Ka Huang (August 13, 23017)

Lushai Hills (Mizoram)-a sikul kan neih san ber, pawl sang ber, Pawl VI chu ka pass ve ta a nih chu, pui tak a ni!!

Pawl VII zawm turin Shillong-a kal ka tum leh ve ta a. A hmasain chhiartu tam takin in hriat phak loh, phai ram kal dan (1) Tlawng dungah (2) Aijal-Silchar tlang dungah (kein).

Keini chu Tlang dungah Lalaghat thlengin Maji lawnglenga chuan kan tum a ni. 1942 khan, Indopui II-na (1939-1945) vangin sap sipai tam tak an lo chhuak a, Silchar lamah Lorry (motor) an phelh sawm a, lawngin Tlawng dungah an rawn tawlh chho a, Sairangah an rem khawm a, Aijalah an lo chho thin. Chutih lai motor kawng chu Aijal-Silchar chauh a nih chu. 1942-ah Pu Rochhingan a rawn khalh chhuak a nih kha. Kan en nasa ropui!!

Aijal atanga Sairang pawh chu motor-a chuan kan tum a. Chu motor chu 3 tonner, Chevrolet, lorry a ni, a body chu, phui em em a, tar paulin-a khuh tlat a ni. Lammual bul, bung hnuai atang sawn kan tan a, la chuang ngai reng reng lo nih nen, petrol rimchhia tih nen, motor chu a han kal ta a. Tuikual kawng man tura kawng kual deuh mai kan kual atang sawn ka bo daih mai a, hma lam pan hian ka inhre lo, “A changin ding lamah, a chang pawh vei lamah,” tih ang mai khan ka sawi hian ka hria a, tuichhunchhuah thlen hmain ka luak nghal a, hriat pawh ka hre mang lo. Pu Liankhum benguiha leh Sweetie ten, “A hrawk kha an veng a, motor tlanga ka hrawk bawk ka tauh an hlau a ni. Kan motor kawng neih chhun, Sairang kawng pawh, vai dan takah ‘katcha mutcha rasta’ a ni si. Sairang kan han thleng chu, Arhapa dawrah, zahte chu khawi lamah, chi bag chungah ka bawk thlawp mai a, ka thianten Maji lawng an ngaihtuah leh tuah loh pawh ka hre peih lo, ka zawi der mai a ni.

Lawng an tifel a, min hnuk thla leh tawp mai a, ka mu leh chawr chawr mai. Chaw ka ei pawh ka hre lo, lawng chu ka rui zui leh ta a, ka then diai diai reng mai hian ka hria. Lalaghat-ah kan kai a. Relah kan chuang leh ta a, rel chu ka rui zui leh a, kan su dial dial reng hian ka hre mai a. Independent hma a nih avang khan, Shillong kawng chu via Nongpoh ni loin, via Sylhet a ni. Sylhet-ah te chuan thut lai pawhin kan then dial dial hian ka hria. CC Company (Commercial Carrying Company) bus-ah Shillong chu via Pynnursullah/Elephant Fall (upper Shillong)-in kan thleng a ni. Tuna, via Guwahati/Nongpoh kawng hi chu Independent (1947) atang maia kawng a ni. Shillong kan thlente chuan ka motor/lawng/rel ruih kha a la reh lo. Mak takin Sylhet to Shillong, CC Company bus-a kan chhoh khan ka ruih belh miah lo.

Sawi leh sawi hnu, Indopui II-na lai a nih avang khan, St. Anthonys High School leh college chu B.O.Rs (British Order Ranks)-in an lo luah fai vek mai a. Keini chu Ranee Cattage, Laitumkhrah-ah kan awm a, kan kawt an chiahah chuan Raja Cottage a awm a, IEME, Donbosco-a training-ho, Ngunhulha te, Nilinga te (chhim lam mi ve ve) leh hmar lam mi, Laimana leh Lunghnema (Pu Lunga) ten an lo luah bawk a, kan khua a har lem lo. Chaw chu a tir chuan Don Bosco-ah kan ei ve a, naupang an tam a, chaw bel a lian a, chaw kang khir a hlau a, kan inchuh nasa thin. Kan hotu chu Father Cremin (Irish mi) a ni. Bengali naupang lo ho thang a ni a, mawngkawhurte hi a hre riau maiin a insawi.

Selbuanga nen, tum khat sikul chawlh laiin, ka khumah puan pawh sin loin, kan lo mu zangthal dun a, chutih lai chuan father Cremin-a chu a lo lut thut mai a, a hmuh than, Bengali-ho ang chuan min ngai a ni chek ang, mawngkawhurah min puh ta mai a. “I saw with my own two eyes,” tih vel kha a uar nasa mai a. Mahse, kan senior Ch.Chhunga (ex-CM), J.Lianchungnunga (Dawrkai Veng, Aizawl), Lalthanzama s/o Compdr. Kaptea, Chaltlangte hoin nasa takin an hrilh fiah a, Mizo zingah hetiang mawngkawhur tih hi kan awm ve ngai lo tiin, kha rilru dam lo zet chuan a ngawi thei ta a ni ang.

Chu Father Cremin ka tih chu, keiniho chuan Awrseka kan tia, a awr hi a ser nge ni… a sek teuh hian a lang mai. E! John Pahlira, Durtlang Mel 8, ka theihnghilh palh. Chungho chuan min chhan lo sela chu St. Anthonys atang khan min hnawt chhuak ngei ang. Kan ep chiahah Filipa, Dawrkai Veng Aijal, a hma pawha kan hriat em em leh inkawm thin kan ni sia, Father chuan sikul naupang nena kan inkalpawh a phal thak lo mai teh a. Vawi khat pawh a lo awm lai a man fuh a, a hnek chawrh mai a, boxer a ni thin te an tia. Kha Roman Father kha chuan a hna lo tawp tur a chelh niin ka hre thin. Kum chanve hnuah Ranee Cottage atang chuan St. Anthonys High School upstair-ah kan insawn ta a ni. Chutah chuan Father Cremin kha a awm tawh lo, Brother John-an min ho thung. Pa fel, zaidam thlup mai a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?