Intihhmingchhiat

Zalen chanchinbu Editor-in a chanchinbu zahawm taka Dan lam kaihnawih ziak thin turin phone-in min rawn bia a, kan chamber lamah pawh tum zet chu min hmuh tumin a lo leng a ni awm a, kei Court leh hna dang tul avanga ka chhuah lai nen a lo in nang fuh hlauh zel hi a lo ni a. Min ngentu a zahawm bawk a, tihlawhtling turin kan inbefel ta a. Dan lam kaihnawih a hriat duh bik leh thupui thlan duh nei chhiartu zingah kan awm a nih chuan inthlahrung lovin editor hnenah emaw, phone number tarlanah emaw hian lo thawn mai thin ula, a ziaktu lam tan pawh mipui hriat duh tak kha kan ziak a ni tih hriat hian a phurawm duh bik, kan inchawmtawn tihna a nih chu.

Tunlaiin social media kan hmang thiam lo nge kan hmang thiam lutuk zawk ni, tawngkam uchuak leh mi dang rilru hliam thei leh thu thinthawng tak tak post a tam ta hle a. Hei vang hian Intihhmingchhiat tumna (Defamation) anga FIR thehluh pawh a awm fo bawk a. Defamtion case chungchang hi tawi tein han sawi lawk teh ang.

Intihhmingchhiat avanga hremna hi IPC lamah chuan chang 500-naah a inziak a, thiam loh chan chuan kum 2 thleng Jail-a tan emaw, pawisa chawi emaw, a pahnih emaw a hrem kawp theih a ni. Tin, Civil case lamah ve thung chuan Intihhmingchhiat man zangnadawmna claim theih a ni ve bawk.

FIR kan uar ta viau a. Section 500 IPC hnuaiah ringawt case ziah luh a nih chuan he chang hi Police-in Magistrate hnen atanga Warrant a nei a nih loh chuan ama thua man theih loh case (non-cognizable) a ni a; tin, warrant neiin lo man ta pawh nise, bail-a chhuah nghal theih (bailable) case a ni bawk a. Warrant tel lo Police-in an lo man a nih chuan dan zawm loin Police-in mi an man tihna a ni dawn a ni. Amaherawhchu, intihhmingchhiatna ringawt piah lamah hmeichhe zahawmna sawi bawrhbanna (hmeichhiat mipatna lam hawi) lo tel ta sela, chutiang thubuaiah chuan danah hremna tam tak a awm tel a Police hi an mahni thuin, warrant kher ngai lovin mi an man thei a ni.

Intihhmingchhiatna ringawt ang chi case-ah hi chuan FIR Police hnena thehlut lo a, Judicial Magistrate hnena Criminal Complaint thehlut hi a kawng hmang tur dik tak zawk a ni. 2015 hma lam kha chuan Section 66A IT Act nena ziah tel a nih thin avangin FIR thehluh hi a dik thlap a, Section 66A IT Act paih a nih takah hian Section 500 IPC ringawt hi chu a khawng tawk ta lo deuh a ni.

Tin, miin kan chungchang a chhe zawng pawhin lo sawi ta se, thudik/thil nihna tak an sawi a nih miau chuan thubuai hla buaia lak kha awmzia awm lem lo tih tepawh hi hriat ve mai mai a tha ang e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?