Ka Huang (June 25, 2017)

Hmeichhiaah pawh hmeichhe zakthei pawl nia ka hriat, kan nu, Zahmingthangi chu, kan fa tê ber kal thei tawng tawng nen Shillong-ah, ka chhuah dan tur ngaihtuahin, Pachûka, Accountant General Office-a thawk a rawn zui a. Chief Secretary, K.N.Kidwai, ICS kha parole-a ka chhuah theihna tur a lo dil chu niin… thu a chhuah hmain mi rawn hmu turin Nowgong-ah chuan a lo chhuk bawk a, rei lo deuh hnua parole-a ka chhuah mai theih tur min rawn hrilh a. Shillong-ah K’u Sena (P.S.Chawngthu) hnenah a chho leh ta mai a.

A hnu lawk chuan ni 30 parole order chu ka dawng ve ta a, Shillong-ah chuan ka chho ve ta a. Ka tih hmasak ber chu Chief Secy. K.N.Kidwaia hmuh a ni. MNF pawh ni hlei lo, Office-a ka thawk lai man kha ka ni bawk a, HEK ka nih hi a chiang ka ti mai a, chuvang chuan thin hi a rim a, awm a tawt ut ut reng mai a ni. Chuvang chuan kan nu ka hruai a, “Ka vin lutuk dawn chuan ka malpuiah min kheuh zel ang che,” tiin ka hrilh lawk diam a ni.

Min man ngawt dan chu ka han hrilh malh malh a (St. Anthony’s High School-a kum 1943-a Pawl 7 pass chauh ka ni na a, a thin a rim em avangin zah leh tawng chu ka bosal hneh hle mai!). Ka thiam/thiam loh ang ang chuan ka chanchin chu ka hrilh a, chutih lai chuan, “Office pawisa bo chu engzat nge?” a rawn ti phut mai a. Ka hre lo, March ni 4 zingah ka nupui fanaute nen Aizawl chhim lam panin kan chhuak a, kan Office chu hmar lamah a nia, ka hre lo tiin ka chhang a, ka chhunzawm leh a. Zawhna ngai nawk chu min zawt leh phut mai a, “Ka hre lo ka tih tawh kha,” tiin ka chhang leh a, ka chanchin bawk chu ka chhunzawm leh mai a. Zawhna ngai, “Office pawisa bo chu engzat maw?” ti bawkin min zawt leh a, ka chawngthu thinin a tuar lo a niang, ring, vin tawkin, “I told you that,” ka’n ti hman chauh a, a ring a niang, kan nu chuan ka malpuiah min kheuh tawk mai a, ka aw pawh chu ka tizuai leh ta a ni.

Chuta tang chuan ni tin deuhthaw hian Chief Secretary chu ka ve hmu ve a, min chhuah turin ka dil ngar ngar mai a. Chutih chhung chuan parole hun, ni 30 kha a lo ral a, extend ka dil a, min phalsak avang chuan Jaiaw Laitdom lamah pindan pakhat Rs. 25/- p.m-in kan luah ve ta a. Hna atanga suspend ka nih avangin Rs. 300/- subsistence allowance chauh ka dawng a, chu chuan mi 6, ka fate 4 nen kan khawsa a ni. Kanghmun lal thin, Pu Lalbuanga kha Shillong-ah a awm ve bawk a, kan pawng inchemchhe kawp ta phian a. Guwahati kawng lam ngaw dur karah khuan, Ankhate, Thingthupui leh eng eng emaw hnan nem ei chi kan zawng a, Shillong Mizohoin min khawngaih leisak thin a; tin, chakai (Aikam) kan khawrh thin a, Khasi bakthakho khuan an ei ngai lo a lo ni awm e. A tam phian a; mahse, ‘Khirh tham’ kan tih ang hi a awm mang lo, kawi tiat hi a ni tlangpui. Chakai chu 7 Rs. 1/-in kan hralh bawk thin, Shillong Mizoho khan min khawngaih a, min leisak ziah thin.

