Ka Huang (March 18, 2018)

Ka thian dangte khan Basic English a 60% an hmuh loh avang khan Learner clerk an ni reng mai a, kei lah chu bel 3 ka ni ran mai si, ka te si. 1 Assam Regiment-a sipai lian pui pui bel kai lo an tam si, min en vung vung zel a, ka zak thin. Chuvang chuan ka bel chu thui bet loin hook 3 ka vuah a, ka kawr lamah a bahna tur ka thui bet a, ka bel loh theihna hmunah chauh ka bel a, chuti chung chuan ka ti seng zozai bik si lo a, ka Jemader Hear Clerk Phukon pawhin min warn a, “I duh lo a nih chuan ka degrade leh mai ang che,” tiin. Ka thian dangte khan Basic English a 60% an hmuh loh avang khan Learner clerk an ni reng mai a, kei lah chu bel 3 ka ni ran mai si, ka te si. 1 Assam Regiment-a sipai lian pui pui bel kai lo an tam si, min en vung vung zel a, ka zak thin. Chuvang chuan ka bel chu thui bet loin hook 3 ka vuah a, ka kawr lamah a bahna tur ka thui bet a, ka bel loh theihna hmunah chauh ka bel a, chuti chung chuan ka ti seng zozai bik si lo a, ka Jemader Hear Clerk Phukon pawhin min warn a, “I duh lo a nih chuan ka degrade leh mai ang che,” tiin.

E! hmaih chi loh, Learner clerk ka nih lai khan Telephone duty (office bân atanga a tuk office kal leh thleng) kan inchhawk thin a, Senior clerk Lalthanzama (s/o Cpmpdr Kaptea, Chaltlang) nen khan ka duty ni a lo thleng a, office bânah ka duty zawm a, Zama a lo la kal lo, a reh thiap mai a, Kan sub. Head Clerk Gaya Prasad Sharma (Mawngkawhur an ti mai a) a lokal a, mi rawn kuah ta mai! Ka mawngbawrte chu a chul ta thiak thiak mai a, min thlem chu a ni ta der mai! Kei lahin ka hlau, dawhkan tlan hêl pahin, “Sir, I never do this kind of filthy things, I am a Christian,” tih pahin dawhkan kan hel ziai ziai mai maw le! A wrist watch min pek a tiam thul, ka hlau teh a nia aw! Kan inum hle hnuin Zama a lokal ta a, kan reh ta!

Jem Head clerk an inthlak a, U Mansangliana (Mizoram state a nih hnua Dr. Thantluanga DHS unaupa) a rawn Jem Head Clerk hlauh mai a. Chuta tang chuan kha Basic English-in a hrenho kha an grade-tir ve ta vek a ni. Class IV kan nih atanga ka thian, Ngurkhuma (s/o Lianthangpuia, Darlawn, a fapa pawh Davida, Mizoram Govt.-a officer kha, khawiah emaw a awm tak ni) nen kan inkawmngeih zual bik a, Bel thum bel kha ka zak tawh bik lo. Engti zia emaw ni, African Negro – Jimmy Ward Watemberg, bel pawh kai lo, lianpui mai hian min kawmngeih em em mai a, canteen-a kan kalte hian thutnain a daih loh chuan a mal chungah min thuttir ve ve mai thin. Office bân hian kan barrack-ah a lo thu run tawh thin a, a chang chuan kan ning ve hle thin, Hawlder an ti ve si lo a, Sergeant tih nan Sagi tiin min ko thin.

Ka sawi tawh ang khan Family Allotment Branch-ah min dah a, Money order-in 1 Assam leh 2 Assam Regiments sipai mahni chhungte hnena pawisa thla tina thawn duhte pawisa kha kan lo thawnsakin, an money order kha kan type-sak vek a, Ledger lian pui IRLA (Individual Running Ledger Account) ah kan thun vek a, an money order receipt lokir kha kan enter-in an hmuh ni nen lam kan dah thap thin. Assamese-ho phung hawrawp kha kan thiam ve si lo a, kan bula Assamese kha a date kan zawt reng mai, ninawm tak a ni. Chung Money Order lokir zawng zawng chu IRLA-a kan enter vek hnuah Guard File-ah kan char bet zel thin. A harsa lo naa, a tam khawp mai.

Ngurkhuma nen chuan Cinema en hi kan hrat em em mai a, kan en dun ziah bawk a. Khatih lai khan Cinema Hall chu, Happy Valley-ah Hippodrme, a nih chu. 2nd Class-ah hna 6 (pawisa 38 vel), 3rd Class-ah siki (25 paise) a ni thin. Note buah a film hming leh starring kan ziak a, film a that viau chuan a senin line 2 kan siam thin. Roll Call zawhah kan hawng lo thei si lo a, RP- Regimental police duty helin kan buai nasa thin. Tum khat phei chu Naga (Angami)-in min man a, revolver tein min rawn tin vel mawle! Zan tin em chu kan en lo a; mahse, kan en nasa tak meuhin ka hria. William Holden-a te vanglai kha a nia. Hedy Lamour, Gary Kooper, Glen Ford tih ang reng kha kan hre em em mai nia.

Assam Regiment kan zuk zawm ve (1945) kha chuan 1st, 2nd leh Training Centre chauh a la awm. 1947 khan Reliquihment of Indian Army a ni lo thei ta lo va, German leh Japan an tlawm tak si-ah chuan. Tichuan, DV 1 (Deferred Volunteer I leh Deferred Volunteer tih min pawhtir a, DV 1 chu duh hun hunah a bâng thei a, Deferred Volunteer chuan kum 20 emaw lai a tang zawm tur a ni. Kei chuan DV ka pawt ta nalh mai a. Kan record Officer Maj. (Major kai tawh a) chuan min ui tak zet a, DV I chu Janshi thleng thlengin a zawng a, kan hmu zo ta si lo a; tichuan, Assam Regiment chu kham lo tak ang reng siin ka chhuah san ta a ni. 1947-ah.

Assam Regiment clerk-a ka thawhpui – VL Ngena te, Sangnghina te, Laldawla te, The Khuanga te, Lalliana te Darthawma te, Ngurkhuma te, Tlanghmingthanga te, U Biakthuama te, U Chalthana te, U Vanlalliana te Zama te kha ka hre chiang lo naa boral vek tawhin ka hria. A tlaktlai lo ber hian typr writer te hi ka la chhu awrh awrh mai a nih hi. Dam rei leh lung a leng rei dawn a nih mai awm hi maw!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?