Intlanchhawkah Mi mal pawh

– R.Zomawia

Aizawl khawpui tawt lutuk tiin kan sawi a, kan sawi chhan ber pawh khawpui kawngte hi an ni. A dik chiah mai, lirthei eng chi mai pawh hi a tam em em tawh mai a, lirthei lei khap ngawtna thu awm hek suh le, chhungkuain a mamawh a, pawisa an neih miau chuan an lei thei a ni. Garage neih ngei ngei tura tia dan lo awm reng mah se, garage nei lote pawhin an lei tho a, dan han palzam tihah hian a leitu leh sawrkar lama lo endiktu tur, lo thununa dan angin an ti em tia lo entu turte chenin an ni vek mai awm e. Traffic Police-ten hah takin nileng lengin an phar kual a, an ni pawhin dan ang thlap thlapin han kalpui tum rut mah se, dan palzut hreh loho, hotu lawk atangte hian, “A ni kha chu lo ti suh, lo man lo mai rawh,” tia hriat chang an nei tam mai thei, sikul naupang uniform nena lirthei khalh, han en reng reng pawha driving license nei lo tih hriat tak, an check pawha lo nei lo ngei; mahse, dan an chelek hleih theih lohte pawh sawi tur a tam ve mai thei a ni. Dan palzutna zawk hian khawpui kawngpuite hi a titawt mai mai a ni zawk lo maw? tih hi ngaihtuahna kil khat luahtu zuk ni ve tlat a.

Lirthei a pung sauh dawn em? Mi mal motor chena intlanchhawk tur tia thurel a lo awm tak si-ah chuan mi tam zawk chuan tha kan ti mai mai viau ang. Taxi-te pawh an intlanchhawktir tho alawm, engvangin nge mi mal motor pawh an tih loh bik ang tia rilru lo pu tur hi kan tam dawn em asin. Engangin nge nghawng a neih chhoh dawn erawh hriat a ni mai rih lo va, sawrkar pawh hian a enchhinna mai tur a nih hmel e. Tha turah ngai ila, zawm bawk ila a tha ngawt ang. Thil pakhat rilrua lo awm ve chu ni tina hnathawhna a keng motor, two wheeler nei a nghawng dawn a, motor hman theih loh hun, mamawhin a tur a rawn hring chhuak ngei dawn a ni. Hetiang rilru atanga han ngaihtuah chuan lirthei hi tun dinhmunah a pung chak kan ti a, tun ai hian a pung chak fe zawk mai thei. Lirthei pakhat nei chuan lirthei kal theih loh ni atan a dang hman tur lei leh mai teh ang, a chhawk tala hman tur kan neih loh chuan a dik dawn lo tia lirthei lei belh duh, sum lama harsa si lo kan tam si a, lirthei hi a pung zual sauh mai thei a ni. Lirthei a pun chuan khawpui a thawl phah ngut ang em tih hi zawhna pakhat chu a ni ve tho mai.

Tute emaw hriatthiam bik awm suh se: Thil ninawm ve tak pakhat chu engkimah hian VIP dah ziah hi a ni. Khawvel a ni a, mi bik leh zahawm bik chu an awm ngei mai, hengte hi chu a bik tak a dah an nih thinna hi mipui pawhin an thik lem lo. Khawvel a ni a, VIP chu an awm tur alawm. Mahse, hemi piah lama lo inti-VIP tam ta lutuk thin hi mit tikhamtu ber zawk chu an ni. Mi pawimawh nih hi kan han châk vet vet khawp hlawm si a, VIP Light chhit a nih lai khan VIP light chhi pha em em si lo, chu dinhmuna din ve phet tum kan sawrkar hotute zingah an tam ve viau thin ang. Tuna mi mal motor intlanchhawk, din ni bik neih turah pawh hian tute emaw lo hriat thiam leh mai kan awm palh thei a, hetiang hi thuneituten ti miah suh se. Huaisen takin enchhin phawt sela, chu chu a tha ber mai. Tute emaw hlauh vanga hriat thiam leh mai thin an awm avangin dan tha tak kan neih reng pawh hi a zahawm lo vek thin a ni.

Dan awmsa hi khauh takin hmang ila: Dan tha tak tak hi chu kan han zam kur ve ngei nguai thin a, kan dan hmante hi thenkhatah khauh taka kan hman laiin thenkhatah thung chuan hman ngam lohna te kan nei bawk si a, hei hian khawpui chhung traffic thlengin a nghawng thei tih hi kan chhut thiam emaw chu le! Keimahni tawkah kan kawngpui thenkhatte hi chu a te lutuk lem lo, chhun hnathawh hun lai taka kawngsira motor hung tlatte hian hmun tam zawkah traffic jam a siam a, hmun thenkhat traffic police duty lohnaah mi mal motor, taxi an ni emaw hmun lai taka lo ding tlat te, motor inpelh dawna laklawh ding tlat, driver awm lo daihte hian traffic jam hmuh tam takah hmuh tur a awm a, inherna hmun pawh ni lo, duh huna driver lo inher nghah ngai tlat te, traffic police duty ngei ngeinaah pawh tu emawin motor laklawh deuha hung tlat, chu motor chu sawrkar hnthawk lian tak emaw, politician motor te pawh an ni ang, an hauh ngam loh a awm thin bawk a ni. VIP motor kan tihte hi chu dan ang takin an dinna hmun kha hriat thiamna dan awm lo mah se, programme pawimawh bik an neih chuan hriat thiamna thui tak chu a awm thei tho a ni. Hetiang hi chu kan sawi chhungah a tel lem lo. Programme pawimawh pawh ni lo, lo intilian ve viau, motor pawh mi hun lohna hmuna intithei taka hung tlatho hian khawpui kawngpui hi an ti tawt tlat.

