Ka Huang (August 20, 2017)

December ni 8, 1943-ah Geography kan exam a, kâ chhangin, Africa khawmualpui hi kan zirlai a ni, Map an tar duai mai a, kan zirtirtupa, Pu Nandhi kan tih maiin min zawt a, thiam ka inti kher mai.

Lushai Hills pana kan lo chhuah ni ka hre ta lo. St. Mary’s zirlaite nen kan lo chhuakho vek niin ka hre ta. Independent hma daih a nih avangin via Sylhet bawkin kan lo chhuak leh a. Mahse, J.Lianchunga, A.Thanglura, Selbuanga leh kei chu Tlawng dunga lawnga lo chho tur kan nih avangin Lalaghat kan rawn pan ta a. Kan rual hian Nl. Biaktluangi, Kulikawna Pi Laizingi fanu emaw ka lo tih ve rawk thin, tun hnua kan Chief Secretary pawh ni ta nghe nghe, L.Tochhawng nu kan chuanpui bawk a. Tichuan, Lalaghat atang chuan kan panga chuan lawng pakhatah kan chuang chho ta a. December thla a ni bawk a, tlawng tui a tlem khawp a, maji (lawng kartu)?pakhatin vaukam atangin hruizenin a pawhpui reng bawk a ni.

Kan zinga nula awm ve ta chu lawngah pindan awm chuang hek lo, Maji dep berah a mu a, kei tlema piah deuhah ka mu a, ka piah lamah mipa dang pathum chu an mu thin. Biaktluangi nen kan inkarah feet 2 emaw lai kan dah awl tak na a, mipat hre ve riau ruau tawh ka nih avangin ka inthlahrung nasa mai thin. Chhun lamah Lura’n a ît thu a sep fiam vak ziah bawk nen! Tui tlem avang chuan ni khata kan kal hi a tawi thei hle. Selbuanga nen chuan Maji chem hawhin mautakin thiam vak loin sairawkherhte kan suih a, tiaulungin sava te, ka ning lutuk chuan kan perh vel thin! Ni 4 emaw vel kan thang hnu chuan Bairabi kai kan thleng ta a, kan nula neih chhun, Biaktluangi chuan, “Ka pa hnenah ka chambang rih dawn,” tiin min chhuahsan ta a, a pa chu Thangkangloa Bairabi Headman kha a niawm e. Pu Phaitepenga, Kuikawn, fapa Patea khan Thangkangloa chu saptawng chuan Trap-up-no a tih thin avang khan ka hming hriat lar pawl tak a ni nghe nghe lawi si nia!

Tichuan, mipa 4 chuan Sairang chu muang em em chuan kan pan zel a, engtin tin emaw ni 11-naah Changsil kai kan thleng ta hram a, chuta tang chuan kan bedding ilo tel tha vekin, ke-in kan kal ta a, Sairang chu mel 5 (km 8) emaw lek a nia, Sihhmuiah J.Lianchunga te inah kan lut ta a ni. Khrismas a hnai tawh si, naupanga thuchang, Selbuanga nen chuan Aizawl thlen hi kan châk tawh nasa mai. Tuk 2 tuk chuan Sairangah kan kal a, lawng lo thleng chu kan lo thlir nasa mai a. Chhun lai vel hian hmuh theih tawpah lawng kan zuk hmu a, kan lawng a nih theihna turin Roman Catholic pawh ni si lo chuan sigh of the cross siam meuhin kan lawng ni turin Pathian ka dil zuk nia! Darkar khat emaw kan nghah hnu chuan a lo ni tak tak a, kan bedding chu Lianchunga te inah dahin, haklai nen chauh Aizawl pan kan tum a, “A tlai lutuk, mek 13 (km 21) laia hla a sin, naktukah muangmarin in hawng dawn nia,”?min ti na a, naupang â a thuchang, kan ngaithla hman tawh lo, Selbuanga’n, “Vawi khat chu Sairang kawng hi ka paltlang tawh,” a ti mai a. Engmah, ei tur, sweet takngial pawh ak loin kan chho ta tawp mai a, bawngtawlailir kanna ngang a nia, kawng chu kan hai lo; mahse, kan hmanhmawh vangin a tir lamah kan kal chak vak a, kan tlo lo nasa mai. Selbuanga kha kum khat chhuak (1929) ni mah ila, dawrkai hausa fa a nia, kei ai chuan a no deuhah ka dah a niang, ka nau zawk chei lo thei lo, kawngsira kan han chawlh hlek hian a muhil nghal tawp zel a, kei chu a vengtu ang hrimin ka thu ran zel a, a awm tawkah ka kaitho a, kan kal leh thin. Vaivakawnah te khuan in pakhat mah a awm lo, in ruak, kawngkhar pawh nei lo, Lianmunga dawr an tih mai, kawngka chunga sai hnapthleng intarah pakhat chauh a awm thin. Chuta tang chuan kawng tê (Bridle path)-in Bazar Bungkawn saw a pawh a, a karah in pakhat mah a awm lo, ram vek a ni. Chutah chuan kan chho a, Vai sipai Srimantillah vela leng hawng hian min rawn pel a, “Min zui r’u,” an tia; mahse, a kal chak sia, kan um pha lo, kan hah ngei mai. Bungkawn lan hma chauhah khian, Selbuanga hah lutuk, a mu thlawp mai a, a hnar zui a ni mai. Ka thu leh ta a. Rei fe hnuah ka kai tho a, “Kan in emaw ka ti mai a,” a ti lehnghal a, a guard hi ka ni ringawt mai. Pen 20 emaw vel kan kal chuan Bazar Bungkawn a lang ta a, Aijal electrified a la nih teuh loh avang khan kerosene street light a awm pheuh pheuh a, chu mi de ve ve kan han hmu chuh, kan lawm kher mai. Bungkawn kan chhuah chuan… khi tuna Hauthuama te dawr vel khi Ajim Khana dawr tê kan ti thin, dawr pakhat a lo inhawng a, kan va pan a, kan insawi a, Selbuanga pa, Pu Hrama chu an lo hriat zawng tak a ni a, min duat khawp. Banre zawrhlai 2 ve ve min eitir a, Torchlight 1 min hawhtir bawk a. Sipai an tam tawh a, “Halt, eho goes there?” an tih che uin hlau miah loin, “Friends,” inti ang a, an pass mai ang cheu te min ti a, harh huaiin kan chhuahsan leh ta a. Sikulpui kawnah kan inthen a, torchlight chu Selbuanga ka pe a.

In ka zuk thlen chuan, ka pa, Ch.Pasena chu MAV (Middle Anglo Vernacular) sikul hmasa ber din turin Sialsukah, Teachers’ training sikul chawpin an lo sawn chhuak chu niin, ka nute nen chhungkuain an lo phei vek mai a. Kan mo, Ka U Liani chauh a lo awm a, ka nu leh pa la hmu ta chuang lo chu ka lawm nep deuh. Kum 1943 vek khan U Rokunga, ka puzawn ni ta nghe nghe, fanu Thanthuami a boral lo niin, hla a phuah a, “Hmana kan nun hlui a chul tawh hnu, ka dawnin awmkhua a har ngei e,” tih leh “Arsi hla” – ‘Lei mite hunbi an chhiar e,’ tih hla hi 1943 chuan a phuah thar a lo ni awm a. Ka thian Vanroa te chuan thiam em emin min sak khum thin a, ka va han awt thin tak em!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?