Ka Huang (Feb 5, 2017)

Kan office ve chu Family Allotment branch a ni. Chutah chuan Assam Regiment mi mahni chhungte hnena thla tina pawisa thawn duh tawh phawt chu man loin kan thawnsak a, an Moner order form leh pawisa thawn duh zat te kan lo chhutsak vek a, Money Order Form 8-A kan fill up-sak vek a, tin an hmuhna (ack, Receipt) chu kan lo bel leh vek thin. Khatih lai (1945) khan recruit-in Rs 16-1-0 kan hlawh (Rs 16, 6 paise). Assamese figure hi an ziak dan a hrang si a, an pawisa hmuh ni kha IRLA (Individual Running Ledger Account)-ah ziak vek a ni a, date-ah kan buai thin, kan hotupa chu kan zawt sek mai thin.

Rifle kan dawn ve loh avangin zingah kan tlan thin, hotu atan Naik. Darchhinga min pe a, kan tlan tuk tin thin.

A hma zawng khan Assam Regiment-a lut reng reng chu an lu an meh kawlhsak thin. Kei pawh met turin ka han chho ve a, mahse K’u Chhunga (Ex-Chief Minister) Class IX vel a niang, a lo chho a, sipaiah i tang lo ang a ti a, ka chhipsamah a tham a, bahrikah, ka tap fap fap mai. Lu met kawlh lo chuan a tukah ka tlan leh ta a, ka thiante chu a kawlh vek a, Jemadar, Subedar khawlai kal hian ka lu meh ve loh an hmu thei riau a, meh ka han tum leh a, min tuam vek tawh, mahse Civilian Clerk Satish Chandra a lokal a, Nang hi Learner clerk i ni em kha a tia, ka hrilh a. Hazam hnenah chuan meh kawlh loh tur, a sei lai inches 2 tling lo hretin mehsak rawh a ti a. Tichuan Assam Regiment-a luh meh kawlh loh hmasa ber ka ni ta a nih chu. Mahse JCO-ho zing vak vel sawisel kha hrehawm ka ti thin. An hre ve si lo. Kekawrbul pawh nei lo chuan kan tlan hnawk hnawk mai a, tum khat pawh Ngurkhuma chuan a kekawr a rap sual a, thleh 7 a thlah a ni! A tlu tawp mai mawle.

Mizo clerk ka sawi zingah khan, Pu Darhuaia fapa Laldawla (a hnua garo minister nupuia nei ta kha) te, Lalliana, Hlimen U Siama nau te, Khuangliana, a hnua DepCom Office, Aizawla UDA-a pension ta te kha ka hmaih palh a ni, kal rual vek kan ni. Chhin lam mi IEME atanga tlanbo The Ruala kan tih tak maiin min rawn zawm bawk.

Kan Commandant khan English a uar riau a, Basic English kan zir a, tichuan thla thum hmain clerical kan exam a, chutah Basic English kan exam leh a, Basic English chu a har khawp mai. 60% hmu lo chu clerical pass mah se an grade duh tlat lo. Vanneihthlak takin U Biakthuama, Tlanghmingthanga leh kei chu above 60% hmuin min upgrade ta. Kei chuan thla 3 leh ni 27 ah bel thum ka kai anih chu. Hlawh Rs 16-1-0 atangin Rs 67/- ah a chho dawrh mai. NCO ka ni ta, ka te ber. Sipaiin rum hi tot (peg) khat chauh an lei thei a, NCO (Non-Commissioned Officer) chuan tot 3 kan lei thei a ni. Tot 3 chu naya man vel a nih chu – kan club pawh a hrang a ni, Rum pawh duhtawka lei tur a awm. Sipai lam kha chu an indaih lo deuh thin. Chuvang chuan ka thiante kha an lo kal a, tukverhah min rawn bekbawr a, ka lei sek mai lah tak a, Club-a hotu ber Battalion Havilder Major, Tumbuhuka kan tih mai chuan vawi duai lo min sawisel, naupang te si, Rum i heh min ti thin, ka in emaw a ti a niang! Bel 3 bel kha ka zak em em mai a, African Negro sipai pakhat lianpui mai J. Wat Watemburg kan tih mai chuan min kawmngeih tlat mai teh a, bel pawh a kai si lo. Chuvangin ka belah chuan kil tinah hook ka vuah a, ka kawrah a bahna tur la ka thui thliah bawk a, Sipai min pel reng reng hian min en zui vawng vawng zel. Office-ah ka vuah a, banah ka hlip a, ka ak daih zel. Zahthlak ka ti tak zet a ni. |um khat chu Jem. Hd. Clerk Phukanan min man a, “Bel i duh lo a nih chuan ka de-grade ang che,” min ti mai. Ka promotion hmu e ti loin ka mangang thei teh asin aw.

Kha Nigerian Negro pa kha a lo lian awm, Ngurkhuma nen chuan kan ning thin khawp a, mahse office ban hian kan khumah a lo thu vung a, canteen-ah min hruai a, thutna kan indaih loh chuan a malchungah kan pahnihin min thuttir a, eng thamah min ngai ngai lo. Hlawh kan la ngai lo, blanket te kan hralh zel mai a ti mai mai zel. Discipline an vawng ve vak lo a ni awm e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?