Tum khat chu parole extension application chu an phal ta lo mai. Ka thin hi a rim em em khawp a. Kan chhungin, a zing office-ah kan kal a, a pisa lang thei tur phulah ka dah sauh sauh a, Kidwaia chu a lo lut ta ngei a. “Khai le, ka parole extension application i turn down ta si a le,” tih pahin ka chhungte chu ka kawk a, “Khing khi i lo enkawl dawn nia, kei chu Nowgong jail-ah siam sa asin ka ei ang. Ka nupui fanau khi i lo enkawl dawn nia,” ka ti tawp mai a, min en vung vung a, “Mr. Chhuanlian, ka extend leh ang, thlamuang takin lo han haw rawh,” min tih phah a ni.

Chief Secretary ka biak a, mak tak taka min zawh phut phut a, Office hal te, kan cash bo te min zawh leh thin avang chuan eng dang ni loin kan office chhung ngei atanga hek ka nih hi ka ring nghet tlat ta bawk a. Chubakah, Shillong-ah chuan CID lam? SP kan chawngthu eksenpui, Rokunga kha a awm lai a lo ni bawk a, ka interview a, CS min zawh thinte kha ka hrilh leuh a. Office lamte leh eng eng report te zawng chhuak tuin ka ngen a. Min hrilh tha duh lo na a, Office haltu leh Pawisa bo chungchanga mawhphurtu lamah min puh a ni tih chu a sawi thawi dan atangin ka man thei. Chief Secy. kha ka inrin loh laia min zawh leh phut thin dante kha ka ngaihtuah chhuak a. Tin, kha tih laia police ruk (CID/CBI) Purkaystha khan min lo chhuiin a rukin min lo veh nasa thin tih a hnuah ka hre lehm kan chakai zawrh te kha a lo hre vek mai a lo ni!

Ka tan dan kha Office-a ka thawk lai min hnuk chhuak ka tih tawh kha. Office mi ngei min hek a ni tih hi chiang tawlh tawlhin ka hria. Kan Head Clerk, C.H.Liana kha MNF-in a chabi an chhuhsak a, lehkha pawh kha Civil Surgeon Bora hnenah a pe ngei tih pawh ka hria. Tin, kei chu LDA satliah Establishment lam khawihtu mai ka ni. Chu chu min hektu hian a hre vek tih hi ka ringhlel lo. Office chhunga Office hnathawk ngei hek, kei leh kan Head Clerk C.H.Liana chu kan ni tih hi ka chiang tell telh mai a ni. Tunah chuan min hektu(te) an thi zo tawh bawk a, — CID Purkayastha pawh khan – a report-naah, “An rethei em mai, pawisa hi a lak ka ring lo, ram hnim hnah leh chakai te a zuar a ni,” ti tein report a thehlut a ni awm e.

Tunah chuan khang hun kha kum 50 chuang liam ta thil a ni. An heka te, C.H.Liana leh kei chu Pathian zarah kan la dam a nih hi. He thil, ka tan dan hi Pathian chuan a hre kiau ang, a theihnghilh lo ang. Min hektu min hek dan pawh kha a hre kiau ang. Judgement Day-ah kan la sawi tlang ang chu ka ti mai.

Kum 3 chhung ka service min han chhiarsak duh lote kha, mihring tak pawhin ka tuar nasa. Khatia innocent-a min chhuah a nih kha chuan ka suspension period kha chhiar lehin ‘ Honourably’-in min la lut leh ni se chu, Office Superintendent-te chu ka kai ve hman tur. MIN CHHIARSAK DUH SI LO A. Mahse, hei min hektu(te) chuan he lei hi an(a) chhuahsan ta! Pathianin a la suspend ve ngeiin ka ring tlat a ni. Tawk se, ka thinrim hi a reh mawh hle a ni, DAWT-a inhek vanga ka nihna tur zawng zawng ka ni phak lo a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?