Ka Huang (June 10,2018)

Tun tum chu Mission Veng nula lam thung aw. Bvt-ah hian kum 49 ka awm tawh chung pawhin Mission Veng hi KAN VENG ka ti leh thin! Tun tum chu Mission Veng nula lam thung aw. Bvt-ah hian kum 49 ka awm tawh chung pawhin Mission Veng hi KAN VENG ka ti leh thin!

Mission Veng khi, Venglai, Vengthlang leh Tlangbawk veng tia then a ni thin a, Pu Sai butua khan Mission Veng biak in ruam thla saw Ngawi vung ruam a phuah a, a pu hlen ti tihin ka hria.

Kan veng nulate chuan hla pawh an ngah khawp mai. 1. Mission Veng babies smiling face tih te 2. Mission Veng nulaah chuan chalh ber mai Aw Neichhingpui len mawi zuali, Sapzingi a nalh bawk a, Laingoi a fel bawk a, Zuiliani hian ngaihno a bei ber mai tih te a ni. A hla pum ka hre ta lo. Hei hi chu a thunawn chauh a ni.

Kum 1940 lamte kha chuan PHE-te la awm hek lo, TUIKHUR kha kan PHE a nih mai kha, in tin maiah tuium a awm vek lo thei lo a nih kha. Tuikhur – Sakhisih, Lungkuang kan chawi deuh ber a, Lungli pawh kan chawi zauh. A hna tha ber Darnam, kang reng reng lo a awm a; mahse, Darnam tih takah, chham ek hi a awm zul reng mai a; chuvang chuan dar rim a nam an ti thin.

Khanglai hun kha chuan nula rim put put a tam a, Tlang vengah nula 3 awmna, Kulikawn epah khian a awm a, hnathawh an taima a, kum tin lo an nei a, Fanghma hi an han thar tam thei khawp a, fanghma no thar lai chuan zan tin hian tlangval 4/5 an/kan leng a, fanghma mawng hi an kawmchar leihka atangin kan thlawh a, meiling thlawk tel turte kan siam a, kan thlawh apiang hian a thui emaw, a thui lo emaw, kan au ruih ruih a, kha Tlangnuam, Kulikawn leh Dawrkai te pawhin an hre pha thin ang.

U Vanlawma (R.Vanlawma) kha kan U rual daih ni mah se nupui kha a nei har khawp a, nula kan rimho thin! Zan khat pawh Dengchhingpuii rim tur kan kal rual a, “Chhuana, nang, nula rim chungchangah hian eng nge i duhthusam?” tiin min zawt phut mai a. Kei chuan, “Ngaihzawngte hian min ngaizawng ve ngei se tih hi a ni ber ang,” ka ti satliah mai a. U Vanlawma chuan, “Kei chu, pindan herh zim theihna khawl te tak te hi nei ila, sitting room-a nula si renga thut lah hi a zahthlak sia, mahni chauha rim zan hi chuan khawl chu herh nek nek ila, kan nula rim nena tawt deuh hleka lianin herh tê zel mai ila tih hi ka ngaihtuah thin,” zuk tia. Kha thil kha nei ila, a tha phian mai thei asin!

Tum khat chu, “Kan veng nula zawng zawng ka rim chhuak dawn,” ka tia, a mawng lam atangin ka rim ta ngat ngat a. Tirhkoh Muka fanu Zokhumi (J.Lalsangzuala nupui ta kha) ka’n rim chu an nugain an awih thei lo reng reng mai a, “Eng nge i duh?” tiin min zawt leh thin. Kei lahin, “Zokhumi hi nula a nia, ka rim a ni,” ka’n tih ngial pawhin an awih hlei thei lo. Dik takin an chhungkua kha mi tha, fel chhungkua an nia, tlangval, keini ang belval vala val mai mai chu kan lut ngam lo. Chhungkaw thilah pawh mi hlawhtling chhungkua an ni reng a, ka rim kha an awih thei lo nufa. A tuk zanah an thenawm chiah, Thangliani (Pastor Chhuahkhama fanu) ka’n rim leh a, chu pawh chuti bawk. Eng emaw duh neiah min ruat tlat mai nufa a, ka nu Hautei pawhin, “Eng nge i duh?” min ti awl lo mai nia. Tichuan, chutih hun laia Mission Veng nula chu ka rim chhuak vek ta nia.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?