Ka Huang (April 9, 2017)

Kan lo thlawh kha a awl khawp a, (Chu – lo a nih chu kan thlawh, Huan ka thlo, Leipui ka thlo), a tir atangin kan ngun vang ni berin ka hria.

June, 1948 chuan temporary em em may Census department, Superintend, Lushai Hills enkawl turin an rawn hawng a, hmar chan bial 13 chauh ka hria. Census Officer atangin peon thlengin a thar vek thla 4 atan an la a ni. July 1948 atanga thawh tan tur a ni nghe nghe.

Interview pawh a awm lo, examna a awm a – hna ruak chu Census Officer 1, Cleark 2, Census Supervisor 2, Census Enumerator 13, Peon 2. Kan Bawrhsal LL Peters kan examination chu amah ngeiin a conduct vek a, Bawrhsap pisa hall-ah khian kan thu a, a rualin kan exam vek mai!

Kan bawrhsap LL Peters kha pa lianpui, fit 6 aia sang, Mizo tawng thiam zet, aw thum chhur, ui lian pui pui, Greyhound 2 a nei a, a uite nen chuan an kal rual thei vek, chak tak a ni. Hlaah pawh an phuah a:
Ka pu Peter min khawngaih rawh,
I kekawrtlawn min hawh la, i saplukhum, i kuaite nen min hawh bawk la, Ka intlawhtawn awr awr mai tur a,” tiin (Ka Chhandamtu sual leh buaina karah tih thluk).

Tichuan, Pu Lianhnuna BA hmasa ber khan Census Officer, Lalnithanga (IAS kha) leh George Rohmingthanga Clerk, Vanlalngena leh kei Census Supervisor kan ni. Census Enumerator leh peon chu ka hre kim ta lo e. Census Supervisor 2 chuan Enumerator 13 chu kan supervise tur a ni. Kan Census hotu chu BB Lyngdoh a ni. AIjal-ah C.I (Circle Interpreter bial 13 a awm. Khawchhakah 6, khawthlangah 7, fur lai, vangvat tam lai a nih avangin khawthlang ai chuan khawchhak chu duhawm tak a ni).

BB Lyndoh chuan min ko a, “Thlang tawh u ;le,” a ti ta mai. U Ngena chu Pastor Chhuahkhama fapa, inkawmchhak kawmthlang kan ni a, thlang hmasa turin kan innawr nasa ta mai. “Upa zawk, Naupang zawk,” tiin. Kan thlang dawn lo tih Officer-in a hriat chuan, “Chitha ka vawr mai ang,,” tiin lehkhaah W leh E a ziak a, a hrual mum a, a kut phah atanga pawt turin min ti a, chu pawh chu la hmasa turin kan inhnawn hle. A?tawpah U Ngena ka hnawn thlu a, W (west) a pawt hlauh mai a, vannei ka inti hle a ni.

Enumerator-ho kha an bial bialah an zin nghal a. Kei pawh chu hma takin, Sialsuk lama bial hluite tlawh châk vangin bial pawn a ni na a, ka phei ta a. Hetih lai hian Lal zawng zawng kuli kan la thei a, Lal hnenah Bawrhsap parwana kan pe a, kuli pakhat zem min lo pe thin (inchhawk duh vangin 2 zel an thawk a, chutih lai kuli hlawh chu siki thum (75 paise) a ni).
Sialsuk chu ni hnihah ka thleng phei a (chhiartu, ka sawi hun lai hi i hriat thiam theih nan kea kal vek a ni). Puanpheikhawk sen, a hnuai chhe chi Re. 1 leh sikiin kan lei a, kan kawl ngar ngar mai a ni. Ni khatah km 30-40 kan kal ber. Kuli chu zin thul (water proof) kan phurhtir mai a ni. Ruah a sur leh khawilai changel hnahte kan khum hul mai.

Sialsuk ka va thlen chuan, Ka ni Sangtei (Ztu. Thangrikhuma nupui) chu thiin a lo hawrh vak mai a, theihpatawpin ka buaipui a, ka thlenin te an ni si a. Zanah ka ngaihzawng thin chu ka zuk rim a, a nuam ka ti hle.

A tuk zan chuan Sialsuk khaw nula hmeltha an tih thin, Lalkhawthangi nau, Biakliani ka rim a, Vaimim thar lai a ni bawk a, “Ke hual i ei thei ang em?” min ti a, “I chhin ang hmiang,” ka ti a. Vaimim hi a chhawn lam ke siin insi thapin kan dah a, chu chu, lungthu pathum meina tawk tak tuahah a rawh (hem) zel a, ka ei zel a, Ke hual chu ka lo ei zo thei lo, Ei lama kan U e ti loin a vaimim kawm a that poh leh ei tur a tam mai a lo ni, vaimim ban tiat lek lek hi ni se a ziaawm deuh mahna.

Chu vaimim ka ei patawk chuan ka kua a titha ta lo a, duh aia rei (ni 3) lai ka cham phah ta a ni. Biakliani te kha la dam tak maw, a dam chuan kum 84/86 te chu a ni ngei tawh ang a, an ngaihawm teh e.

Sialsuk atang chuan ka bial lam Hmawngkawn ka pan a, a hnai a, Khuangtuaha kha ka kawm a, kum 50 vel niin ka hre ta. Hmel tha tak a ni. Ka hna chu a theih theih ka thawk zel a, Baktawng ka va thleng a, Thil ka hai a, Ka pa Hrangchhuma te chu Bawngchawma awm emaw tiin Lal – Lalzuala Sailo inah ka lut a (kan ina thleng thin tho a ni). Zanriah ei kham chuan Lal upa committee a awm chu a lo niin, tu emaw a lo lut a, “Mikhual in nei elo?” a tia, Pa Lalzuala chuan, “Mikhual ni lo e, kan Chhuanliana maw le,” a ti a. Tang hra hian, “Tu Chhuanliana maw?” a ti a, min hre ta, a lo phei a, “Engah nge mahni in awm renga, hengah te i thlen vei,” tih pahin ka thul chu a pu lawk a, “Mi zui rawh,” a tia, kei chuan zahzelah, “Bawngchawmah emaw in awm ka tia lom,” te ka ti ta mai mai a. Ka pa Hrangchhuma inah chuan ka thleng ta a.

Hna an lo la zo lo deuh a, nghah pahin nula ka rim thin a, Lal muala mi, Rohmingthangi (la dam tak maw?) hmeltha deuh mai ka rim thin a (Baktawng ka riah reng reng chuan ka rim ta ziah a ni). Baibing ka hehzia ka sawi a, a pain, “No 6 belin ka mun ang che, i ei duh ang em?” a tia, ka ei tam teh asin. An inthlangah Hnuaii te, nula rual, kuhvakhawr (supari pan) zuar an awm a, ka tlawh zan toin. Bilkhawthlirah an pem ta nghe nghe a, ka zuk hmu leh vek vuk, a hnua Forest Guard, Bilkhawthlira ka tanin.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?