Kawngsira motor hungho hi: Khawpui kawngpui tawt lutuk kan buaipuina em em pakhat chu khawpui plan dik tawk loh vang a ni. Khawpui plan hi a tir atangin awmze nei takin ruahman thlap selang chuan kan buaina tam tak hi a awm lo vang. Kan hotute, kan mi thiamte an harh tlai riau, khawpui kawngpui hi a la chep dawn a ni, khawpui chhunga motor kawng hi a tlem mah mah a, garage nei tur tih te hi kan lo inhrilh hre tam tawk lo va, dan awm sa ni mahse inhrilh hriat hi kan mamawh hle tih hi kan hotu hmasa fing ve viau a kan ngaihte khan an ngaihtuah pha lo niin a lang. Veng tam takah hian kan kawtkaia motor kawngpui thlur seng sung tur hian hma lo la sela, mi tam zawk hi chu kawngpui kamah kan awm thei ngei ang mawle. Kawngpui sira motor dah hi a hnawk zualna lai tak leh traffic ti-jam-tu tam ber chu chhun hnathawh hun lai a ni tlat a ni. Zanah traffic a jam ngai lo, keini ramah te chuan zan bazaar pawh kan la nei lo, kawngpui hulun lai lo phei chu zanah hi chuan a reh thuap zel a ni. Chhunah hian kawngsira motor dah, ding fer fur te hi thianfai deuh zawk se, tun ai hian keng kawh tha se, khawpui motor tawt lutuk hi a ziaawm phah em em dawn a ni. Kawngpui lunlai kamah motor workshop tenau, two wheeler workshop lo awm tlat thin te hian traffic jam a siam ve bawk thin. Hetiang neuh neuh te pawh hian thianfai se, motor tawt lutuk a ti ziaawm ngei ang. Kawngpui lun ve tak tho si, engtizai a traffic jam tlat nge tia han hriat chuan tutee maw inneihna te a lo ni a, motor silna lo inher rem vel te, kawngsira insakna bungrua lo hnawk avanga inkal chhawk ngai ti tih te, kawngsira bike lo dah talt, nawr sawn dawn pawha an lo lock tlat te avanga motor ding mup mup hmuh tur a tam mai.

Motor neite tan garage: Sawrkar-in motor nei zawng zawng tan garage neih vek tur tiin tunah hian a thawt lawk mek a ni a, a tha khawp mai, mi tin chuan neih a harsa ang; mahse, tam tak chuan garage neih ngei tumin hma an la a, tlang pang, awih panga in sa kan ni a, sawi tawh angin Aizawl khawpui hi a tirah ruahmanna a tha tawk lo va, veng chhungah kawngpui a tam tawk loh avangin mitin hi kawngpui kamah kan awm vek thei lo, kawngpui kama awm thei lo mi tam tak an awm a, chungte tan chuan garage neih a harsa ang. Luah tur zawn pawh thil harsa a ni. Danah motor nei tur chuan a dahna a nei tur a ni ti mah se, neih duh ve si, kawngpui kama awm lo mi tam zawk an ni ngei ang. Kan dan tam zawkte hi phairam mila siamte a ni ve tho a, phaiah chuan motor dahna a harsa lem lo, kawngpui an nei ngah tawk bawk, chuti chung chuan kawngsira dah ngei nguai hmuh tur an awm ve tho a ni.

Tanrual hi chakna a ni: Mi mal motor din ni awm ve se tia sawrkarin thu a kalpui tum hi a tha lo ve tia sawi ni lovin, i tangrual zawk teh ang u tih a ni zawk. Mi hausate motor neih tam hi thik thu ngawt a awm lo. Mahse, lirthei erawh a pun phah ang tih rinna zawnah chuan kan khawpui motor tawt lutuk hi a ziaawm phah ngun ang em tih hi ngaihtuah a ngai ve a, khairual takin dan hman a nih chuan hmang mai ila, kan dan neih sate pawh khauh zawkin hmang sela, tawt lutuk tihziaawmna atan a tha reng si a ni. Dan kenkawh that, tute emaw hlauh, ngaihhna thiamna neih bik, tute emaw luhlul chhuah, thil tithei iti ho hi kiam sela, tun ai hian khawpui kawng hi a ziawm phah ngei dawn a ni. Thuawih hi kan zavaia kan that tlanna zawk a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?