Journalist te tawrhnaJournalist te tawrhna

Zophaiah tunhnai khan MZP te chuan chawlhbuk sak an tum avangin buaina nasa tak tum hnih a chhuak a. Zirlai tam tak chu nghaisak an ni a, silaia kah hial an ni nghe nghe. Hetih lai hian chanchinbu mi 7 lai chu Assam police te hian tairaw tiangin na takin an hlap a, hliam na tak tak tuar te pawh an awm a ni. Chanchinbumite hian an nihna te sawiin an identity card te pawh an hmuh a, mahse hei hian kori a tu lem lo. An zingah hian hmeichhe 2 an la tel zui lehnghala hmeichhia an nih avangin dim merawh an hlawh chuang lo a ni. Hliam tuar te hi damdawi ina panpui an ni a, nunna chan an awm em lova a vanneihthlak hle mai.

Mizoram Journalists Association General Headquarter chuan chanchinbu mite chunga hleilenna chu ngaithei lovin hliam tuar leh bungraw chhia te chu compensate turin Assam sawrkar an ngiat a. He thil thlengah hian judicial inquiry an phut bawk a, thil tisualtute chu man chhuakin an phu tawk hremna pek nise an ti a ni. MJA hian pawl angin Central lama department eng emaw zatah chanchinbu mite tana rorelna dik a awm theih nan an thlen tawh a, Assam CM hnenah pawh hetiang hian thlen a ni tawh bawk a ni. Mizoram sawrkar pawhin chanchinbu mite ngiat ang hi Assam sawrkar lakah a ngiat bawk a ni.

Chanchinbumite hi ram banpui 4-na ‘The fourth estate’ tia sawi an ni fo thin a; mahse, khami nia an thil tawn han ngaihtuah hi chuan an zalenna rahbeh a ni tih phat rual a ni lo va, chumi piah lamah India danpuiin a pek ‘thudik hriat theihna chanvo’ chu tih bawrhban sak an ni bawk a ni. Assam police te khan media mite kha an thliar lo mai ni lovin an information la tura a hmuna kal an nih avangin an chetdan rawva tak chu document a awm lohna turin an bei ta chiam ni te pawhin a lang thei rum rum a ni.

Chanchinbumite hi Mizo mipui te hian kan sel nasa khawp a, tlin lohna tam tak an nei a ni tih a chiang a, an famkim lo a ni. Chutiang chu ni mah se diriamna tawngkam social media-ah a tam em em a, journalist te erawh chuan hengte hi chhanglet lovin an ngawihsan mai zawk thin a ni. Tun thil thlengah pawh khan National media thleng pha ve lo khawpa sawi an ni lek lek a. Chutihrualin national media-a ziaktu Mizo chanchinbumite hi an thawhna te’n chhuah duh chin an neih vanga hetiang thil thleng hi a awm zawk thin tihte kan hriat phah a. Vuivaina an thlen hma hauhin Press Club of India leh state danga journalist pawl dangte pawhin an thlavang hauhna an rawn tichhuak sap sap a, Assam police chet dan chu democracy rahbehna titein an tarlang hial a ni.

Tun thil thleng atang hian chanchinbu mite hnathawh nasatzia mipui lamin an hriat theih phah a, journalist tan chuan thil tha tak a ni a. Dawhkan atanga chanchinthar lakhawm ringawt lovin nunna thapin an che chhuak tak tak thin tih nemnghettu a ni pakhat ang.

Engpawh ni se, journalist-te zualkona hi Mizoram sawrkar hian nasa taka a um zuisaka, a hlawhtlinpui a ngai khawp a, an umzui dan azirin press zalenna an ngaih pawimawh dan pawh a hril khawp ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?