Ka Huang (April 15, 2018)

Ni 10-4-2018 zan emaw ni, ZONET-ah kan Synod (Welsh Mission tih thin) building chanchin tu nulain emaw a rawn puang a. Upa hle lo mah ila, ka hriat vena satliaha ka lo tawnhriat vete a kaitho nasa mai a; chuvangin, tlem azawng ka’n ching pawr ve teh ang. Ni 10-4-2018 zan emaw ni, ZONET-ah kan Synod (Welsh Mission tih thin) building chanchin tu nulain emaw a rawn puang a. Upa hle lo mah ila, ka hriat vena satliaha ka lo tawnhriat vete a kaitho nasa mai a; chuvangin, tlem azawng ka’n ching pawr ve teh ang.

Mission Venglai, Aizawlah ni 8-3-1929-a piang ka ni. Kum 1932/33 emaw khan ka chal darah khawihli fahrah a awm avangin, ka pa (Ch.Pasena) nen Durtlang Welsh Mission hospital (1928-a din)-ah ka han zaitir a. Doctor sap chu Pu Daka (Doctors?) a ni a, Sister (?) chu Pi Sangi a ni. Mingo chu 2 an nih chu. An hming pawh ka hre lo. Pu Daka chu ke lehlam tlawn a ni. Hman nia rawn puangtu khan kimchang deuha rawn puangah ka awt hle. Record a awm ngei awm si a.

Hmeichhe sikul chu 1903-a din ni awmin a rawn sawi bawk a. Ka hriat ve chu tuna Synod Press kan tih chhak tlang, Dawrkai Veng chung tlang takah hian Rangva in, a chhuat thingphel a ni. Ka hriatna chhan chu – chung lai chuan Assam Rifles lane boy-ho pawh hi sikulpui bula sikul sen kan tihah khian Vai naupang sikul a awm a, Zirtirtu 2, Joy Bahadur (Ke leka) leh Pu Zalawra an awm thin. Khang lan boy Punea te, Thirea te leh sikulpuia Class VI Mizo tleirawlte kha an intithiam lo a niang. Lane boy ho khan New Street tawpa culvert hnuaiah talhtum an lo dah ru chu niin, lunch break-ah U Romawia (Pu Tlangbawia fapa) an vaw thlu tawp mai. Chuta tang chuan Welsh Mission Sikulah lane boy kal an phal ta lo a ni. Chu hmeichhe sikulah chuan pawl hrang engzat nge awm pawh ka hre lo. Kum 1936/37-a U Romawia an vuak thluk chu, a nupui ni ta, Rokhumi (Pastor Chhuahkhama fanu) chu Class III a ni tih ka hre chauh a ni. Amah Rokhumi chu U Romawia va bawihsawmtu chu a ni nghe nghe a ni. A hnu daihah nupa an ni zui leh ta nghal a!

Sikulpui bula sikulsen kan tih khi ka sikul kai tanna a ni. Kawngko lam khi a tlawnin a inping phei pawrh a, sikulpui dep lamah B Pawl an awm a, Dawrpui lam pangah A Pawl kan awm thin. Kan Zirtirtu chu Pu Hminga (Chawnghmingliana) a ni. Thutthlengte a awm lo, chhuatah kan thu vek mai a, blackboard-a figure an ziak ang chu chhuatah chalk bungin min ziahtir a, a nawhreh nan chuan kan kekawr bul mawngin kan hru (nawt) fai zel. Chhuat a tle duh a nia! Chutih laia Missionary chu Edward Davies te nupa (Pu Thara) an ni a, Pi Thari chuan min rawn zirtir thin a. Tum khat chu Thanglura (A.Thanglura, BL hmasa kha) Pi Thari chuan, “Nang chu i lian deuh hlek bawk a, i thiam deuh bik a, B Pawlah sawn ve kai ve rawh,” tiin B Pawlah a sawn a; mahse, a khual deuh a niang e, min rawn en ziang a niang, chawhnu lam chuan, “I lung a leng a ni, A Pawlah kir leh mai rawh,” a tia, chawhma B Pawlah a kai a nih chu. Sikulsen thlang lam chu, ka sawi ang khan Vai naupangho sikul a nia, Vai kan hmusit si, anni lahin ‘Lushai Kuki’ min ti bawk si. Chawlhlawk leh chhun chawlh lai hian, kan aia liante hian, “Hei hi i ngam chuan a chalah chil hnawm rawh,” an ti. Kan aia lian ngei mai kha an ni ais, kan hnawm chiah chu insual a ni mai. Lu meh kawlh, an chhipah zungte tal tiat vel zuah an ni ber a, an chhip ziah kan man fuh chuan kan pawt te vawng vawng thin. Tah loh ni kan nei khât hle thin.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?