Ka Huang (June 4, 2017)

MNF-in 1-3-1966 atanga independent asual kha kei leh ka chhungte chunga a nghawng dan ka’n chhunzawm zel ang e. Sawi hmaih ka neih chu Aizawl Civil Surgeon office-a kan Head Clerk chu pawisa vawngtu (cashier) khan, kan head clerk chuan,Office Cash box chabi, MNF-in an chhuh luihna lehkha, kan civil Surgean hnenah chuan a thehlut ve bawk a ni. Inkalh tha than, chabi lo vanga a hnung lam atanga, chheni ruai meuha kan hawn tak kha, pawisa pali (one anna bit) chauh a awm ka tih kha, chabi loha hawn theih loh a nih avangin chabi laksaktute khan an la niawm tak a ni.

Aizawl jail-a kan han chhuk chu, a chhungah chuan kan zalen ang reng phian a, mahse lungbanga hung hnan kan nih avangin kan zalenna a zim hle. Mei zial leh kuhva duh kan tam a,mahse an phal si lo, inhlan chhawn lah CRP dutyin an check tlat si, chaw leh chawhmeh erawh an pass zel. Kan zing (pindan hrang)-ah chuan NCL (Non-lunatic-criminal) senior tak tak an awm a, meizial ilo lakluh dan kan sawiho lai chuan pakhat chuan, “A harsa lo lutuk, Tiffin carrier chhawng 4 velah a chung berah chaw, a dawtah bawng chek dum ngun mai a ril lang luauin dah se, a hnuai lam bawmah chuan mei zial ilo chu dah ula, bawng chek an han hawnga anga, ‘Duur, sala,’ an ti anga, a hnuai an ngaihtuah tawh lo, an pass mai,” tiin min hrilh a, chuta tang chuan Kuhva leh mei zial kan nghei ta bik lo. Prisionar an lo lut reng bawk a, phai lam pan an awm reng bawk.

Aizawl jail atang chuan sipai motorin, zing deuh maiah hian min load mawlh mawlh a, Silchar lam min panpui leh ta lawng lawng mai a, A tawpah chuan Masimpur concentration camp an tih mai, puan-in vek, thirhlingneia hung chhungah min bun leh ta a. Subedar hoin sipai chu an awm a ni. An subedar chu a vin em em mai a, keimahni mai kha an enkawla te chu kan ni sia, a vin thawm hi kan hre reng mai. Chung zingah chuan Havilder ( Bel thum) zawng-hri a vei tawh vanga hmai chik hi a awm ve a, Hotute hmuhlai chuan a vin em em mai a, an kal liam atang chuan a ngilnei em em mai thung a, keiniho chuan Hmaichika tiin kan han vuah kau mai. Concentration camp a ni bawk a, kutthlak an hreh lo. Mahse Hmaichika chuan a duh miah lo. An sawi dan phei chuan an subedar-in kutthlak tura a tih pawhin, a duh thak lo. “Ka pu kei chu sipai, ral do tura lut ka ni,lungin chhung a tang, ralthuam nei lo chungah kut ka thlak thei lo,” a ti e an ti nghe nghe.

Aizawla min tirh atanga la inbual miah lo kan nia, bal tak kan ni vek mai. Chuvang chuan HRIKHRAH hi a lo piang mai a, zah pawh a dawn theih loh, mahni kap thak hi kan zen ngawr ngawr mai a, kekawr te kan phelh sauh sauh a, hrikhrah leh a tui hi kan en nak nak reng mai. Zah thup nan, “Hrikhrah nei ve lo chu mipa an ni lo,” te kan tia, kan ri kan ri thin. Hrikhrah pian dan hi… Tum khat chu ka awm vei lam hnute bul hi a za mawr mawr a, ka han en nak chuan hrikhrah hian ka tisa kua (pore) atanga lo chhuak a tum a lo ni a, engtin nge a tui kha a zuk phum ang te ka tia, ka buai ve nasa mai nia. Nangni in hria emaw?

Ka Huang chhuak hmasaah ka ziah tawh kha- Pumpui thur nei ka nih avangin Digene tablet emaw, sodibicarb emaw hi ka mamawh em em reng mai. Ka nei der tawh si lo. Zan khat chu, ka pum a na ta vak mai a, tih ngaihna awm hek lo, U Lalsanga (IAMC Jemader hlui) kha guard ho hnenah vut te, sangha tin ruak te dilin chingal an lo han thlawr chu niin. Chu chu min intir a,ka zia awm ta deuh. A tukah chuan Field camp hospitalah min admit ta a. Chuta mak ka tih chu, Maj. pakhat hian min rawn en a khawi a man nge ka nih tih guard kha a zawt a. “Sairang atanga man,” a ti rawk mai. Ka hriatthiam ve tho avangin, sap tawngin, Sairang atanga man ka nih lohzia leh, sipai pawh ni lo, office clerk mai ka nih leh chu office atanga man chu ka nih ka hrilha, kha awih tak maw? Camp Hospital-ah chuan kha kar khat emaw ka awm hman, doctor discharge pawh ka nih hmain, “I thiante zawng zawng concentration camp atanga sawn tur an ni, lo tho rawh,” min tia, min hruai chhuak leh ta a. Ka va thlen chuan an lo insiam peih deuh vek tawh a. Kei pawh chuan chak lo chung chung chuan Hmaichika, chibai dawng seng lo an buk lui lui mai chu, buk ve tumin ka bei ve tang tang mai. Kan vai khan CHIBAI kan duh vek mai a, 100 chuang lai kan ni si a, kha a kut pawh a kham hle ta ve ang.

Camp hospital ka awm hlan khan ka thian te zawng zawng kha pukri (dil)-ah hruaiin an lo inbualtir chu niin, keimah chiah bual loh ka ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?