Judge lam hawiin saidawium vawm; Comedian Search zan khatnaah BARAKHAIH!

Double ESS LPS Comedian Search inelna tak tak an tan ta a, September ni 8 zanah First Round an tan. A zan khatnaah thlirtute’n an sawi zui zui laih laih khawp thil a thleng a, thlirtute’n he thil hi an hlimpui hle.

First Round zan khatna hi a ‘hit’ a, fiamthu thiamte an che tha. Tlema fual deuhte chu an awm a, mahse anni pawhin thlirtute nuihna tur khawp fiamthu an nei tho. Fiamthu thiamte an inel laia he inelnaa tel ve lo rawn inrawlh an awm a, mipui a barakhaih chiang hle!

He thil hian mipui chauh ni lovin judge-te leh host-te pawh a barakhaih a, studio chhunga duty thlalatute leh tawngrinna lam buaipuitute pawh a barakhaih vek. “Kan vai khan min barakhaih. Mak ti lo kan awm lo. Kan rin loh lutuk thil a rawn thleng a, chutah kan hriatthiam hnuah kan han nui leh tak tak mai chu, pui tak a ni,” a chhunga awm ve pakhat chuan a ti.

Contestant pariat an inlan phawt a, an ‘hit’ tlang ngang mai. Chutah a puaknaah host Baryl Vanneihsangi’n Lalrinsiama, Serchhip a ko; Rinsiama’n dawhsan a rawn pan, lukhumparh nen a rawn infam, hma lamah hniam takah a pawh kun avangin a hmel a lang thei lo. ‘Ka nuin i hmel chu lan lo mai rawh a ti a, tin, ka hahni a puam bawk a, min lo hrethiam dawn nia,’ tia bul a tan hnuah fiamthu a thawh ta a ni.

Fiamthu pathum vel a thawh zawhah, ‘A va har ve chuti khati… Helaia han din chuan a boruak a lo dang hle mai…’ a ti a, sawi tur a haichham. Hunvawngtute a va en a, ‘Bell kha a ri thei lo em ni?’ a ti a, sawi tur hre tawh lo zam lutuk angin a awm. A tir atang khan a tawng fiah lo a, a riat deuh niah niah a ni ber. Chutah judge Mafaa Hauhnar a rawn inrawlh a, dim tak maia a ‘comment’ zawhah “Lalrinsiama” chuan, ‘Khata tanga thlir ang ngawt kha a ni lo… Tel ve la, i fiamthu thawh zawhah ka lo comment ve ang che chuti khati,’ a ti ta mai. A lungawi lo a, judge-te lamah chuan saidawium a vawm ta pek! Mafaa’n, ‘Security,’ tiin security duty-te a au a, studio a reh ta thap mai. Chief organiser Mapuia a rawn inrawlh a, a lukhum dahthlaa a hmel hmuhtir turin a rawn ngen. “Rinsiama” chuan a’n phelh a, a tarmit a’n dahthla bawk. A hmel a lang ta!

“Rinsiama” chu Comedian Search hmasa bera pakhatna Lalchharliana a lo ni! Studio chhunga mite an khek ta hluah hluah mai! An au a, a thenin kut an beng. Judge-te pawh an thaw huai!

Kha thil kha tuman an hre lo tak tak a, studio chhungah khan Mapuia bakin an hre lo. A chhunga awmte sawi danin, khatia Rinsiama’n sawi tur a’n haihchham lai khan Mapuia khan a bula thu Stephen Auhmun leh Lalhruaitluanga Chawngte te kha, ‘Comment tawh mai rawh u, sawi tur a hre tawh lo a nih khi,’ a lo ti ru su su thin a ni awm e! Mapuia hian Chhara a ni tih an hre hman ang tih a hlau lutuk a, comment thuai thuai turin a thiante hi a lo nawr sek a ni awm e!

Chumi zawhah chawlhlawk a ni nghal a, chawlh lai paw’n an la nui nasa. Judge-te’n Chhara a ni tih hre reng chunga hre lo der angin an insawi leh rih a, an la nui dawn chauh!

Break zawhah pawh a hmaa mite ang bawkin fiamthu thiamte an che tha leh a, thlirtute an chawk hlim hle.
September ni 9 zanah First Round hi an zo a, September ni 15 leh 16 zanah Second Round an ti leh ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?