Ka Huang (April 29, 2018)

Aizawl mi hlun WhatsApp an tih group-ah hian ka tel ve a, kum lamah chuan ka upa ber âwmin ka hria a, thiamna lamah erawh chuan ka thiam lo ber thung. Amaherawhchu, kum tam na na na chuan ka lo dai zau deuhin thil tawh apui ka lo ngah deuh tawh thung a, Mizo thil hriat loh an ngah tawh hle âwmin ka hria. A hunin a zir tawh a ni ang e. Chuvangin, heng Mizo thil tunlaia sawi lar tak lem loh tlem azawng hi ka’n sawi teh ang.

 

NGAWI: Hei hi sangha thang ti ila a dik thawkhat mai âwm e. Fur lai hian sangha chaw zawng hi an vei nasa em em a, lui hnai lamah tuilianin bawlhhlawh an ei chi a rawn len thlak kha chuhin luihnar an pan nasa thin. Chung sangha, lui hnar lam panho chu an chhuk theih lohna turin lui remchang lai kha an lo dang ping tlat a, perh pawh an perh khum thei lo. Chu pal pin tlar khawimaw lai chu an hawng huau mai a, chu a khawhthla chu a thlangah sangha tlang theih lohna turin bawm lianpui ang maiin an lo ping leh si a, chutah chuan sangha chu an tang ta thin a ni. Sangha an danna pal sirah khan ngawi-ruk an tia, chutiang deuh bawk chuan sangha fing zual bum nan a sirah te an siam bawk thin.

 

KAR: Kar hi a inlen hleih a ni ber, Sakei kar, Sakuh kar te an siam thin. Kha an thang kha a pal per chuan a nakthawkah fei zumin a rawn kap nghek mai a ni, sakuhte phei chu a kap tlang zawk a, a thil tlat mai a ni. 1948 khan Mawmrawng tlangah khian kawng sir maiah sakuh kar an lo kam chuan Kuhphung (a lian bik) hi a lo kap a, a thi tawh a, a kuh chu a ther huang mai a, “A mawi e,” tih vangin a sei lam chu ka pawt nghek mai a. Dawhkilha hman tlak chi kha a tam tehlul nen, 10 emaw lek ka lo pawt tel a (tunah hian pakhat chu ka la kawl). Aizawlah, nula rimnaah ka’n sawi a, “Awi, dawhkilhah ka duh,” an tia. Pakhat ka ngaihzawng bik chuan min dik apiangin ka AW a, ka theihnghilh ziah lahtak a. Rei deuh hnuah chuan, “I theihnghilh tawh loh nan,” tiin ka kut vei lam hnung hi hriauin a vit tlang a, thui ang deuh hian, la zai hnih hi a suih kual a. Chuti zet erawh chuan ka theihnghilh lo chiang hle mai.

 

SA THANG: Hei hi sanghal te, sazuk te, sakhi te tana siam a ni deuh bik, eng dang vak a ni lo. Tlakhawlh ang deuhin lei an lai khuar a, chutah chuan a valh phahin sain a rawn dai chuan a per a, a ngulin a phih awk ta thin a ni, sa kal khânah an kam deuh ber thin.

 

FEN-HLIM: Hei hi hmeichhiain an dai palh chuan an pawnfen a hlimsak ta deuh thin a ni. Hmanlaite chuan kekawrtê tih angreng ha hek lo. A kamtute khan an lo châng ru thin, an en theih nan! Ka pi Darsavungi thing phur tur kal pawh a awk a, a thinrimin an sairawkherh thingnghilh chu a sahchhumsak vek a ni awm e.

 

SAHDAL: Hei hi sava leia chaw zawngho – Ramar, Vahrit, Varung, Vahlah, Chipte thleng awhna thang a ni, a inlenhleih a ni mai.

 

THANGTHLENG: Sava thinglera a rah tlan chi – Tawllawt, Tuklo, Kawlrit, Tukkhumvilik, Dawkek awh nan a ni ber, an keah an awk thin.

 

THANGCHEP: Hei hi Thehlei lam chi leia vakho awhna tur a ni a, sava leia tla pawh a awk duh thian, Zuchangte a awk duh hle.

 

KI-LEN: Hei hi Vaki, a ruala thlawk hi, kawnah lên an lo zar a, an rawn sut khan an lo man thin.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?