Interview with ESCAPE ENGMOIA

Vairengte lamah bul a tan hnuah, Kolasib lamah a rawn inhung chho a, tunah chuan Mizoram khawpui Aizawl-ah awmhmun a rawn khuar bet thei ta. A kutchhuak te chu Mizo mi larte chu sawi lo, Indian Army Chief nupui leh an chhungte thlengin hak a hlawh a. Tunah phei chuan Myanmar sawrkar hruaitute thlengin a ‘brand’ an inbel leh ta. Mizo fashion designer zinga hriat lar ber pawl chu Thalai Khawvel chuan kan rawn interview e…

I hming pum, pian leh murna?
Ka hming pum chu Lalengmawia a ni a. Vairengte khuaa piang leh sei lian ka ni.

Chhungkaw chanchin tawi
Ka pa chu Hmangaihzuala a ni a, ka nu chu Lalmuanpuii a ni. Kan unau hi mipa hlir pali (4) kan ni a, kei hi upa ber dawttu ka ni.

Engtik atangin nge fashion designer nih i duh/chak a. Engin nge fashion designer nih chak tir che?
Ka naupan lai atang tawhin fashion designer nih a, khawvel hriat tham khawp designer nih hi ka tum thin. Ka ‘aim in life’ min zawh pawhin fashion designer tia chhang thin ka ni.
Ka tuina chhan tak pawh ka hre tawh lo. Ka talent a ni ve pakhat a, kut them thiamna chi hrim hrim hi ka tuipui hle a, thil thui hi ka pianpui thiamna a ni bawk a. Interior lam te pawh ka tui lutuk. A tuk chuan thutthlengte pawh ka siam ve leh tawp zel.

Mahnia inzir nge i nih a, fashion design hi i zir? (I zir a nih chuan khawiah nge i zir, engtikah nge i zir?)
Ka pianpui a nih bakah fashion designing hi Mizoram leh vai ramah ka zir kawp. Mahse, zir zo loin dawr ka siam nghal. Ka zir aiin mahnia ka inzir hi ka hlawhtlinpui zawkin ka hria. Tumna hi a pawimawh ber ka ti.

I label/brand te hi engtiangin nge i hrilhfiah thin?
Ka label hi — ESCAPE ENGMOIA — tih a ni a. Fashion designing lam hrim hrim hi a tul dan a zirin kan ti thei vek a. Mipa, hmeichhia, naupang, pitar putar, mo kawr thlengin kan ti vel a. ESCAPE tih hi, keimaha awmzia chu incheinaa harsatna nei ho zawng zawng tan an Chhandamtu nih hi.

Mizo te leh fashion industry
Fashion-ah Mizo te kan sang ka ti lo; mahse, kan inchei thiam ka ti zawk. Quality aiin quantity kan ngai pawimawh. Brand tha tak tak kan hriat ang aiin original kan uar lo. Designer leh puanthui kan hre hrang tan a, Mizo designer te kan dah sang tan bawk. Hna eizawnna tlak berte zingah ka chhiar, a nuam ka ti.

ESCAPE hian ‘celebrity spokesmodel’ nei dawn ta la, tunge nge i thlan ang? Engnge i thlan chhan?
Kei chuan Kim Kimi hi ka thlang. Chapo niloin mahni inringtawk hi ka ngaisang. Chuan, lerh niloin zei hi ka ngaisang bawk. Kim Kimi chu a kawr hak ang, a pian, a nih dan tur leh a kawr lan mawi dan turin a show thiam tlat.

Engtin nge i kutchhuak te hi i produce a, i theh darh thin?
Advertisement hi ka la ti mumal lo nachungin, social media leh 2014-a ‘ESCAPEFashion Show and Red Carpet’ kan buatsaih avang khan mite’n min lo hre ve a, kei chuan social media hi ka hmang tangkai ber.

zaaaaaa

 

Engtiang chiahin nge ‘creativity’ leh sumdawnna hi i kalkawp tir?
Sumdawng kan nih chuan midang kaldan ang put puta kalloin, tlema thil danglam deuh hi ‘apply’ a tha. Min dawrtu te’n thil ngai hmuh an ning thin. Thil zawrh inang reng pawh a zuartu a zirin an hralh theih leh theih loh phah thin. Kan thil zawrh pawh min sawrtu te tlema an iai pawh chawplehchilhin an duh turin ka siam danglam sak thin te hi, ka client-te an lawm thin.

