Ka Huang (Jan. 15, 2017)

Selbuanga nen Changsil atangin Sairang ke-in thleng chho ve rawk mah ila, Sairangah in kan nei ve si lo a, J. Lianchungnunga te inah Sihhmuiah chuan lawng ah, kan bung rua a awm avangin, kan nghak a, ni thum lai kan chamin ka hre ta. Nghakhlel em em in Sairang tlang kam atangin kan thlir a, a tawp ah (nu thum hnu vel) lang thei tawpah chuan lawng pakhat kan zuk hmu a. Thu dang sawi loin sign of th Cross ka siam a, Pathian hnenah, kan chuanna lawng ngei ni turin ka dil a. (Roman Catholic ka ni law), kan lawng ngei a lo ni tak tak a, Pathian hnenah lawmthu ka sawi nghal a. Tichuan, kan bungrua chu Chunga te inah, Sihhmuiah chuan kan dah a, kan kawr hakthlak kan ak lehlawh a, Aizawl pan kan tum ta a, Chunga te chuan in thim lutuk ang, Naktuk zingah chho mai rawh u min ti na a, kan ngaithla tha hman tawh lo, Kan chho ta nghala.

Mel 9/10 velah khuan ni a tla, khua a thim chilh mai bawk. Naupang kum 14 mi emaw ve ve chauh kan ni a, kan hmanhmawh nasa mai, kan hah lutuk chu kan han thu chawl zawk a, Selbuanga chu a mu tawp a, a hnar zui a ni ti tih mai. Chuvang chuan kei chu a vengtu ang mai a ka awm a tul a, vawite khat pawh ka mu zal lo, ka thu ran a, Selbuanga chu ka kaitho a, kan kal leh ngar ngar zel. Vaivakawn-ah te khuan in pakhat mah a la awm lo. Lianmunga dawr an tih mai, Rangva in, kawngka lu chunga Sai hnapthleng intar awmna, tuma luah loh chauh a awm. Chuta kan chawlh lai chuan Assam Rifles sipai gorkhali leng ru (?) hawng tur chho tur hi kan hmu a, min zui ru a tia, dawrpui bungkawn a chhuak kawngah kan chho ta a, a kal chak em em khawp a, keini hah tawh, riltam nen kan tlan hi a ni hawt mai, Dawrpui bungkawn lan hma chiahah chuan Selbuanga chuan a peih ta ngang lo a niang, a thu hnawk a, a let tawpa a mu nghal bawrh bawrh mai! Kei chu vengtu, kaitho tur ka ni si! Minit 10 vel hnu chuan kan kai tho a, Selbuanga chuan E! kan khum emaw ka ti mai a sin a ti nia! Tichuan pen 20 emaw chauh tak meuh kan han kal leh chuan Dawrpui bung kawna street light (street light hi Aizawl khaw chhungah hian khat tak takin an dah a, electric power awm ve hek lo, a chhipah, Laltin (lantern) dahna a awm a, khawnvar lian deuh bik, K. Oil dawng tam deuh bik dahna a awm a, chu chu darthlalangin a hual tlata, chowkider emawin a enkawl a ni ang.

Chu street light kan han hmu chuuh kan lawm teh asin. Sana te kan nei lem lo a, zan dar kua chu a pel tawh ngei ang. Mosulman biak in bulah swn Ajim Khana te kan ti ni tain ka hria, dwr a lo la inhawng ve ve a, kan va lut a, kan ril a tam si, banre hlui deuh 10 emaw hi an lo khai a, lei kan dil a, dere (2 annas) an ti niin ka hre ta. Kan ei nghal bawrh bawrh mai a. Kan khawsak dan kha mak an ti deuh ni maw, min zawt a, Shillong atang lo haw chho kan nih te kan hrilh a, an tha em em mai a, kan nu & pa te min zawt a, kan sawi a, Selbuanga pa, Kulikawna dawrkai lian pawl Pu Hrama kha an hria ni maw, an tha ve hrim hrim ni maw, Torchlight te min hawh tir a, balhla man pawh an la duh lo. An mahni chuan hei indo a nih avangin sipai an tam a, khawii hmun hmunah emaw pawh sipai duty-in “Halt” tiin silaiin an tin mai thei che u, hlau miah loin Friend in ti ang a, Pass an tih chuan in kal zel dawn nia te an tia, darkar chanve emaw lai kan awm hnuah, balhla te kan ei puar ta deuh bawk a, Aizawl South lam chu kan pan ta, Sipai tumah kan tawk lo. Sikul kawnah kan inthen a, a nin Torchlight chu a hawn ta zel a ni. Khang Mosulman te kha tun thleng hian ka ngaihtuah chhuah changi MAK ka ti thin, Tu kan nih pawh an hre tawp si lo.

Khrismas a lo thleng dawn ta mai sia, ka thiante- Vanroa (Pastor Chhuahkhama fapa) te chuan U Rokunga hla phuah thar, a fanu boral ta a phuahna ‘I hlimthla te mai hi kan chantawk, I anka biak leh mi chhang si lo’ tih kha a lar lai a lo nia, ka thiam ve der si lo, min han sak khum thina, k awt teh asin aw!

Pawl sarih ka pass ve ta si a, Shillong kal leh thei k ni ta si lo a, Aizawlah High school- Pawl VII zirna tur a awm chiah chauh a, kei chu Pawl VIII zawm tur ka ni si. Chu 1944 kum chu ka awm ta mai mai deuh a. Ka pa MAV School (Middle Angle Vernacular) hmasa ber 1944 a tan turin Sialsukah an lo transfer ta bawk nen. Sialsukah te chuan ka awm ve ta mai mai a. Lungleiah (ke ngatin) Ka u Biakchhunga leh a nupui nen kan va kala, Pu Ch. Chhunga pa, Compounder Thianga in ah kan va thlenga (a nupui kha ka nu U neihchhun a ni) Naute thar an lo nei a, kan awm laiin a hming an ssa a, damdawiin chawkidar pakhat nen vai buh zu an sawr a. an in dun tlak tlak mai a, naute hming chu hlaa sak tel an duh bawk si, sak theih turin an siam thiam si lo– Chalhmingthangi a hmel a tha zu nia le an ti thlung dur ut mai nia, kan hlim ve tho tho.
Chanmari phei a Theipalingkawh kan kit a, tuk tin, tukthuan ai hma in puitling pali leh kei naupang deuh pakhatin kan han phur thin. Khang lai (1944) te kha Gas thuk a awm tih pawh kan hre phak lo. Thangthar hian in vanneihzia hi hre mawlh mawlh rawh u. Thingphurhte Tuichawi te a ngai ve tawh lo a, zing meichhem ringawt pawh thil awlai a ni lo. Thingtlangah phei chuan, thing lukham kha an thawlh nunga, zingah phuai nena tangin an chhem thin, Nawalh neih pawh namai lo deuh asin. kan vannei tih nachang te hi hria che u maw?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?