Ka Huang (Jan 20, 2019)

Indopui II-na (1939 – 45) khan Mizo pawh sipaia inhnim lut an/kan thahnem hle. A tam ber kha chu Assam Regiment-ah a ni awm e. Kei hial pawh kum tling lo chungin (16) ka tel ve a nia!

Mizo kan tel vena ka han hriat theih ve chu:

IAMC – Indian Army Medical Corps.
RIASC – Royal Indian Army Supply Corps.
RIAF – Royal Indian Air Force.
RIN – Royal Indian Navy
LSc – Lushai Scout
ARP – Air Raid Programme
WAC (I) Women Auxiliary Corps (India)

(1) Lushai Scout hi ka chiang chiah lo nain, 1944-a Aizawla din a ni. Japan khan Pearl Harbour (US lawng chawlhna hmunpui) kha, an inring lo lai a bomb thut mai a, an thlawhna tam tak an bomb chhia a ni. Chuvang chuan Allied Force lamah tangin Axis (Germany, Japan leh ram te deuh tlem) kha a do ve ta a ni. Khatih hma deuh khan Japan leh China an indo a, China khan tank 6 chiah a nei an tia, Japan khan a nawr nasa mai a. China kha a tawlh zel a; tichuan, United Kingdom, USA, China te chu Allied Force an inchhal a, British Empire-a awm, India te kha chu Allied Force lam kan ni vek mai. USA thinrimin Hiroshima-ah Atom bomb a thlak a, a hnu lawkah Nagasaki-ah Hydrogen bomb a thlak leh a. Japan-in a tuar ta lo a, Axis chu an tlawm ta a, Indopui II-na chu a tawp ta.

(2) WAC (I) hi Indianan nih avang maia (I) dah an ni. Sap hmeichhe nalh tak tak kha WAC an tam mai… 1943 pawh khan St. Anthony’s High School-a kan zir laiin WAC pakhat, hmeltha em em mai hian tuk tin min rawn paltlang thin a, a car ri kan hriat veleh kawng sirah kan lo intlar a. Lalthanzama’n, “Salute,” a tia, salute kan pe thap thin. A nui ver ver thin. A hmeltha a nia aw. Garikhana khawi maw laiah khuan office a nei a niang, chuta kan hmuh chang pawhin min nuih ver ver zel. Kan inbe miah lo na a, min hmelhriat ve hman, tuk tin deuhthawa salute kan pek avangin.

WAC (I)-ah chuan kan Mizo nula hmeltha tak tak pawh an tang ve nual a, chungte chu – Khawlkungi (Padma Sri), Biakkungi, Zaikungi, Melody, Ropuii te hi ka hriat ve te chu an ni. Biakkungi leh Zaikungi hi an la dam âwm e. Zaikungi hi chu ku 1926 lama piang a niang, a nau Thanseia nen khan inrual kan ni a. An uniform kha Khaki (uk) a ni a, pawnfen, khup thleng emaw an feng a (khanglai khan hmeichhia hian kekawrtlawn an ha mang lo ni tur a ni). An kaihza khawivahlawi lang zeuh zeuha an han kal vel hmuh chu… khamawm lo tak a ni. Tunlai nula hi chuan an vun pangngai aia tight an hak hi, an pawng zerh zawrh mai a nih hi!

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?