I collection-ah te hian engang ‘feedback’ nge i dawn thin?
En mai ai hian hakin kan mawipui thin tihte; kum fe a lo vei hnu pawha a designe a thing thei lo tih te leh thau kawr cutting inthiam tih angreng hi chu, kan dawng ve thin.

Collection thar emaw, kutchhuak thar emaw, i neih dawnin engangin nge zirchianna i neih thin?
A hmasain bazar leh puanthan zawrhnaah survey ka nei a. An thil zawrh ang lo deuh chu ‘Collections’ thar atan ka siam thin. Puanthan mawi tak chu tupawhin an duh a. Mawi an ti tlangin a common vat thin. Mahse, kei chuan puanthan anih laia mi mit la em em lo leh lei hlawhlo kha ka thlang thin. Chuan, a nalh thei ang ber tur leh a hatu inhmeh tur ang berin ka siam chhuak mai thin.

In chhungkaw zingah ‘designer’ ang tak taka phurpui che a, tuipui che an awm em?
A hma chuan phurpui lo khawp mai. Kan dawr siam tan tir pawhin chhungkua atangin sum leh pai bakah, tha paw’n min puihna ka dawng lo. A chhan chu, ka nu leh pain ka hlawhtlin loh a, nakkinah ka unaute ka phak loh min hlauhpui vangin ka hna hi min support lo a, ka beidawn leh vat an ring! Mahse, thil tum ka tih hlawhtlin hmaa bei hram hram mi ka nia.
Tunah chuan ka chhunte’n min pui nasa lutuk a, an tello chuan ka thei tawh lo a ni ber.

Fashion industry-ah hian tuin nge ‘inspire’ ber che? Engnge a chhan?
Ka nu hi pianpui puan thui thiam a nia. Mi kawr chu a thui em em lonain, kan tetlai chuan kan thuamhnaw hi a thui vek thin a. Chuta tang chuan a ni berin ka hria.

Mahni puala label i din hnuah engang takin nge i kutchhuak te a darh chak?
Hetia ‘Brand’ ka neih takah hian ka phu loin malsawmna ka dawng nasa thin lutuk. Ka rin phak bakin miin ka thil siam chhuahte min hlut sak a, India chauh loah, foreign ram hrang hrangahte pawh an ha nasa ve tawh lutuk. He’ng — USA, UK, Spain, Israel, Australia, Norway, Pakistan, Burma ah te hian kan thawn chhuak ve thin.
Indian Army hotulu tak tak — Chief of Army te paw’n anmahni ngei hmuin an thuam turte ka design sak tawh a. Sipai lal tak tak ho nupui zingah ka ‘client’ an awm nual bawk.
Chumai bakah, khawvel huap pawha mi hriat hlawh zingah Mr UK 2016 leh World Mr United Continental 2016-a 1st Runner-up Mark Redfearn khan campaign-na’n ka design pahnih a hmang a. Mizo hnam kawr thangchhuah atanga designe a ni nghe nghe.
Myanmar MP Pi Siami thuam inbel tur hi ka tihsak nasa khawp mai a. Minister of the President’s Office ni mek leh President of the National League for Democracy – Aung San Suu Kyi hialin ka thil siam chhuah te a lo inbel ve ta a.

Tun atangin kum 5 lo liam leh ta se, eng dinhmunah nge din i inrin?
Pathian zara ka la dam tha te a nih chuan, kum 5 liam leh ta se — India-ah na na na chuan fashion industry-ah hian ka hming hi an lam ve chhen ka ringin, ka beisei. Tum leh rin chu a thiang a ni lo’m ni?

Mizo milar zingah tute nge client?
Mizo milar ho hian min duhsak ve hlawm em a. Lawmi Khiangte, DJ Lalvenhimi, Feli Fanai, Rachael, Lancy, Grace 10:45, Ananda, Zorinzuali Khiangte, Lalhungchhungi, Sailothangi, Maggie, Rosy K Remsangpuii, Andrew Laltlankima, Kimkimi leh adt., an ni hlawm.

I kutchhuak te hi khawiah nge kan lei/hmuh theih ang?
Ka dawr hmasa chu Vairengte-ah a nia, a hnuah Kolasib-ah kan nei leh. Tunah hian Aizawl-ah ka inbun leh tawh a, Chanmari, Ramhlun Road (IDBI Band opposite)-ah showroom leh hnathawhna hmun, fashion designing zirna te kan hawng thar ve a. Kan thawmhnaw ho hi mipa leh hmeichhe tan kan showroom tinah hian a lei theih vek e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?