Ka Huang (June 11, 2017)

Masimpur Concentration Camp atang chuan Silchar jail-ah min sawn leh ta a. Silchar jail-ah chu jail e ti loin Masimpur te nen chuan inzalen hleih tak a ni. Manipuri emaw ni, Bakkira an tih mai, convict lar tak mai hi a tan lai a lo ni a, Mawi-harha te nen chuan lo inhre khiau tawh an ni, a sual bawk a, a huai bawk ni tur a ni. Jail chhungah chuan THU BER ni mai awm a ni. Sate hi a zuar vel thei maw le! Sawi leh sawi hnu – jail atang hi chuan thil tha puak chhuah tur a vâng ngawr awmin ka hria – inbum dan tih vel zir nan erawh chuan thil tha a ni ta ve ang!

Kha Silchar jail atang kha chuan Guwahati lam, Jorhat lam, India ram lamah te min dawn darh ta ni ber awmin ka hria. A lum em em mai a, inbual nan tui an dil a, “Bucket mi 3,” an rawn ti mai! Kan ang huai huai mai a (jail warder-ho khawngaihna neih tlemzia a hriat). A tawpah chuan mi pakhat tan bucket khat kan sual thlu thei ta a, ni khatah mi tam lo tak chauh bual theih a la ni leh ta dahrual a. BAL BER BER thlan hmasak an ti a. Kei, Masimpur dil (pukri)-ah pawh bual loh, March thla tawp lama man, May thla tirah pawh la inbual lo ka nih avangin BAL BER No. 1 ka ni, bucket khat chuan ka han inbual ve ta thiak thuak a nih chu! Ka inbual hma ai khan ka inbual hnuin lum ka hre nasa zawk ta tlat nia, ka balh em em lai kha chuan thiante angin lum ka hre vak lo nia!

Tichuan, tuk khat chu mi eng emaw zat chu kawl min buntir leh ta a, a kal tur zat aia kawl an neih tlem vang ni maw, mi 2-in kutkawl pakhat kan bun zel ta a, rail station lamah min kawi phei leh ta diah diah a. Kan zingah chuan, Saitual khua, Thianghlima, tlangval hmelthapui kai, tawng duh mai mai lo, Aizawl jail-a Non-criminal Lunatic hnuaia tang, MNF-in Aizawl jail-a an lak a, an chhuah vek tak zinga mi, kha CRP-hoin an lo man leh chu niin. Tuman an hre si lo a, a case record-ah pawh Mad man tiin a hming hmunah an ziak tawp mai a ni. Naga spy emaw te pawh an ti a ni awm e. Mahse, Silchar-ah chuan a lo riltam nasa tawk a niang, chaw an khawrh khuin a hnar a rawn chim chuan, a hrawk a pawt vut vut a, “Hrawka, ngawi tak rawh, i ei dawn khawp e,” a tih ri hi an hria a. Mizo a nih an hre chauh a ni. A hming erawh chu an la hre chuang lo. Chutiang mite leh Mizo District Council member J.Thanghuama te, tuna kan Chief Minister ni mek, Lalthanhawla te nen hian min tingmit tlang nuk mai a, vai danah barah (12) mosola an tih hi kan ang awm ngawt asin. Thianghlima chu mi anglo tih takah kawng aa, biri, sikret bung reng reng hi a chhar a, a hmawm hmiah zel mai, ven hman a harsa khawp mai.

Tichuan, Rail-ah chuan min load ta a, kutkawl pakhatin mi pahnih zel min thlung ka tih kha. Kawl chabi chu bawm pakhatah hian an dah ruih mai a, zun ram thiarte han duh ila, chabi mil zawn chhung a rei em em mai a, inmil pakhat mah a awm lo a ni awm e. A number an zawng a, chabi 100 dawn lai zinga a mil zawn chu, zun/ek a lo chhuak tawh sia, tih rual a ni lo. Chuvang chuan kan kawlbunpuite kha kan hruai ve ta zel mai a, Mizo vek kan ni bawk a, a tih theih hram zel. Nowgong railway station te tak te chu kan thleng ta a, chuta tang chuan ke-in special jail chu kan pan ta a, Thianghlima bawk kha, mei bung (eng pawh) a hmuh phawt chuan a chhar a, ihe loin a hmawm hmak zel mai si. Nowgong Assamese-ho chuan min hmu duh khawp mai, min tingmit thluah mai sia, Thianghlima lah khan engmah a ngaihtuah lo, MEI BUNG chiah a lungkham! Hauh leh zilh tih vel kha eng hu-ah mah a ngai lo, chhuhsaka paihsak tawp kha a ni mai.

Nowgong Special Jail an tih chu kan thleng ta a, chenna tur barrack semi pucca building 3 (?) hi a lo awm a, hmun leh buk tha chu kan inchuh ta nuk nuk mai. Mahse, ka naute ho, Lianchungnunga (LCHNA) leh a U Thankhima (TKA) te, Hrangdailoa (nun mawi leh Pathian hre miah lo) te leh tu tu emaw chu chuh lo turin ka ti tlat a. Tichuan, Thianghlima te nen chuan Buk No. 4, a chhuat cement, a chung di, zanah chuan arsi pawh a chhiar theih ang e tih khawpa far nasa hi kan chang ve a, kan vaiin Buk No. 4-a mi chu 41 kan ni.

Mizo hi (han ti bik rawk ila) eng emaw tak kan ti a, kan han khawsakho hi chuan hotu ena en hi kan nei thuai zel mai a lo ni. Tichuan, Buk No. 4-ah chuan hotu enin min en titih ta mai!

Silchar jail lak chuan Nowgong special jail chu kim tak a ni. Tui pawh pipe-in an la lut a, pawnah pawh a awm thliah a, in chhungah pawh hmun khatah pip an la lut a, a hrehawm lem lo.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?