Ka Huang (Dec 11, 2016)

Heng Bible thu hi i ngaihtuah ngai em? Lal Isua sir tuaka suamhmang pahnih an khenbehte khan – Matthaia 27:44-ah leh Marka 15:32-ah te chuan a khengbettute lama tang niawm takin an tielin an hau tih a ni a, Luka 23:39-43 chauhah hian pakhat zawk paradis ram kal tur thu kan hmu. Matthaia 27:44 leh Marka 15:32 hi changthlan ta ila Luka 23: 39-43 nen chuan a inkalh tlat hmel a ni.

Gen. 1:27 leh Bung 2:21 vela mihring siam dan hi zuk inang miah loa- Bung khatnaah hi chuan Mipa leh hmeichhia hi a ruala siam mai leh hlum hmang lem loa siam ni mai awm an ni. Bung 2 ah hi chuan mipa hi hluma duan, nunna thaw thawkluh hnua minung lo ni ta ang. Hmeichhia lah hi mipa a muthilh tira , a nak ruh pakhat a la chhuak a hmeichhia a siam ta tih a ni. A nakruh lak chhuahna ruak hi tisain a tiphui a tih a ni bawk a, chuti anih chuan mipa nakruh hi kawpkim lo emaw, hmeichhe nakruh aia pakhata tlem awm tak niin a lang. A ni miah si lo.

Tihkohte 9:7-a Paula inlarna hmuh dan Tirh. 22:9-a mi kha zuk in ang lo pek a, bung 9-ah chuan aw an hria a, tumah an hmu lo tih a ni. Bung 22-ah ve thung chuan êng an hmu a, a betu aw erawh an hre lo tih a ni leh tlat bawk. Heng hi Bible rinhlelh thu hlaa ziak ka ni lo, Bible ka rin ve dan chu: A CHHUNGAH HIAN NUNNA THU, VANRAM KAI THEIHNA THLENG A AWM tih hi a ni ve tawp mai a, Pathian thu nimahse mihringin mihring dang hriat theih tura a ziak a ni a, mihring tawng hian Pathian thu hi ziak theih loh (phak loh) tam tak a awm ka ring tlat a ni. Dik tak chuan Pathian chu hun chunga chuang a ni a, hun hi a vawn zawk niin kan sawi a nih hi, nih pawh a ni ngei ang. Nimahsela, a tan hman leh nakin awm lo a ni tihna a lo ni a, kum 1000 hi mitkhap kar ang leka ngaitu a nih avangin. Hun zawng zawng hi TUN a ti tihna a ni a, chu lai takah chuan nang hun hnuaia awm leh hun khuahkhirh tlat khan ngaihtuahna ringawt pawhin hun zawng zawng hi TUN chhin teh mah- ngaihtuah dan pawh hriat harsa tak a ni.

Tichuan, Pathian tan CHATUAN hi tun a nih si chuan tunah lei leh van a siam a, tunah Adamate’n an bawhchhia a, tunah Lal Isua a piang a, tunah Baptisma a chang a, tunah krawsah an khengbet a, tunah a tho leh a, tunah vanah a lawn a, a ni vek ta mai lo thei lo a- Chuti khawpa kan in san hleih avang chuan kan Biblea ziak te hi chu phelh rem rum pawh nise kei chuan ka hrethiam zan mai a ni, Chuvang chuan a ni ang chu Davida pawhin A SANG EM A, KA PHAK LO A NI a tih ni. Eng pawh nise, chuti khawpa ropui, danglam thei lo, pangngai, kan tello pawha pangngai reng siin chhandam kan nih theihna tura a fapa krawsa a hlan ngamna atang hian Chatuana nun kan neih hi a duh tak meuh a ni tih hi a chiang tak meuh zawng a nih hi. A ring apiang zinga tel ngei tur hian Lal hna i thawk ngawt mai teh ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?