lei tha tak dawh a, enkawl te, sum seng tlem zawnga lei tha tak (standard quality) dawh leh enkawl te hi a tel bawk. Hna pawimawh tak mai Mizoram chhunga inkalpawhna awm chhun kawngpui siam, lei dawh leh heng enkawl hi PWD kutah a awm tihna a nih chu.

Nikum (2017) khan ruah a tla hma hle a, favangah pawh a sur reng a, kum dang aia ruahtui a tam avangin kawng siam hna thawh pawh a khaihlak nasa hle a. Leimin leh kawngbal siam that ngai pawh a tam hle a nih kha. Kan la hria anga, September thlaa Mizoram Road Fund Board thut khawm hmasa berah PWD changtu chief minister ni bawkin sorkarin kawng siam a ngaihthah loh thu a sawi a, “Khuain a zir veleh kawng siam hna thawh ?an a ni ang,” a tih thu a sawi a ni. “Hun remchang hmasa ber nghakin kawng siam hna thawk turin PWD pawh an inpeih reng tawh a, khua in a zir veleh hna thawh tan a ni ang,” a ti nghe nghe. Kawngpui hi state chhung inkalpawhna awm chhun a nih avangin (rel, thlawhna leh lawnga inkalpawhna a la awm mumal lo a), a chhiat nasat chuan mipui an phun nasa lo thei lo a ni, nikumah pawh sorkar a buai phah hle a nih kha.

Favang ruahtui a hul veleh khan kawng siam tura thapui an thawh ngei beiseina lian tak a awm a, tih mumal a awm ta lo a. Kum thar hnuah pawh thla khat leh a chanve a ral leh ta, tun thlenga an hmalakna erawh a la bei tham khawp mai. Hmun thenkhatah kawng siam mek chu a awm nual a, a lawmawm hle. Mahse, beisei anga ram pum huapa hmalakna erawh hmuh tur a la awm lo thung. Kan lo beisei dan kha chuan ruahtui a hul chiah atangin kawngpui hrang hrangte hi an chei thain an siam tha nghal chur chur anga, fur lo thleng tur pawh a choawm deuh ang chu tih kha a ni a. Hetiang ang leka an thawk a nih chuan thal a ral hma hian state chhung inkalpawhna kawngpui siam that hi an zo hman leh lo mai ang tih a hlauhawm. Aizawl khaw chhungah pawh hian thal laia an siam tura beisei; mahse, hna la thawh loh a tam hle bawk. Kumin MLA inthlan kumah hian kawngpui a tha hman lo mai ang tih a hlauhawm ta riau.

Chutihlaiin, rin loh lamah vanduaina a lo thleng a Tuirini a lei dawh lai chu a chim thut a, nunna chan hial an awm kha a pawi hle a ni. Projeck Pushpak hnuaia Lawngtlai-Diltlang-Parva road-a Kawrawng lui kaina lei (RCC bridge) metre 72.50-a thui dawh thar Governor Lt Gen. (Retd) Nirbhay Sharma’n a hawn tuk tuk leh maia lei dawh mek dang a chim hi a pawi hle a, nunna chan phah hial an awm hi a pawi zual a ni. Tun hnai chhoah hian lei hi a chim ngun ta malh malh hle a, eptu party-te pawhin sorkar an beihna ber pakhat pawh a ni. Lei hlui tawh, lirtheiin an zawh rim bawk si a chim a nih chuan engemaw chenah hriatthiam theih a ni ang. Mahse, lei dawh mek lai han chim em hi chu a zia lo deuh a ni, tuna mi hi a vawi khatna a ni lo lehnghal.

Tun ministry hi lei chim hian a bawrh ve hrim hrim emaw tih mai tur a ni, kum 2014 hnu lamah tum 6 ngawt a chim tawh! Heti zat hi chim tawh mahse ministry hian mawhphurtuah an inpawm duh mang der lo thung. Kan hruaitute sawi fo thin ‘Good Governance’ ziarang pawimawh tak mai chu mawhphurh ngamna (accountability) hi a ni a. Sorkar inrelbawlna a thatna hmunah chuan thil fel lo a awmin ram hruaituten mawh an phur ngam zel a, mipui thlan an ni tih hi an inhre chiang a, an inrawlh miah lohna pawh nise mawh an inphurhtir ngama an ban phah  thin.  Mipui an rawn lem lo.

Thla hmasa lawka UK-a International Development minister Lord Michael Bates te kha, House of Lords-ah income inequality chungchang an sawihonaah a thlen tlai avangin amah an zawhna a chhang hman lo a, a inthiam lo a, zahthlak a tih thu a sawi a, ngaihdam a dil a, a ban tur thu a sawi zui nghal a ni. Mipui rawngbawl an ni tih hi an inhre bik khawp mai. Hruaituten mipui kawng dika hruai te, dikna tundin te, sorkar inrelbawlna tha din te an tum a nih chuan dan zamtu an nih avangin dan an pawisa tur a ni a, mipui an zah tur a ni. Kan MLA te, minister te pawh hian mipui thlan an ni tih te, chu chuan mawhphurhna sang tak a keng tel a ni tih te hi an hriat reng a ngai a ni.

Mizoram PWD-in kum 2016-17 chhunga an hnathawh (Mizoram PWD Important Achievement 2016-17 a) an tarlan dan chuan lei (bridge) 124 an enkawl mek a, chung zinga lei 50 chu national highway a mi a ni a, a bak 74 chu state road a mi a ni thung. State road a lei 39 te hi permanent bridge a ni a, a dang 35 te hi chu temporary bridge a ni thung. PWD hian kum 2030 hmaa lei zawng zawngte hi permanent bridge a thlak vek an tum nghe nghe. Mizoram PWD hi an pawimawh hle a, hmasawnna ruhrel dintu leh enkawltu ber an ni a, an budget pawh a sang thin hle.

Engpawhnise, kawngpui tha neih te, lei tha tak neih te hi Mizo mipuite hian kan phu hliah hliah a, a mamawhin kan mamawh ngawih ngawih a ni. Kawng chhiat chhan an sawi thin te hi kan hre hne tawh a, lei a chim leh ngawt thin te hi kan hrethiam zozai tawh lo a ni ber. Kan ram anga ruahtui tamna ram, chhengchhe bawk si ah hian kawngpui tha tak a siam theih tih te pawh kan hria a. Hman atanga kawngpui siamna tur leh lei dawhna tura sorkar laipui (leh hmun dang) atanga sum a lokal hnem tawh zia pawh kan hre bawk. Chuti chunga kawngpui tha kan nei thei lo te hi chu sorkar mawhphurhna liau liau a ni. Tuna ram hruaitute leh ram hruaitu nih tum mekte hian mipui mamawh leh hmasawnna ruhrel hrang hrang (social and economic infrastructure) an din thei tak tak dawn lo a nih chuan ram hruai hi tum tawh lo mai se, tih te hial rilruah a awm.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?