Ka Huang (Jan 14, 2018)

Kan upa ve thawkhat ta a ni ang e. Type writer ribbon thlak fel turin darkar a duh mai dawn alawm le.Kan upa ve thawkhat ta a ni ang e. Type writer ribbon thlak fel turin darkar a duh mai dawn alawm le.

Kum 1952 khan Forest Guard-ah ka tang a, ka bial chu Bilkhawthlir vel, Mauchar, Tinghmun te, Tipaimukh tih vel saw a ni. Tlangvala pumpa, belvala val mai mah ni ila, a rem ngang loh ngawt loh chuan nula rim ka thulh ngai lo. Maucharah sawn nula ka rim a, ka nula rim pa chuan Kawrthindeng (thing chikhat rah lian tak) an phuahna chhan min hrilha, hmar tawng a nih avangin sawi leh chhawn tur pakhat mah ka hre lo, Maw? a tih apiang chuan Aw chu ka tidam duai tho na a. Min post-na phaikuam a nih avangin, Malaria ka vei ta vak mai a Aizawl Civil Hospitalah min admit hial a, chuvang chuan thla 9 emaw chauh thawkin, ka bansan ta a ni.

Ti chuan ka awl chu a ni leh ta mai, zan nula rim chu ka hna pui ber a ni. A hmaa ka sawi ang khan, Mission Venga tlangval bupui deuh chu Rozami in (ka sawi tawha) – Dengchhingpuii te in- ka chhang rual tleirawl tiamin nula 4 an awm leh U Thanmawii te- Nula 3 an awm. Zan nula rim hunah hi chuan tlangval 3/4 hi chu an awm reng mai. Thlipuiin, Chawlhni chawhnua Jubilee Hostel a lak lai vel pawh khan Dengchhingpuii te inah chuan kan awm a, an huan meihle kung sang deuh mai chu a kur dulh dulh mai a, kei ni tlei rawl chuan ‘Chhem thlu rawh’ tiin rawl tet dawn dawnin kan au a, an nu hauh lah kan pawisa der si lo. A chhem thlu ta em lo a. Thlipui tleh ban chuan Jubilee Hostel chu kan pan ve a, a di inchung chu a lo hawk mam pak mai niin, a sir vel thing lerah chuan kamis te a len tang nual a ni. Kha thli kha a na hle.

Tunlai thangthar hian kan hun ve laia nula rim kan tih kha in hmang ve tawh lo niin ka hria. Fanghma te hi min theh a, a mawng thlawh hi kan inchuh fiam a, kan han thlawh hian kan au dur dur thin.

Khrismas a lo thlen dawn hian Khrismas thing tuah tur, tlangval in an lo hual kha kan phur a, he ni hi chuan nula tlangval zawng zawng hmeichhe lam phei chu, hnute la um lo nen lam, em phur thei an nih avnagin an thawk thin. Tum khat chu U Hleia Zairum ro hual chu, a tang chauh lo chu kan eh theih loh avangin val upa in, nula pakhat leh tlangval pakhat inkawp zelin i vak darh mai ang u an ti a. Rinthanga (Sapthlenga) leh kei chu Remveli leh Thangchhingi kan kawp a, Thingse mual tawp lamah kan rin zawn a, hun a tlai tawh si a, thing hring rona hun a awm tawh lo. Vanneihthlak deuh maiin Hnahthap ro, ui pum tia erh awrh hi kan hmu hlauh mai a, kan kit a, eh phel a nuam si, kan phur tawk khawp mai a, a ro tha si a, Khrismasna hmuna kan han keuh vel chu kan meng sang ve teh asin.

Thangthar te u, chung hun lai chu nuam tak a sin. Khrismas/Kumthar thingphurh, thalai zawng zawng kan chhuah ho avangin a nuam em em mai a ni. Tuichawi lah chuuuuh. December a lo ni tawh a, tuikhur tui a kang tawh hle a. Keini Mission Veng chuan Vailui kamah, hna ngah tak mai Darnam tuikhur kan nei a; mahse, dar rim a nam avangin loh theih loh a nih ngawt loh chuan kan chawi lo. Hna kang tak mai, tui tui pangngai tak, Sakhisih leh Lungkuang kan chawi thin. Tlangval lam duh ang ngeiin a lo kang a, thingtang kan han fawm nghal a, meilum ai chungin tui kang kan han nghak thin a. A chang chuan a tling chak lutuk emaw tih mai palh te pawh a awl mawle. Dik tak chuan hawklak lai chuan ruai theh ni lam ai khan, thingphurh leh tuichawi vel kha nuam kan ti zawkin ka hria. Tuin min ngaizawng mah suh se, tlangvala pumpa, nula rim/chhawm/fiam te chu dal theih ni hek lo. Tlangval to deuh tan phei chuan nuam tak a ni ngei ang. Keini hmu ve phak lo mahin a hawklak zawnga nuam kan lo tih ve theih chu. Kei hi zawng ka hmelchhe em a, tumah min ngaizawng an awm ve si lo a, a harhin ka harh hrim hrim a chu ti zawk pawh a. Chuti chung chuan khatih hunlai angah khan kir leh theih ka chak tak meuh thin. MUAL AN LIAM TA KIR AN REL LO a ni ta si a leh.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?